ទីក្រុងប៊ែឡាំង៖ អធិការបតីអាល្លឺម៉ង់អំពាវនាវដាច់ខាតកុំប៉ះគ្នាឱ្យសោះរវាងអង្គការណាតូ និងកងទ័ពរុស្ស៊ី។ លោកអូឡាហ្វ សូលយល់ថាធ្វើម៉េចត្រូវតែទប់ស្កាត់ឱ្យបាននូវការឡើងកម្ដៅយោធារវាងក្រុមទាំង២នេះដើម្បីសេចក្ដីសុខរៀងៗខ្លួន។ លោកថ្លែងដូច្នេះនៅពេលអញ្ជើញទៅចូលរួមកិច្ចប្រជុំក្រៅផ្លូវការស្ដីពីបញ្ហាអ៊ុយក្រែន។ នៅក្នុងអង្គប្រជុំនោះ គេឃើញថ្នាក់ដឹកនាំប្រទេសសមាជិកធំៗរបស់អង្គការណាតូសុទ្ធតែមានវត្តមាននៅទីនោះ។
កិច្ចប្រជុំនេះរៀបចំឡើងនៅពេលថ្នាក់ដឹកនាំទាំងនោះចូលរួមកិច្ចប្រជុំកំពូលរវាងសហភាពអឺរ៉ុប និងបណ្ដារដ្ឋនៅតំបន់បាល់កង់ (Balkans) ហើយក៏ឆ្លៀតជួបគ្នាជាលក្ខណៈឆក់កណ្ដៀតតែម្ដងទៅ។ ចំពោះសំណួររបស់អ្នកសារព័ត៌មានដែលថាតើលោកសូលនៅតែមានជំនឿថាការពិគ្រោះគ្នាអំពីគម្រោងបញ្ចូនកងរក្សាសន្តិភាពទៅអ៊ុយក្រែនជារឿងមិនសមរម្យដែរឬទេ? លោកឆ្លើយតបថាអ្វីៗត្រូវតែធ្វើឡើងទៅតាមលំដាប់លំដោយ មានន័យថាត្រូវតែធ្វើឡើងដោយសម្លឹងមើលកាលៈទេសៈជាមុនសិន។
ជាបឋម លោកសូលយល់ថាអ៊ុយក្រែនត្រូវតែបញ្ជាក់ជំហរ និងគោលបំណងរបស់ខ្លួនឱ្យបានច្បាស់ត្រង់ចំណុចដែលថាតើខ្លួនចង់បានកងរក្សាសន្តិភាពទៅឈរជើងនៅលើទឹកដីរបស់ខ្លួននោះដើម្បីអ្វី។ បើទៅដើម្បីស្វែងរកដំណោះសន្តិភាពជារឿងល្អ។ ប៉ុន្តែលោកយល់ថាផែនការសន្តិភាពសម្រាប់អ៊ុយក្រែនមិនគួរជាសន្តិភាពតាមការចង់បានរបស់ប្រទេសដទៃនោះទេ។
លោកសូលសង្កត់ធ្ងន់ថាលោកចង់មានកិច្ចសហការគ្នាយ៉ាងល្អជាមួយលោកត្រាំដែលអាចនឹងស្វះស្វែងរកដំណោះស្រាយណាមួយជាមួយប្រធានាធិបតីរុស្ស៊ី លោកពូទីន ដើម្បីបញ្ចប់ជម្លោះនៅអ៊ុយក្រែន។ លោកសូលនឹងជួបថ្នាក់ដឹកនាំរដ្ឋជាសមាជិកសហភាពអឺរ៉ុប និងអគ្គលេខាធិការអង្គការណាតូ លោកម៉ាករ៉ាត់ (Mark Rutte) ដើម្បីពិភាក្សាគ្នាក្រៅផ្លូវការអំពីបញ្ហាអ៊ុយក្រែន៕
ចែករំលែកព័តមាននេះ