រាជធានីភ្នំពេញ ៖ ផ្ទះឈើតូចមួយនៅតាមបណ្តោយផ្តូវជាតិលេខ៦A ម្តុំចំណុចស្ពានទី៦ ស្ថិតក្នុងក្រុមទី២៨ ភូមិបាក់ខែងលើ សង្កាត់បាក់ខែង ខណ្ឌឫស្សីកែវ ត្រូវអគ្គិភ័យឆាបឆេះសន្ធោសន្ធៅអស់ទាំងស្រុងបណ្តាលឱ្យតក់ស្លុត និងភ្ញាក់ផ្អើលកាលពីវេលាម៉ោង៣និង៤០នាទីថ្ងៃទី២៦ មិថុនា ២០១១
រាជធានីភ្នំពេញ ៖ ផ្ទះឈើតូចមួយនៅតាមបណ្តោយផ្តូវជាតិលេខ៦A ម្តុំចំណុចស្ពានទី៦ ស្ថិតក្នុងក្រុមទី២៨ ភូមិបាក់ខែងលើ សង្កាត់បាក់ខែង ខណ្ឌឫស្សីកែវ ត្រូវអគ្គិភ័យឆាបឆេះសន្ធោសន្ធៅអស់ទាំងស្រុងបណ្តាលឱ្យតក់ស្លុត និងភ្ញាក់ផ្អើលកាលពីវេលាម៉ោង៣និង៤០នាទីថ្ងៃទី២៦ មិថុនា ២០១១ ខណៈរថយន្តពន្លត់អគ្គិភ័យទៅបង្ក្រាបភ្លើងមិនបានទាន់ពេលវេលា…គឺរថយន្តពន្លត់អគ្គិភ័យមួយគ្រឿងបានទៅដល់កន្លែងកើតហេតុផងដែរ ប៉ុន្តែភ្លើងបានលេបត្របាក់ផ្ទះឈើអ្នកក្រីក្រនេះអស់បាត់ទៅហើយ សមត្ថកិច្ចបានត្រឹមទៅមើលផេះផង់តែប៉ុណ្ណោះ។
ផ្ទះដែលត្រូវភ្លើងឆាបឆេះអស់គ្មានសល់នេះ មានទំហំ៤ម៉ែត្រគុណ៦ម៉ែត្រ ជញ្ជាំងឈើប្រក់ដំបូលស័ង្កសី ស្ថិតនៅរាងដាច់ឆ្ងាយពីគេបន្តិច ដូច្នេះហើយទើបមិនមានការរាលដាលទៅដល់ផ្ទះអ្នកភូមិដទៃទៀត និងក៏ពុំមាននរណារងរបួសរលាកនោះទេ។ ម្ចាស់ផ្ទះឈ្មោះអាត ពេជ្រ អាយុ២៨ឆ្នាំ ជាមនុស្សវិកលចរិត ប៉ុន្តែអ្នកខ្លះថា គាត់ប្រើប្រាស់គ្រឿងញៀនធ្ងន់ធ្ងរ ទើបទៅជាបែបនេះ ។ បុរសអាត ពេជ្រ រស់នៅក្នុងផ្ទះខាងលើ នេះតែម្នាក់ឯងប៉ុណ្ណោះ ព្រោះឪពុកម្តាយស្លាប់ចោលអស់ហើយ និងគ្មានសាច់ញាតិរស់នៅជាមួយទេ។
ពេលអណ្តាតភ្លើងចាប់ផ្តើមឆាបឆេះ បុរសឈ្មោះអាត ពេជ្រ បានរត់ចេញមកក្រៅស្រែកប្រាប់គេថា ភ្លើងឆេះផ្ទះខ្ញុំហើយៗ! រួចហើយក៏រត់ទៅណាបាត់តែម្តងទៅ ខណៈមូលហេតុនៃការឆេះនេះមិនត្រូវបានគេដឹងពិតប្រាកដនៅឡើយ ហើយផ្ទះនេះមិនមានសម្ភារ និងវត្ថុមានតម្លៃទេ ៕
ចែករំលែកព័តមាននេះ