ខេត្តព្រៃវែង ៖ ផ្លូវបេតុងដ៏ថ្មីស្រឡាង១ខ្សែ ដែលទើបសាងសង់រួច មិនទាន់ទាំងបានសម្ពោធដាក់ឲ្យប្រើប្រាស់ផង ពេលនេះ បានបាក់ស្រុកដីជើងទេ ផ្លូវនៅសល់តែផ្ទាំងបេតុងតួផ្លូវ ត្រូវអណ្ដែតលើវេហា ជាហេតុធ្វើឲ្យប្រជាពលរដ្ឋពីភូមិ…
ខេត្តព្រៃវែង ៖ ផ្លូវបេតុងដ៏ថ្មីស្រឡាង១ខ្សែ ដែលទើបសាងសង់រួច មិនទាន់ទាំងបានសម្ពោធដាក់ឲ្យប្រើប្រាស់ផង ពេលនេះ បានបាក់ស្រុកដីជើងទេ ផ្លូវនៅសល់តែផ្ទាំងបេតុងតួផ្លូវ ត្រូវអណ្ដែតលើវេហា ជាហេតុធ្វើឲ្យប្រជាពលរដ្ឋពីភូមិ គឺភូមិព្រែកចាម និងភូមិព្រែករាំង កំពុងមានការព្រួយបារម្ភជាខ្លាំង ។
ផ្លូវបេតុងមួយខ្សែនេះ មានបណ្ដោយប្រវែង ២,០២០ម៉ែត្រ និងទទឹង ៩ម៉ែត្រ តភ្ជាប់ពីផ្លូវជាតិលេខ១១ ត្រង់ចំណុចកែងវត្តព្រែកខ្សាយ ចាក់រហូតទៅដល់ខាងមុខវត្តព្រែកចាម ក្នុងឃុំបន្លិចប្រាសាទ នៃស្រុកពាមរក៍ ខេត្តព្រៃវែង ។
ប្រជាពលរដ្ឋភូមិព្រែកចាម និងភូមិព្រែករាំង បានរៀបរាប់ដូចគ្នាថា ផ្លូវបេតុងមួយខ្សែនេះ គឺមានសារៈសំខាន់ខ្លាំងណាស់ សម្រាប់ជីវភាពរស់នៅរបស់ពួកគាត់ គឺវាជួយសម្រួលក្នុងការដឹកជញ្ជូនកសិផល ទៅកាន់ទីផ្សារ សិស្សធ្វើដំណើរទៅរៀនសូត្រ និងជាពិសេសសម្រាប់អ្នកជំងឺ ដែលឈើស្កាត់ពេលយប់ព្រលប់ជាដើម ។
ពលរដ្ឋទាំងពីរភូមិនេះ បានបញ្ជាក់ថា ពេលដែលផ្លូវបេតុងនេះ ត្រូវបានសាងសង់រួចភ្លាម ពួកគាត់សប្បាយរីករាយខ្លាំងណាស់ ជិះកង់ម៉ូតូឆ្លងកាត់ផ្លូវនេះញញឹមបិទមាត់មិនជិតទេ ប៉ុន្តែឥឡូវមិនទាន់បានប៉ុន្មានផង ស្រាប់តែឃើញដីជើងទេសងខាងផ្លូវនេះ បាក់ស្រុតអស់នៅសល់ផ្ទាំងបេតុងនៅកណ្ដាលវាល ទើបធ្វើឲ្យពួកគាត់ព្រួយបារម្ភ ខ្លាចផ្លូវនេះបាក់ស្រុតខូចទៅវិញ ។
លោក កង សុខាន់ មេឃុំបន្លិចប្រាសាទ បានឲ្យ ដឹងថា ផ្លូវបេតុងនេះជាអំណោយរបស់រាជរដ្ឋាភិបាល ដែលបានចាប់ផ្ដើមសាងសង់កាលពីអំឡុងដើមខែមីនា និងបានបញ្ចប់ការសាងសង់ នៅក្នុងអំឡុងចុងខែវិច្ឆិកា ឆ្នាំ២០២៤ ហើយមកដល់ពេលនេះ មិនទាន់ត្រូវបានធ្វើពិធីសម្ពោធនៅឡើយទេ ។
លោកមេឃុំ បានបញ្ជាក់ថា ផ្លូវបេតុងនេះ ពិតជាមានការបាក់ស្រុតដីជើងទេ អមសងខាងផ្លូវ ពិតមែន។ ហើយលោកក៏បានរាយការណ៍ទៅក្រុមហ៊ុនទទួលម៉ៅការ ធ្វើផ្លូវនេះរួចហើយដែរ ដោយខាងក្រុមហ៊ុន បានអះអាងថា នៅពេលដែលគោកទឹកដីស្ងួតអស់ ខាងក្រុមហ៊ុននិងធ្វើការចាក់ដីជួសជុលជើងទេ ទាំងអស់នេះឡើងវិញហើយ ប៉ុន្តែលោកក៏មិនដឹងថា ខាងក្រុមហ៊ុនម៉ៅការនេះ គេទទួលជួសជុលថែទាំឲ្យបានប៉ុន្មានឆ្នាំ នោះទេ? ៕
ចែករំលែកព័តមាននេះ