វៀតណាម! ត្រៀមទទួលព្យុះថ្មី ជាកាដូថ្ងៃគ្រឹស្តម៉ាស់ !
វៀតណាម ៖ ព្យុះត្រូពិចមួយត្រូវបានគេព្យាករណ៍ថា នឹងវិវត្តន៍ខ្លួនទៅជាព្យុះលេខ១០ កំពុងបោកបក់ខិតជិតប្រជុំកោះ Spratly ឬ Truong Sa របស់វៀតណាម…
វៀតណាម ៖ ព្យុះត្រូពិចមួយត្រូវបានគេព្យាករណ៍ថា នឹងវិវត្តន៍ខ្លួនទៅជាព្យុះលេខ១០ កំពុងបោកបក់ខិតជិតប្រជុំកោះ Spratly ឬ Truong Sa របស់វៀតណាម ត្រូវបានព្រមានថា នឹងបើកការវា.យប្រហារលើបណ្តាខេត្តជាច្រើន តាមបណ្តោយឆ្នេរសមុទ្រខាងកើតរាប់ចាប់ពីខេត្ត Phu Yen ដល់ខេត្ត Ca Mau រួមទាំងពីទីក្រុងហូជីមិញនឹងទើបប្រទះនូវខ្យល់បោកបក់ រួមទាំងភ្លៀងធ្លាក់ខ្លាំងជោគជាំ ជាពិសេសនៅរាត្រី ថ្ងៃពុធ ទី២៥ ខែធ្នូ ឆ្នាំ២០២៤ ដែលជាថ្ងៃបុណ្យគ្រឹស្តម៉ាស់ ។
យោងតាមនាយកដ្ឋានឧតុនិយមវៀតណាម បានឲ្យដឹងថា នៅវេលាម៉ោង១ ៖ ០០ រំលងអធ្រាត្រ ថ្ងៃទី២៣ ធ្នូ ចំណុចកណ្តាលនៃព្យុះត្រូពិច ស្ថិតនៅលើប្រជុំកោះ Truong Sa ហើយចំណុចកណ្តាលនៃព្យុះស្ថិតក្នុងកម្រិត ៧ដោយមានល្បឿនខ្យល់ ចាប់ពី៥០ទៅ៦១គីឡូម៉ែត្រក្នុងមួយម៉ោង ហើយរំកិលខ្លួនកាន់តែកៀកដីគោគ ក្នុងល្បឿនពី២០ទៅ២៥ គីឡូម៉ែត្រក្នុងមួយម៉ោង ។
តាមរយៈការព្យាករណ៍ក្នុងរយៈពេល២៤ម៉ោងបន្ទាប់ខ្យល់ព្យុះត្រូពិចមួយនេះនឹងវិវត្តន៍ខ្លួនទៅជាព្យុះទីហ្វុងទី១០ ដែលវា.យប្រហារសមុទ្រខាងកើតវៀតណាម ប្រចាំឆ្នាំ២០២៤ ។ ជាពិសេសនៅម៉ោងប្រហែល ១រំលងអាធាត្រឈានចូលដល់ថ្ងៃទី២៥ ខែធ្នូ ខ្យល់ព្យុះនេះអាចនឹងបង្កើនកម្លាំងបោកបក់ពីកម្រិត៨ ដល់កម្រិតលេខ១០ ដែលបង្កើតឱ្យមានរលកខ្ពស់ៗពី៤ ទៅ៦ម៉ែត្រ ។
ដោយសារឥទ្ធិពលនៃព្យុះខាងលើការព្យាករណ៍ពីកម្រិតភ្លៀងធ្លាក់ខ្លាំងនឹងកើតមាននៅតំបន់ខ្ពង់រាបភាគកណ្តាល និងតំបន់កណ្តាល ខណៈបច្ចុប្បន្នតំបន់ទាំងនេះកំពុងមានទឹកភ្លៀងធ្លាក់រាយប៉ាយស្រាប់ ។ ជាពិសេស នៅក្នុងអំឡុងពេលថ្ងៃ និងពេលរាត្រីនៃពិធីបុណ្យគ្រឹស្តម៉ាស់ នាថ្ងៃទី២៥ ធ្នូ តំបន់កណ្តាលភាគខាងត្បូងប្រទេសវៀតណាមក៏ដូចជាតំបន់ខ្ពង់រាបភាគខាងកើតនឹងមានភ្លៀងធ្លាក់ពីបង្គួរទៅច្រើនដោយកន្លែងខ្លះមានភ្លៀងធ្លាក់ខ្លាំងបូករួមជាមួយបាតុភូតផ្គរ រន្ទះ ដោយមានភ្លៀងធ្លាក់ដល់ទៅជាង១៥០មីលីម៉ែត្រនៅតំបន់ខ្លះ ។ លុះចប់បុណ្យអូណែល ពោល គឺចាប់ថ្ងៃទី២៦ ធ្នូ ទើបបរិមាណទឹកភ្លៀងនឹងថមថយចុះជាបណ្តើរៗ ។
គួរកត់សម្គាល់ថា តាំងពីដើមឆ្នាំ មកទល់នឹងបំណាច់ឆ្នាំ២០២៤នេះ សមុទ្រខាងកើតវៀតណាម បានរងការវា.យប្រហារផ្ទួនៗជាប់ៗគ្នាដោយសារសារខ្យល់ព្យុះត្រូពិក និងព្យុះទីហ្វូងសរុបចំនួន១០ក្នុងចំណោមនោះមានដូចជា ព្យុះព្រះភិរុណ, ព្យុះយ៉ាក់ជី, ព្យុះស៊ូលីក,ព្យុះត្រាមី និងព្យុះយិនស៊ីង ដែលបានលុកលុយចូលដល់តំបន់ដីគោកជាមួយកម្លាំងយ៉ាងបំផ្លិញបំផ្លាញជាដំណំ ។
ជាក់ស្តែង ព្យុះទីហ្វុងយ៉ាក់ជី ដែលបានបោកបក់នៅភាគខាងជើង ដែលប៉ះពាល់ដល់ទីក្រុង និងខេត្តសរុប២៥ រួមទាំងទីក្រុងហាណូយ បានធ្វើអោយតំបន់ទេសចរណ៍ក៏ដូចជា មជ្ឈមណ្ឌលឧស្សាហកម្មជាច្រើនសន្ធឹកសន្ធាប់រងការខូចខាតស្មើនឹងទឹកប្រាក់ខ្ទង់ពាន់លានដុល្លារ ។ ព្យុះជាបន្តបន្ទាប់នាំមកនូវទឹកជំនន់ធ្ងន់ធ្ងរ និងការបាក់ដីតូចធំរាប់សិបកន្លែង នាឆ្នាំ២០២៤នេះបានបណ្តាលឲ្យប្រជាជនវៀតណាមប្រមាណ៥១៣នាក់ស្លា.ប់ និងបាត់ខ្លួនជាមួយនឹងការខាតបង់សេដ្ឋកិច្ច សរុបប៉ាន់ស្មានថា មានចំនួន៨៤.៩ពាន់ពាន់លានដុង ឬស្មើនឹង ៣ពាន់ ៣រយ៣០លានដុល្លារអាមេរិក ៕
ចែករំលែកព័តមាននេះ