ខេត្តត្បូងឃ្មុំ ៖ នៅតំបន់ត្រើយខាងកើតទន្លេមេគង្គ នៅតាមស្រុក-ក្រុងចំនួន៧នៃខេត្តត្បូងឃ្មុំ គឺមានផ្ទៃដីដាំដុះដំឡូងមីចំនួន៤៣៩៨០ហិកតា ។ ជាមួយនោះ នៅក្រុងសួងក៏មានសិប្បកម្មកែច្នៃម្សៅមីសម្រាប់លក់នៅក្នុងស្រុក និងនាំចេញទៅកាន់ទីផ្សារបរទេសទៀតផង ។…
ខេត្តត្បូងឃ្មុំ ៖ នៅតំបន់ត្រើយខាងកើតទន្លេមេគង្គ នៅតាមស្រុក-ក្រុងចំនួន៧នៃខេត្តត្បូងឃ្មុំ គឺមានផ្ទៃដីដាំដុះដំឡូងមីចំនួន៤៣៩៨០ហិកតា ។ ជាមួយនោះ នៅក្រុងសួងក៏មានសិប្បកម្មកែច្នៃម្សៅមីសម្រាប់លក់នៅក្នុងស្រុក និងនាំចេញទៅកាន់ទីផ្សារបរទេសទៀតផង ។
លោកហេង ពិសិដ្ឋ ប្រធានមន្ទីរកសិកម្មរុក្ខាប្រមាញ់ និងនេសាទខេត្តបានឲ្យដឹង កាលពីល្ងាចថ្ងៃទី១២ធ្នូ ឆ្នាំ២០២៤ ថា ចំពោះស្រុកដែលដាំដំឡូងមី ក្នុងនោះរួមមានក្រុងសួង ស្រុកត្បូងឃ្មុំ ស្រុកអូរាំងឪ ស្រុកពញាក្រែក ស្រុកមេមត់ ស្រុកក្រូចឆ្មារ និងស្រុកដំបែរ ដែលបងប្អូនប្រជាកសិករបានដាំដុះតកូនតចៅ រហូតមកដល់សព្វថ្ងៃ ដើម្បីប្រមូលផលបានយកលក់នៅលើទីផ្សារដោះស្រាយជីវភាពក្រុមគ្រួសារ។
លោកប្រធានមន្ទីរកសិកម្មខេត្តបានបន្តឲ្យដឹងទៀតថា ចំពោះដំណាំដំឡូងមីនេះ ត្រូវបានគេដាំដុះនៅក្នុងអំឡុងខែមីនា និងមេសា ហើយចាប់ផ្ដើមប្រមូលផលនៅខែវិច្ឆិកា ខែធ្នូ និងខែមករា ចំពោះទិន្នផលវិញ គិតជាមធ្យមក្នុងមួយហិកតាបានផលក្នុងរង្វង់១៩ តោនទៅ២០តោនឯណោះ ។
ហើយពូជដំឡូងនេះ គឺបងប្អូនកសិករខ្លះគាត់បានចេះថែរក្សាពូជទុកដោយខ្លួនឯង ខ្លះទិញមកពីខេត្តផ្សេង និងខ្លះទៀតទិញមកពីប្រទេសជិតខាង ដើម្បីធ្វើការដាំដុះ។ ចំពោះតម្លៃដំឡូងមីស្រស់លក់នៅលើទីផ្សារមួយគីឡូក្រាមតម្លៃ៣០០រៀល គឺមានក្រុមឈ្មួញកណ្ដាលចុះទិញដល់ចម្ការតែម្ដង ។
ដោយឡែក អ្នកដែលមានគោយន្តកែច្នៃ ឬរថយន្តធុនធំ គាត់អាចដឹកយកទៅលក់នៅប្រទេសវៀតណាមតាមច្រកដូង៧ដើម ស្រុកមេមត់ ចំពោះដំឡូងនេះ ផ្អែកតាមលក្ខណៈបច្ចេកទេសគឺគេយកទៅកែច្នៃជាម្សៅមី កាវ ក្រដាស ស្រូបថ្នាំពេទ្យនឹងអាចច្នៃបានជាច្រើនមុខទៀត ។
លោកហេង ពិសិដ្ឋ ប្រធានមន្ទីរកសិកម្មខេត្តបញ្ជាក់ថា សម្រាប់តម្លៃដំឡូងមីស្រស់លក់នៅលើទីផ្សារបើឆ្នាំ២០២៣ កន្លងទៅមួយគីឡូអាចលក់បានក្នុងរង្វង់៤០០ ទៅ៤៥០រៀលក្នុងមួយគីឡូ
ក្រាម។ ជាធម្មតាបងប្អូនប្រជាកសិករប្រសិនបើតម្លៃលក់នៅលើទីផ្សារបានថ្លៃ គឺពួកគាត់ប្រាកដជាសំងំនៅស្ងៀម តែបើដំឡូងមីលក់បានតម្លៃថោកនោះ ពួកគាត់នឹងមានការរអ៊ូររទាំថា បែបនេះថាបែបនោះ ។
តាមពិតទៅ ដំឡូងមីមិនមែនដាំតែនៅក្នុងប្រទេសកម្ពុជាយើងនោះទេ សូម្បីតែនៅប្រទេសវៀតណាមគគីមានការដាំដុះដែរ ។ ចំពោះតម្លៃវិញគឺជាលក្ខណៈទីផ្សារសេរី ។ សូមបញ្ជាក់ថា នៅក្រុងសួង គឺមានសិប្បកម្មផលិតម្សៅមីមួយកន្លែងដែលក្នុងមួយឆ្នាំ អាចផលិតបានប្រមាណ១០ម៉ឺនតោន ក្នុងនោះគឺនាំចេញលក់នៅក្នុងស្រុក និងមួយផ្នែកទៀតនាំទៅលក់នៅក្រៅស្រុក ។
ក្នុងនាមមន្ទីរកសិកម្ម សូមក្រើនរំលឹកដល់កសិករធ្វើយ៉ាងណា ដាំដុះទៅតាមលក្ខណៈបច្ចេកទេស ដែលមន្ត្រីជំនាញរបស់មន្ទីរធ្លាប់បានបង្ហាត់បង្រៀន បើធ្វើតាមលក្ខណៈបច្ចេកទេស គឺអាចទទួលបានផលចំណេញតិច ឬច្រើនហើយការខាតវិញគឺមានកម្រិតតិចណាស់ ។ ជាមួយនោះ ក៏សូមឱ្យកសិករចេះរក្សាពូជដំឡូង សម្រាប់ធ្វើការដាំដុះតាមរដូវកាល ចៀសវាងចំណាយប្រាក់ទិញពីគេអស់ទុនច្រើន ។
ចែករំលែកព័តមាននេះ