រាជធានីភ្នំពេញ៖ យោងតាមរបាយការណ៏របស់រដ្ឋបាលរាជធានីភ្នំពេញ បានបង្ហាញថា សម្រាប់រាជធានីភ្នំពេញឆ្នាំ២០២៤កន្លងមកនេះ បុណ្យកឋិនទានភាគច្រើនលើសលប់ជាបុណ្យកឋិនទានសាមគ្គី។ ពិធីបុណ្យនេះ ត្រូវបានប្រព្រឹត្តឡើងស្របទៅតាមវិន័យនិងរក្សាបាននូវសុវត្ថិភាពល្អ។ ចំពោះបច្ច័យដែលកើតឡើងពីបុណ្យកឋិនសរុបមានចំនួន ១១.៦៥៥.០០២.០០០រៀល បើធៀបទៅ នឹងឆ្នាំមុនឃើញថាកើន ឡើង ៩៦៩.៩៩៩.៦០០រៀល។

របាយការណ៏ដដែលបានឱ្យដឹងទៀតថា ប្រការគួរឱ្យកត់សម្គាល់ អង្គកឋិនទានដែលដង្ហែចេញពីរាជធានីភ្នំពេញទៅ កាន់បណ្តាវត្តតាមខេត្តមានចំនួនតិចតួច ហើយក៏មិនមានរូបភាពហែគគ្រឹកគគ្រេងនោះទេ គេបានអនុវត្តជា រូបភាពតូចដោយនាំបច្ច័យ និងបរិវារកឋិនទៅវេរប្រគេនព្រះសង្ឃវត្តគោលដៅតែម្តង។ កឋិននេះសម្រាប់ការកសាងសំណង់នានាសម្រាប់វត្ត និងការរួមចំណែកលើការងារសង្គមដែល ព្រះសង្ឃ ពុទ្ធបរិស័ទ សប្បុរសជន និងមជ្ឈដ្ឋានផ្សេងៗមួយចំនួនទៀតបានរួមគ្នាកសាងសំណង់នានា តាមបណ្តា វត្ត សម្រាប់ជាប្រយោជន៍ព្រះពុទ្ធសាសនាមាន ព្រះវិហារ កុដិ ឧបដ្ឋានសាលា សាលាពុទ្ធិកសិក្សា ហោត្រៃ កសាង និងជួសជុលព្រះវិហារ ខ្លោងទ្វារ ផ្លូវបេតុងចូលវត្ត ចាក់ដីបំពេញ ទីធ្លារវត្តជាដើម។

របាយការណ៍​បាន​ឱ្យ​ដឹង​ទៀត​ថា​ រាជធានីភ្នំពេញឆ្នាំនេះមានវត្តចំនួន១៥១វត្ត ថេរមិនមានការប្រែប្រួល(គណៈមហានិកាយ ១៤២វត្ត និងគណៈធម្មយុត្តិក និកាយ៩វត្ត) និងសាលាបុណ្យចំនួន១០សាលា។ ព្រះសង្ឃទាំងពីរគណៈចំនួនសរុប ៨.៤៤៥អង្គ ដោយ មានគណៈមហានិកាយសរុប ៨.៣២២អង្គ (មានភិក្ខុ ៣.៣១៧អង្គ, សាមណេរ ៥.០០៥ អង្គ) និងគណៈ ធម្មយុត្តិកនិកាយសរុប ១២៣អង្គ (មានភិក្ខុ ៤៨អង្គ, សាមណេរ ៧៥អង្គ)។ គណៈកម្មការចំនួន៨៨២រូប, អាចារ្យវត្តចំនួន៧៤៣រូប, សីលវន្តចំនួន២១៨រូប, សីលវតីចំនួន៧២០រូប និងសិស្ស/និស្សិតដែលស្នាក់នៅ តាមវត្តចំនួន ២.២៨១រូប កើនឡើង៣១៤រូប។

សូមបញ្ជាក់ថា បើមិនប្រែប្រួលទេនោះ រដ្ឋបាលរាជធានីភ្នំពេញ គ្រោងនឹងធ្វើពិធីសន្និបាតបូកសរុបលទ្ធផលការងារប្រចាំឆ្នាំរបស់ខ្លួនសម្រាប់ឆ្នាំ២០២៤និងលើកទិសដៅបន្តឆ្នាំ២០២៥មានរយៈពេលពីរថ្ងៃ គីថ្ងៃទី២១ និងថ្ងៃទី២២ខែមករានៅសណ្ឋាគារសុខាភ្នំពេញ ដែលពិធីបើកស្ថិតក្នុងអធបតីភាព ឯកឧត្ដម ឃួង ស្រេង អភិបាលរាជធានីភ្នំពេញ និងឯកឧត្តម ម៉ប់ សារិន ប្រធានក្រុមប្រឹក្សារាជធានីភ្នំពេញ ចំណែកពិធីបិទសន្និបាត ស្ថិតក្នុងអធបតីភាព ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ៕