រាជធានីភ្នំពេញ ប្តីប្រពន្ធមួយគូជាសន្តិសុខដូចគ្នា បានឈ្លោះប្រកែកគ្នា ពេលប្តីផឹកស៊ីស្រវឹង ក៏បានប្រតាយប្រតប់គ្នាទៅវិញទៅមក និងហែកសម្លៀកបំពាក់ប្រពន្ធទាំងខោទាំងអាវ ត្រូវបានបងប្អូនប្រជាពលរដ្ឋនៅកន្លែងកើតហេតុរកសម្លៀកបំពាក់មកប្តូរឱ្យស្ត្រីជាប្រពន្ធភ្លាមៗ ។

ហេតុការណ៍ខាងលើនេះ​ បាន​បង្កអោយមានការភ្ញាក់ផ្អើលកាលពីវេលាម៉ោង៧យប់ថ្ងៃទី៨ខែមករាឆ្នាំ២០២៥ នៅចំណុចការាស់សាំងតូតាល់ ទល់មុខបន្ទាយទាហាន៩៩ ផ្លូវ២០០៤ ស្ថិតនៅសង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។

តាមប្រភពពត៌មានពីបងប្អូនប្រជាពលរដ្ឋនៅកន្លែងកើតហេតុបានឱ្យដឹងថា នៅមុនពេលកើតហេតុ គេឃើញ​ស្ត្រីជាប្រពន្ធ ជិះកង់មកម្តុំការាស់សាំងតូតាល់ បន្ទាប់មកគេ​ឃើញបុរស​​ម្នាក់​ជិះម៉ូតូមួយគ្រឿង​ម៉ាកស្មាស បានជួបគ្នានៅការាស់សាំងតូតាល់ខាងលើ ហើយបានជជែកគ្នាទៅវិញទៅមក នឹងឈានដល់ការ​ប្រតាយប្រតប់គ្នាទៅវិញទៅមក ។ ចំណែកបុរសរូបនោះ​បានហែកសម្លៀកបំពាក់ប្រពន្ធឲ្យរហែក តែត្រូវបានបងប្អូនប្រជាពលរដ្ឋនាំគ្នាយកសម្លៀកបំពាក់មកប្តូរឱ្យស្ត្រីជាប្រពន្ធ​វិញភ្លាមៗផងដែរ​ ។

តាមប្រភពដដែលបានបន្តថា លុះ​មួយសន្ទុះក្រោយមក ដោយមានកំលាំងនគរបាលប៉ុស្តិ៍បានមកដល់កន្លែងកើតហេតុសួរនាំភាគីទាំងសងខាងដឹងថាជាប្តីប្រពន្ធ​នឹងគ្នា​ ដោយសារប្តី​ប្រច័ណ្ឌប្រពន្ធ ហើយ​ប្រពន្ធ​ហាមប្តីមិនឲ្យផឹកស្រា បែរជាប្តីមកឈ្លោះប្រកែកជាមួយ​ប្រពន្ធ​រហូត​ដល់ថ្នាក់ប្រើអំពើហិង្សាគំរាម​ស្ត្រីជាប្រពន្ធ​ទៀតផង។

ក្រោយពេលកើតហេតុ នគរបាលប៉ុស្តិ៍បាននាំប្តីប្រពន្ធខាងលើយកទៅសួរនាំនៅប៉ុស្តិ៍នគរបាល ដើម្បីណែនាំបុរសជាប្តីកុំអោយប្រើអំពើហិង្សា​ទៅលើ​ប្រពន្ធទៀត រួចហើយអនុញ្ញាត​ឲ្យប្តីប្រពន្ធនេះត្រឡប់ទៅផ្ទះវិញ​ ៕