ប្រទេសចិន ៖ កីឡាករបាល់បោះ Zhang Xingliang សមាជិករបស់ក្រុម Guangzhou Loong Lions នៃសមាគមកីឡាបាល់បោះចិន CBA ត្រូវបានផ្អាកអាជីពបណ្តោះអាសន្ន ក្រោយលួចនាំមិត្តស្រីចូលក្នុង​សយនដ្ឋានក្រុម ដោយបានលាក់នាងនៅក្នុងវ៉ាលីខោអាវ។ Zhang បានសារភាពថា ខ្លួនហ៊ានធ្វើបែបនេះ ដើម្បីអាចជួយធ្វើកិច្ចការសាលារបស់មិត្តស្រីខ្លួន។

ក្លិបបាល់បោះ Guangzhou Loong Lions បានប្រកាសកាលពីថ្ងៃពុធថា កីឡាករ Zhang Xingliang អាយុ២០ឆ្នាំ ត្រូវព្យួរអាជីព សម្រាប់ការបំពានលើបទប្បញ្ញត្តិក្លិប ដោយរារាំងកីឡាកររូបនេះពីការប្រកួតទាំងអស់របស់ក្រុមឈុតធំ។ មុនការប្រកាសនេះ Zhang រងការរិះគន់យ៉ាងខ្លាំងពីមហាជន ដោយសារតែការបង្ហោះរបស់មិត្តស្រីកីឡាកររូបនេះ នៅលើបណ្តាញសង្គមយក្សចិន Weibo ពោលមួយថ្ងៃមុនពេលការប្រកួតរបស់ក្រុម Guangzhou Loong Lions ជាមួយនឹងក្រុម Qingdao Eagles កាលពីថ្ងៃទី៥ ខែមករា ឆ្នាំ២០២៥ កន្លងទៅ។

យោងតាមសារព័ត៌មានចិន Global Times បានឱ្យដឹងថា មិត្តស្រីកីឡាករ Zhang បានបង្ហោះរូបនាងដេកក្នុងវ៉ាលីរួមនឹងសន្លឹកកិច្ចការសាលាជាច្រើន។ នាងថែមទាំងបញ្ជាក់ឱ្យដឹងថា Zhang បានលួចនាំនាងចូលក្នុងសយនដ្ឋានរបស់ក្រុម ដោយលាក់ក្នុងវ៉ាលីមុនពេលការប្រកួត ហើយបានស្នាក់នៅសយនដ្ឋានពេញមួយយប់ ដើម្បីជួយនាងធ្វើការកិច្ចការសាលា។ មិត្តស្រីរបស់ Zhang គឺជានិស្សិតផ្នែកសិល្បៈម្នាក់ ត្រូវបានគេរាយការណ៍ថាបាននឹងកំពុងតែតស៊ូក្នុងការសិក្សាជំនាញនេះ ហើយបានបរាជ័យជាច្រើនវគ្គផងដែរ។ បន្ទាប់ពីមានការរិះគន់យ៉ាងខ្លាំង មិត្តស្រីរបស់កីឡាករ Zhang បានលុបការបង្ហោះចេញពីគណនី Weibo របស់នាងតែម្តង។

គួរបញ្ជាក់ថា Guangzhou Loong Lions គឺជាក្លិបបាល់បោះមានមូលដ្ឋាននៅក្នុងទីក្រុងក្វាងចូវ ខេត្តក្វាងទុង ត្រូវបានបង្កើតឡើងក្នុងឆ្នាំ ២០០០ ដោយប្រកួតនៅក្នុងក្របខណ្ឌនៃសមាគមកីឡាបាល់បោះចិន។ ជាធម្មតាបណ្តាក្រុមបាល់បោះក្នុងប្រទេសចិន បានហាមកីឡាករពួកគេមិនឱ្យនាំអ្នកក្រៅ រួមទាំងមិត្តស្រីចូលទៅក្នុងសយនដ្ឋានក្រុម ជាពិសេសនៅយប់មុនការប្រកួត។ ប៉ុន្តែកីឡាករ Zhang Xingliang កម្ពស់១.៨៧ម៉ែត្រ និងទម្ងន់ ៨៤គីឡូក្រាម ដែលកំពុងស្ថិតក្នុងការប្រកួតរដូវកាលទីពីររបស់ខ្លួនជាមួយក្រុម Guangzhou Loong Lions ប្រែជាហ៊ានបំពានច្បាប់ដ៏តឹងរ៉ឹងនេះ ដោយប្រើប្រាស់វ៉ាលីលាក់មិត្តស្រីខ្លួន ដើម្បីរួចផុតពីការត្រួតពិនិត្យ៕