ខេត្តព្រះសីហនុ ៖ ហាងលក់ម៉ូតូមួយកន្លែង មានទីតាំងនៅតាមដងវិថីលេខ៧០១ (ផ្លូវវត្តជោត្តញ្ញាណហៅវត្តលើ) ស្ថិតក្នុងភូមិ៣ សង្កាត់លេខ១ ក្រុងព្រះសីហនុ បានយកចំណីផ្លូវក្រាលឥដ្ឋការ៉ូឡា ដែលជាផ្លូវសម្រាប់អ្នកថ្មើរជើង…
ខេត្តព្រះសីហនុ ៖ ហាងលក់ម៉ូតូមួយកន្លែង មានទីតាំងនៅតាមដងវិថីលេខ៧០១ (ផ្លូវវត្តជោត្តញ្ញាណហៅវត្តលើ) ស្ថិតក្នុងភូមិ៣ សង្កាត់លេខ១ ក្រុងព្រះសីហនុ បានយកចំណីផ្លូវក្រាលឥដ្ឋការ៉ូឡា ដែលជាផ្លូវសម្រាប់អ្នកថ្មើរជើង ធ្វើជាកន្លែងដាក់តាំងម៉ូតូលក់ជាប្រចាំ ដោយមិនខ្វល់ ឬកោតក្រែងពីផលប៉ះពាល់ដល់សណ្ដាប់ធ្នាប់សាធារណៈឡើយ ។
ប្រជាពលរដ្ឋនៅក្នុងមូលដ្ឋានខាងលើ បានសម្តែងការមិនសប្បាយចិត្ត និងលើកឡើងថា រដ្ឋបាលខេត្តបានខិតខំរៀបចំក្រាលឥដ្ឋការ៉ូឡាចិញ្ចើមផ្លូវទាំងសងខាងទុកសម្រាប់ជាផ្លូវថ្មើរជើងឲ្យប្រជាពលរដ្ឋហាត់ប្រាណ ។
កន្លងមក នៅពេលព្រឹកឬពេលល្ងាច ពួកគាត់តែងតែនាំគ្នាដើរហាត់ប្រាណតាមដងវិថីនេះជារៀងរាល់ថ្ងៃ ប៉ុន្តែមួយរយៈពេលថ្មីៗនេះ ម្ចាស់ហាងលក់ម៉ូតូខាងលើ បានយកម៉ូតូមកដាក់តាំងលក់ធ្វើអាជីវកម្មនៅលើចិញ្ចើមផ្លូវក្រាលឥដ្ឋការ៉ូឡាបិទផ្លូវថ្មើរជើងអស់តែម្តង ។
ប្រជាពលរដ្ឋបានរិះគន់ចំៗទៅអាជ្ញាធរភូមិ សង្កាត់ និងក្រុងព្រះសីហនុ ក៏ដូចជានគរបាលការិយាល័យសណ្តាប់ធ្នាបខេត្តថា មិនអើពើរៀបចំសណ្តាប់ធ្នាប់នៅតាមដងផ្លូវសាធារណៈ ដើម្បីបង្កើនសោភ័ណភាពទីក្រុង នៅក្នុងឱកាសដែលថ្ងៃបុណ្យឆ្លងឆ្នាំកាន់តែខិតជិតចូលមកដល់នាពេលដ៏ខ្លីខាងមុខនេះ ។
ដោយឡែក លោកវរសេនីយ៍ឯក រស់ រេននាយការិយាល័យនគរបាលសណ្តាប់ធ្នាប់ខេត្ត ក៏ដូចជាអាជ្ញាធរមូលដ្ឋានគ្រប់លំដាប់ថ្នាក់ អ្នកយកព័ត៌មានយើងមិនអាចធ្វើទំនាក់ទំនងបានទេ គិតត្រឹមថ្ងៃទី២៥ ខែធ្នូ ឆ្នាំ២០២៤ ដោយការហៅទូរស័ព្ទចូលតែមិនមានអ្នកទទួល ៕
ចែករំលែកព័តមាននេះ