​ឥណ្ឌា ៖ ពោតផ្ទុះ (Popcorn) គឺជាអាហារសម្រន់ដ៏ពេញនិយមបំផុត ពិសេស ពេលទស្សនាខ្សែភាពយន្តទាំងនៅផ្ទះ​ និងតាមរោងកុន ។ ទោះយ៉ាងណា កាលពីថ្មីៗនេះ អាហារសម្រន់ដ៏ពេញនិយមនេះ​បានក្លាយជាចំណុចដ៏ក្តៅលើការពិភាក្សា និងមតិរិះគន់ដូចទឹកបាក់ទំនប់ក្នុងប្រទេសឥណ្ឌា ក្រោយ​រដ្ឋមន្ត្រីហិរញ្ញវត្ថុប្រទេសនេះ បានប្រកាសពីការយកពន្ធលើពោតផ្ទុះក្នុងអត្រាខុសៗគ្នា ។ នេះបើតាមប្រភពពីសារព័ត៌មាន Times of India ចេញផ្សាយកាលពីថ្ងៃទី២៣ ខែធ្នូ ឆ្នាំ២០២៤ ។

នៅក្នុងកិច្ចប្រជុំលើកទី៥៥​នៃក្រុមប្រឹក្សាពន្ធលើទំនិញ និងសេវាកម្មរបស់ប្រទេសឥណ្ឌា ហៅកាត់ថា GS​T ដឹកនាំដោយរដ្ឋមន្ត្រីហិរញ្ញវត្ថុ លោកស្រី Nirmala Sitharaman បានប្រកាសពីការយកពន្ធលើពោតផ្ទុះក្នុងអត្រាខុសៗគ្នា តាមប្រភេទនៃអាហារសម្រន់មួយនេះ ។ ការផ្លាស់ប្តូរដ៏ភ្ញាក់ផ្អើលនេះ ទាក់ទាញការរិះគន់ពីក្រុមប្រឆាំង និងបង្កឱ្យមានការខឹងសម្បារលើបណ្តាញសង្គម ព្រោះតែពោតផ្ទុះត្រូវបង់ពន្ធខុសៗគ្នា នៅទូទាំងបណ្តារដ្ឋរបស់ប្រទេសឥណ្ឌា ។

លើសពីនេះទៀត អតីតទីប្រឹក្សាសេដ្ឋកិច្ចរដ្ឋាភិបាលចំនួនពីររូបបានចោទសួរឱ្យបញ្ជាក់បន្ថែមទៀតពីប្រព័ន្ធ​ពន្ធ ដែលត្រូវបានណែនាំតាំងពីឆ្នាំ​២០១៧​មួយនេះផងដែរ។

GST ​ដែលដឹកនាំដោយរដ្ឋមន្ត្រីហិរញ្ញវត្ថុ រួមទាំងអ្នកតំណាងបណ្តារដ្ឋរបស់ឥណ្ឌា​បានប្រកាស កាលពីថ្ងៃសៅរ៍សប្តាហ៍មុនថា ពោតផ្ទុះគ្មានម៉ាកយីហោ (Brand) លាយជាមួយអំបិល និងគ្រឿងទេសផ្សេងទៀត ត្រូវគិតពន្ធ​៥% ពោតផ្ទុះវេចខ្ចប់មានម៉ាកយីហោត្រឹមត្រូវនោះ ត្រូវគិតពន្ធ ១២%។ ចំណែក​ពោតផ្ទុះផ្អែមការ៉ាមែល (Caramel) ​ត្រូវ​បាន​​ចាត់​ថ្នាក់​ជា​បង្អែម ដូច្នេះ ត្រូវគិតពន្ធ ១៨% ដោយពន្យល់ពីហេតុផល ក្រោយការសម្រេចចិត្តយកពន្ធខ្ពស់លើពោតផ្ទុះការ៉ាមែល លោកស្រីរដ្ឋមន្ត្រីហិរញ្ញវត្ថុថា ផលិត​ផលណាមួយមានបន្ថែមជាតិស្ករ គឺត្រូវគិតពន្ធខុសគ្នា ។

សេចក្តីប្រកាសនេះ បានបង្កព្យុះសង្ឃរាលើបណ្តាញសង្គម ដោយអ្នកនយោបាយប្រឆាំង អ្នកសេដ្ឋកិច្ច និងអ្នកគាំទ្ររដ្ឋាភិបាលនាយករដ្ឋមន្ត្រី លោក​ណារិនដ្រា ម៉ូឌី (Narendra Modi)​ បានរិះគន់យ៉ាងខ្លាំងក្លា រហូតដល់អ្នកផ្សេងទៀតថែមទាំងបង្កើតរូបថ្លុក (Meme) និងលេងសើចចំអក ចំពោះសេចក្តីប្រកាសនេះ។

ពាក់ព័ន្ធនឹងបញ្ហានេះ អ្នកនាំពាក្យក្រសួងហិរញ្ញវត្ថុ និងលេខាធិការដ្ឋានក្រុមប្រឹក្សាពន្ធលើទំនិញ និងសេវាកម្មរបស់ឥណ្ឌា មិនទាន់ឆ្លើយតបទៅនឹងសំណើសុំការអត្ថាធិប្បាយលើភាពចម្រូងចម្រាសមនេះ នៅឡើយទេ ៕ ប្រភព ៖ Times of India, Hindustan Times និង Reuters