រាជធានីភ្នំពេញ ៖ លោក ម៉ប់ សារិន ប្រធានក្រុមប្រឹក្សារាជធានីភ្នំពេញ បានថ្លែងក្នុងពិធីបើកវេទិកាផ្សព្វផ្សាយ និងពិគ្រោះយោបល់របស់ក្រុម ប្រឹក្សារាជធានីភ្នំពេញ អាណត្តិទី៤ នៅខណ្ឌព្រែកព្នៅ…
រាជធានីភ្នំពេញ ៖ លោក ម៉ប់ សារិន ប្រធានក្រុមប្រឹក្សារាជធានីភ្នំពេញ បានថ្លែងក្នុងពិធីបើកវេទិកាផ្សព្វផ្សាយ និងពិគ្រោះយោបល់របស់ក្រុម ប្រឹក្សារាជធានីភ្នំពេញ អាណត្តិទី៤ នៅខណ្ឌព្រែកព្នៅ នាថ្ងៃទី១៦ ខែធ្នូ ឆ្នាំ២០២៤ថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ គឺបានផ្តល់ជូនដល់ប្រជាពលរដ្ឋ ក្នុងការចូលរួមដំណើរការអភិបាលកិច្ចល្អ និងជាឧបករណ៍មួយសម្រាប់លើកកម្ពស់ គណនេយ្យភាព តម្លាភាព ក្នុងដំណើរការពិនិត្យមើល លើការផ្តល់សេវាសាធារណៈរបស់រដ្ឋបាលរាជធានីភ្នំពេញ រដ្ឋបាលខណ្ឌ រដ្ឋបាលសង្កាត់ ។
លោកបញ្ជាក់ថា វេទិកានេះ ក្នុងគោលបំណង ដើម្បីធានាថា ៖
១-រាល់បញ្ហាអាទិភាពរបស់ប្រជាពលរដ្ឋក្នុងមូលដ្ឋាន ត្រូវបានពិនិត្យ ដោះស្រាយ និងឆ្លើយតប។
២-គ្រប់អ្នកពាក់ព័ន្ធទាំងអស់ក្នុងមូលដ្ឋាន ត្រូវបានរួមបញ្ចូលបរិយាបន្ននៅក្នុងដំណើរការនៃការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិ ។
ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ នៅខណ្ឌព្រែកព្រៅ មានប្រជាពលរដ្ឋបានឡើងមានមតិជាច្រើនបញ្ហាដូចជា ស្នើសុំអាជ្ញាធររាជធានីភ្នំពេញ ជួយចុះបញ្ជីដីធ្លីជាលក្ខណៈប្រព័ន្ធ ជូនពលរដ្ឋ ចំនួនជាង៩០គ្រួសារ ដោយកាត់ឆ្វៀលដីចេញអនុក្រឹត្យនៅតំបន់បឹងតាមោក និងចេញប័ណ្ណកម្មសិទ្ធិក្បាលដី បន្ទាប់ពីមន្ត្រីភូមិបាលបានចុះវាស់វែងដីតាំងពីឆ្នាំ២០២៣ រហូតមកដល់ឆ្នាំ២០២៤ មានរយៈពេល៩ខែមកហើយ មិនបានផ្តល់ប័ណ្ណកម្មសិទ្ធិជូនប្រជាពលរដ្ឋ, ស្នើសុំអាជ្ញាធរមូលដ្ឋានជួយពន្លឿនការដាក់លូបង្ហើយឱ្យបានរួចរាល់, ស្នើសុំឱ្យក្រុមហ៊ុនប្រមូលសំរាម ប្រមូលសំរាមឱ្យបានទៀងទាត់តាមវេលាកំណត់ព្រោះសំរាមច្រើនគរទុក ចោលច្រើនថ្ងៃហើយក្រុមអ្នករើសអេតចាយមកហែកថង់សំរាមរាយប៉ាយ, ស្នើសុំរដ្ឋាករទឹក ធ្វើការផ្លាស់ប្តូរពីឯកជន មករដ្ឋវិញ ព្រោះទឹកឯកជនមានភាពល្អក់កករ ពិបាកក្នុងការប្រើប្រាស់, និងបញ្ហាជាច្រើនទៀត ។
ឆ្លើយតបនាឱកាសនោះដែរ លោកស្រី តិមា វិច្ឆិកាល អភិបាលរង នៃគណៈអភិបាលរាជធានីភ្នំពេញ ជាតំណាងលោក ឃួង ស្រេង អភិបាល នៃគណៈអភិបាល និងជាប្រធានក្រុមការងាររាជរដ្ឋាភិបាល ចុះមូលដ្ឋានខណ្ឌព្រែកព្នៅ បានបញ្ជាក់ថា សំណួរ សំណើ និងសំណូមពរដែលប្រជាពលរដ្ឋលើកឡើងនេះ គឺសម្រាប់ឱ្យរដ្ឋបាលរាជធានីភ្នំពេញយក ទៅធ្វើការពិចារណា កែលម្អ ក្នុងការអនុវត្តសកម្មភាពរបស់ខ្លួន ដើម្បីលើកកម្ពស់គុណភាពនៃជីវភាព រស់នៅរបស់ ប្រជាពលរដ្ឋក្នុងរាជធានីភ្នំពេញ ជាពិសេស ប្រជាពលរដ្ឋក្រីក្រក្នុងមូលដ្ឋានសង្កាត់ ខណ្ឌរបស់ខ្លួនឱ្យកាន់តែមាន ភាពល្អប្រសើរ។ លោកស្រីបន្តថា ការចូលរួមផ្តល់មតិយោបល់ និងការលើកឡើង នូវសំណើ និងសំណូមពររបស់អស់លោក/លោកស្រី នាថ្ងៃនេះ គឺបាននាំមកនូវសក្តានុពលដ៏ធំធេង និងធ្វើឱ្យរដ្ឋបាលរាជធានីភ្នំពេញ អាចឆ្លុះបញ្ចាំងបាននូវចំណុចខ្វះខាត ចំណុចអសកម្ម ដែលបានអនុវត្តកន្លងមក និងអាចឱ្យគណៈអភិបាលរាជធានីភ្នំពេញយកទៅពិចារណាធ្វើការកែលម្អឡើងវិញ ឱ្យបានសមស្របតាមសេចក្តីត្រូវការរបស់ប្រជាពលរដ្ឋក្នុងមូលដ្ឋាននីមួយៗ ៕
ចែករំលែកព័តមាននេះ