រាជធានីភ្នំពេញ ៖ យុវជនម្នាក់ បានជិះម៉ូតូ១គ្រឿង ជ្រុលទៅបុកចំកាងក្រោយរថយន្តម៉ាក ហាយឡែនឌ័រ មិនចាំស្លាកលេខ ១គ្រឿង ដែលកំពុងបើកឆ្លងផ្លូវពេញទំហឹង បណ្តាលឲ្យរងរបួសស្ទើរដាច់ប្រអប់ជើងខាងឆ្វេង…
រាជធានីភ្នំពេញ ៖ យុវជនម្នាក់ បានជិះម៉ូតូ១គ្រឿង ជ្រុលទៅបុកចំកាងក្រោយរថយន្តម៉ាក ហាយឡែនឌ័រ មិនចាំស្លាកលេខ ១គ្រឿង ដែលកំពុងបើកឆ្លងផ្លូវពេញទំហឹង បណ្តាលឲ្យរងរបួសស្ទើរដាច់ប្រអប់ជើងខាងឆ្វេង ហើយរថយន្តនោះ ក៏បានបើកទៅបាត់ស្រមោល តែម្ដង ។
ឧប្បត្តិហេតុនោះបានកើតឡើងកាលពីវេលាម៉ោង១០និង២៥នាទីព្រឹកថ្ងៃទី១៣ ខែធ្នូ ឆ្នាំ២០២៤ នៅតាមមហាវិថីសហព័ន្ធរុស្ស៊ី ត្រង់ចំណុចមុខហាងបាញ់ឆែវឆ្ងាញ់ ស្ថិតនៅក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
សាក្សីម្នាក់បាននិយាយថា នៅមុនពេលកើតហេតុ ខណៈដែលគាត់កំពុងដើរតាមផ្លូវជាប់របងអាកាសយានដ្ឋានអន្តរជាតិភ្នំពេញ បានឃើញយុវជនរងគ្រោះ ជិះម៉ូតូ ១គ្រឿង ម៉ាកហុងដាឌ្រីមសេ១២៥ ស៊េរីឆ្នាំ២០២០ ពណ៍ខ្មៅ ពាក់ស្លាកលេខភ្នំពេញ 1IL-7352 ធ្វើដំណើរតាមបណ្តោយមហាវិថីសហព័ន្ធរុស្ស៊ី ក្នុងទិសដៅពីជើងទៅត្បូង លឿនគួរសមដែរ លុះពេលទៅដល់ត្រង់ចំណុចកើតហេតុ បានវាក់ជាមួយរថយន្ត ១គ្រឿង ម៉ាកហាយឡែនឌ័រ មិនចាំស្លាកលេខ ដែលកំពុងបើកបរចេញពីផ្លូវបេតុងភូមិព្រៃជីសាក់ ក្នុងទិសដៅពីលិចទៅកើតឆ្លងមហាវិថីសហព័ន្ធរុស្ស៊ី ។
សាក្សីរូបនោះ បានប្រាប់ឲ្យដឹងបន្តទៀតថា ខណៈនោះ គេចចេញអត់ទាន់ ជាន់ហ្វ្រាំងឈប់ក៏អត់ទាន់ ក៏ជ្រុលទៅបុកចំកាងក្រោយរថយន្តខាងលើយ៉ាងពេញទំហឹង បណ្ដាលឲ្យដួលបោកផ្ទប់ថ្នល់រងរបួសស្ទើរតែដាច់ប្រអប់ជើងតែម្ដង ។ ក្រោយពេលកើតហេតុរថយន្តខាងលើ បានបើកចេញទៅបាត់ស្រមោល ។ បន្ទាប់មករថយន្តសង្គ្រោះមន្ទីរពេទ្យ បង្អែកពោធិ៍ចិនតុង បានដឹកយកយុវជនរងគ្រោះទៅសង្គ្រោះបន្ទាន់ នៅមន្ទីរពេទ្យព្រះកុសុមៈ ។ ចំណែកនគរបាល បានចុះទៅកាន់ទីនោះ ហើយបាននាំយកម៉ូតូទៅរក្សាទុកប៉ុស្តិ៍នគរបាលចោមទី៣ រង់ចាំឲ្យក្រុមគ្រួសារយកឯកសារទៅទទួលយកវិញ ៕
ចែករំលែកព័តមាននេះ