ទីក្រុងវ៉ាស៊ីនតោន៖ ទីប្រឹក្សាសន្តិសុខជាតិរបស់លោកត្រាំ គឺលោកម៉ាយវ៉ាល់ (Mike Waltz) រំពឹងថានឹងមានកិច្ចជំនួបរវាងលោកត្រាំ និងលោកពូទីននៅក្នុងពេលឆាប់ៗនេះ។ លោករំពឹងថាថ្នាក់ដឹកនាំទាំង២នឹងសន្ទនាគ្នាតាមទូរស័ព្ទនារយៈពេលប៉ុន្មានថ្ងៃទៀត ឬប៉ុន្មានសប្ដាហ៍ទៀត។ នោះហើយជាការចាប់ផ្ដើមបោះដៃរកគ្នាទៅវិញទៅមក។…
ទីក្រុងវ៉ាស៊ីនតោន៖ ទីប្រឹក្សាសន្តិសុខជាតិរបស់លោកត្រាំ គឺលោកម៉ាយវ៉ាល់ (Mike Waltz) រំពឹងថានឹងមានកិច្ចជំនួបរវាងលោកត្រាំ និងលោកពូទីននៅក្នុងពេលឆាប់ៗនេះ។ លោករំពឹងថាថ្នាក់ដឹកនាំទាំង២នឹងសន្ទនាគ្នាតាមទូរស័ព្ទនារយៈពេលប៉ុន្មានថ្ងៃទៀត ឬប៉ុន្មានសប្ដាហ៍ទៀត។ នោះហើយជាការចាប់ផ្ដើមបោះដៃរកគ្នាទៅវិញទៅមក។
ទន្ទឹមនឹងការត្រៀមជួបគ្នានេះ លោកហ្សេឡិនស្គីបាននិយាយរំលឹកទៅក្រុមបស្ចិមប្រទេសថាពួកគេកុំភ្លេចផ្ដល់ជំនួយយោធាទៅឱ្យអ៊ុយក្រែនដើម្បីតស៊ូនៅក្នុងសង្គ្រាម។ លោកស្នើសុំឱ្យក្រុមសម្ព័ន្ធមិត្តអនុវត្តទៅតាមការសន្យារបស់ពួកគេក្នុងការផ្ដល់អាវុធទៅឱ្យអ៊ុយក្រែនជាបន្តទៀត។ ក្នុងនោះក៏មានអាវុធសម្រាប់ទប់ទល់នឹងការវាយប្រហាររបស់រុស្ស៊ីតាមអាកាសផងដែរ។
លោកម៉ាយវ៉ាល់រំពឹងថាលោកត្រាំនឹងបង្កើតទំនាក់ទំនងគ្នាជាមួយលោកពូទីនដើម្បីដោះស្រាយបញ្ចប់សង្គ្រាមអ៊ុយក្រែន។ នៅក្នុងទស្សនៈរបស់លោកត្រាំ គេមិនអាចឈានទៅដល់កិច្ចព្រមព្រៀងណាមួយបានឡើយបើគ្មានកិច្ចទំនាក់ទំនងគ្នា និងការសន្ទនាគ្នាទេនោះ។ ហេតុនេះ យើងត្រូវតែបង្កើតទំនាក់ទំនងនេះឱ្យបាននៅក្នុងរយៈពេលប៉ុន្មានខែខាងមុខនេះ។
កាលពីសប្ដាហ៍មុន លោកត្រាំបង្ហើបឱ្យដឹងថាក្រុមការងាររបស់លោកចាប់ផ្ដើមរៀបចំគម្រោងជួបគ្នារវាងលោក និងលោកពូទីនជាបណ្ដើរៗហើយ។ លោកថាលោកពូទីនចង់ជួបគ្នាកាន់តែឆាប់កាន់តែល្អ។ យើងត្រូវតែបិទបញ្ចប់សង្គ្រាមដ៏បង្ហូរឈាមនេះឱ្យបាន។ ចំពោះសំណួរថាតើគម្រោងជួបគ្នានោះជួបតែរវាងលោកត្រាំ និងលោកពូទីន ឬក៏មានលោកហ្សេឡិនស្គីចូលរួមផងដែរ? លោកម៉ាយវ៉ាល់ថ្លែងថាយើងមិនទាន់និយាយដល់ចំណុចនេះទេ។ យើងកំពុងរៀបចំផែនការនៅឡើយ។
កាលពីអំឡុងពេលឃោសនាបោះឆ្នោត លោកត្រាំធ្លាប់សន្យាថាលោកនឹងបិទបញ្ចប់សង្គ្រាមអ៊ុយក្រែនឱ្យបាននៅក្នុងរយៈពេល២៤ម៉ោង។ ប៉ុន្តែថ្មីៗនេះ ទីប្រឹក្សារបស់លោកត្រាំទទួលបន្ទុកខាងការចរចាគ្នាយល់ថាគេត្រូវការពេលវេលាយូរអង្វែងទៅមុខទៀតមុននឹងឈានដល់កិច្ចព្រមព្រៀង។ លោកខេលឡក់ (Kellogg) ថ្លែងថាប្រហែលជាត្រូវការពេល១០០ថ្ងៃ។
នៅក្នុងសង្គ្រាមនេះ លោកម៉ាយវ៉ាល់គ្មានសង្ឃឹមថាអ៊ុយក្រែនអាចវាយដណ្ដើមយកទឹកដីដែលបានបាត់បង់ត្រឡប់មកវិញទេរួមទាំងតំបន់គ្រីម៉េផងដែរ។ លោកចង់មានន័យថាមានតែការចរចាគ្នាតែប៉ុណ្ណោះទើបអាចបិទបញ្ចប់សង្គ្រាមនេះបាន។ បើរំពឹងថាអ៊ុយក្រែនអាចមានប្រៀបនៅក្នុងសង្គ្រាមនេះទៅមិនរួចទេ។ លោកនិយាយនេះនៅក្នុងលក្ខខណ្ឌប្រាកដនិយម។
លោកវ៉ាល់ថ្លែងថាលោកត្រាំទទួលស្គាល់ត្រង់ចំណុចនេះ ហើយពិភពលោកទាំងមូលក៏ទទួលស្គាល់ដូចគ្នា។ ដូច្នេះ កុំស្រមើស្រមៃថាអ៊ុយក្រែនអាចវាយយកទឹកដីខ្លួនមកវិញដោយកម្លាំងយោធា។ យើងត្រូវងាកទៅប្រើប្រាស់ដំណោះស្រាយដែលអាចទៅរួចប្រសើរជាង។
លោកវ៉ាល់បញ្ជាក់ថាវោហារសាស្ត្រដែលលោកត្រាំប្រកាសថាលោកអាចបិទបញ្ចប់សង្គ្រាមរយៈពេល២៤ម៉ោងមិនមែនជាការនិយាយឱ្យតែរួចពីមាត់ទេ។ លោកត្រាំចង់ឱ្យមនុស្សទូទាំងពិភពលោកមានគំនិតសុទិដ្ឋិនិយមថាសង្គ្រាមនេះអាចនឹងបិទបញ្ចប់ទៅវិញ។ យ៉ាងហោចណាស់គ្រាន់បើជាងការព្រួយបារម្ភថាតិចលោសង្គ្រាមនេះបន្តឆាបឆេះដោយគ្មានទីបញ្ចប់ទៅ?
ចែករំលែកព័តមាននេះ