ខេត្ត​ព្រៃវែង ៖ ក្មេងទំនើងចំនួន 6 នាក់ ដែលជាសមាជិកក្រុម PS ត្រូវបានកម្លាំងកងរាជអាវុធហត្ថខេត្ត ព្រៃវែង ចាប់ឃាត់ខ្លួនកសាងសំណុំរឿងទៅតាមនីតិវិធី ដោយសារតែពួកគេបានធ្វើសកម្មភាពដេញកាប់ទៅលើក្មេងៗមួយក្រុមផ្សេងទៀត។

លោកវរៈសេនីយ៍ទោ ផាត់ សុជោត ប្រធានមន្ទីរស្រាវជ្រាវ និងបង្ក្រាបបទល្មើស កងរាជអាវុធហត្ថខេត្តព្រៃវែង បានឲ្យដឹងថា នៅវេលាម៉ោង 3 និង 40 នាទីរសៀល ថ្ងៃទី 30ធ្នូ មានក្មេងប្រុសម្នាក់ឈ្មោះ ចិន មុនីវឌ្ឍនៈ អាយុ 15 ឆ្នាំ បានមកប្ដឹងកម្លាំងកងរាជអាវុធហត្ថស្រុកពាមរក៍ថា មានក្មេងទំនើងមួយក្រុម កំពុងដេញកាប់រូបគេនិងមិត្តភក្តិ នៅចំណុចតារាងបាល់ទាត់ សុ កញ្ញា ក្នុងភូមិឧត្តមឃុំព្រែកខ្សាយ(ក) ស្រុកពាមរក៍។ ក្រោយទទួលបានព័ត៌មាននេះភ្លាម រូបលោកក៏បានដឹកនាំកម្លាំងចុះទៅដល់ទីតាំងកើតហេតុភ្លាមៗ និងធ្វើការចាប់ឃាត់ខ្លួនក្រុមក្មេងទំនើងបានចំនួន 6 នាក់ រួមជា មួយនឹងកាំបិតតាំងតោមួយ ដែលជាវត្ថុតាម។

ដោយឡែក តាមចម្លើយរបស់ក្មេងទំនើងក្រុម PS ដែលត្រូវបានចាប់ឃាត់ខ្លួន បានអះអាងថា នៅ មុនពេលកើតហេតុនោះ រូបគេនឹងមិត្តភក្កិបួនប្រាំនាក់កំពុងលេងទាត់បាល់សុខៗ ស្រាប់តែក្មេងទំនើងក្រុម ZT ដែលជាអ្នកប្ដឹង និងជាសត្រូវចាស់ មានគ្នាជិត 10 នាក់ បានចូលមករកវាយពួកគេ ទើបពួកគេទូរសព្ទ័ហៅបក្សពួកមកថែម និងបានយកកាំបិតមកដេញកាប់ក្រុម ZT នោះវិញ តែកាប់មិនត្រូវនោះទេ ហើយបន្តិចក្រោយមកក៏មានកម្លាំងអាវុធហត្ថចុះមកចាប់ឃាត់ខ្លួនពួកគេតែម្ដង ៕