រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានគូសបញ្ជាក់ថា ជនល្មើសជាច្រើនដែលភាគច្រើន ជាជនអន្តោប្រវេសន៍បរទេសខុសច្បាប់ ហើយបានបន្លំខ្លួនចូលមកកម្ពុជា បង្កើតបានជាបទល្មើសយ៉ាងអនាធិបតេយ្យ…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានគូសបញ្ជាក់ថា ជនល្មើសជាច្រើនដែលភាគច្រើន ជាជនអន្តោប្រវេសន៍បរទេសខុសច្បាប់ ហើយបានបន្លំខ្លួនចូលមកកម្ពុជា បង្កើតបានជាបទល្មើសយ៉ាងអនាធិបតេយ្យ ដោយបាននាំយកបច្ចេកទេសបទល្មើសប្លែកៗទំនើបៗ ដែលកម្ពុជាពុំធ្លាប់មាន ដើម្បីមកសាបព្រួសលើទឹកដីកម្ពុជា និងធ្វើឱ្យប៉ះពាល់យ៉ាងខ្លាំងជាអវិជ្ជមាន លើដំណើរការអភិវឌ្ឍរីកចម្រើន សេចក្តីថ្លៃថ្នូររបស់មនុស្សជាតិ និងកិត្តិយសរបស់ក្រកម្ពុជាយ៉ាងធ្ងន់ធ្ងរ ។
ថ្លែងក្នុងទិវាជាតិប្រឆាំងអំពើជួញដូរមនុស្ស ១២ ធ្នូ ឆ្នាំ២០២៤ លើកទី១៨ ក្រោមប្រធានបទ «កម្ពុជាប្រឆាំងដាច់ខាតអំពើជួញដូរមនុស្សគ្រប់ទម្រង់ និងគ្រប់មធ្យោបាយក្នុងយុគសម័យឌីជីថល» នៅព្រឹកថ្ងៃទី១២ ខែធ្នូ ឆ្នាំ២០២៤ នៅសាលមហោស្របកោះពេជ្រសម្តេចបវរធិបតី បានគូសបញ្ជាក់ថា ៖«កន្លងមក យើងបានឃើញហើយ ថាមានជនល្មើសជាច្រើនដែលភាគច្រើនជាជនអន្តោប្រវេសន៍បរទេសខុសច្បាប់ បានបន្លំខ្លួនចូលមកកម្ពុជា ដើម្បីសង្ងំលាក់ខ្លួន បង្កើតបានជាបទល្មើស យ៉ាងអនាធិបតេយ្យលើទឹកដីនៃព្រះរាជាណាចក្រកម្ពុជា ដោយបាននាំយកបច្ចេកទេសបទល្មើសប្លែកៗទំនើបៗ ដែលកម្ពុជាមិនធ្លាប់មាន មកសាបព្រួសលើទឹកដីកម្ពុជា ដោយទាញយកឱកាស នៃការអនុវត្តឱកាសសេដ្ឋកិច្ច ក្នុងដំណាក់កាលនៃការស្តារឡើងវិញ ក្រោយវិបត្តិកូរីដ១៩ បានបំផ្លាញសេចក្តីសុវត្ថិភាព ប្រជាពលរដ្ឋកម្ពុជា និងប្រជាជននៃបណ្តាប្រទេសនានា ដែលមកស្នាក់នៅនិងរកការងារនៅកម្ពុជា» ។
សម្តេចបវរធិបតីបានបន្ថែមថា «សកម្មភាពនៃបទល្មើសឧក្រិដ្ឋទាំងនេះ បានធ្វើឱ្យប៉ះពាល់យ៉ាងខ្លាំងជាអវិជ្ជមានលើដំណើរការអភិវឌ្ឍរីកចម្រើន សេចក្តីថ្លៃថ្នូររបស់មនុស្សជាតិ និងកិត្តិយសរបស់ព្រះរាជាណាចក្រកម្ពុជា យ៉ាងធ្ងន់ធ្ងរ» ។ក្នុងនោះ សម្តេចធិបតី ហ៊ុន ម៉ាណែត បានបញ្ជាក់ថា «រាជរដ្ឋាភិបាលកម្ពុជា បានប្តេជ្ញាខ្ពស់ប្រឆាំងដាច់ខាត រាល់ការប៉ុនប៉ងបង្កវិនាសកម្មនៅកម្ពុជា តាមគ្រប់រូបភាព»។ ជាមួយគ្នានោះដែរ សម្តេចបវរធិបតី ហ៊ុន ម៉ាណែត បានលើកឡើងថា កម្ពុជាមានសិទ្ធិច្រានចោលនូវព័ត៌មានមិនពិតដែលបំណងបំផ្លាញឈ្មោះរបស់កម្ពុជាអំពីការជួញដូរមនុស្ស ។
សម្តេចធិបតីលើកឡើងបែបនេះ ដោយសារសម្តេចថា កន្លងមកមានការវាយតម្លៃនិងឲ្យចំណាត់ថ្នាក់មកលើការជួញដូរមនុស្សនៅកម្ពុជាថាមិនល្អបែបនេះបែបនោះ។ប៉ុន្តែសម្តេចថា កម្ពុជាក៏មិនបដិសេធចំពោះការវាយតម្លៃការជួញដូរមនុស្សមិនល្អនោះទេដែរ តែក៏មានសិទ្ធិការពារផងដែរ។
ជាក់ស្តែង សម្តេចក៏បានលើកឡើងពីករណីក្មេងប្រុសតៃវ៉ាន់២នាក់ នាពេលកន្លងមកដែលបានបង្ហាញវីដេអូអំពីការជួញដូរមនុស្សនៅខេត្តព្រះសីហនុ តែការពិតជាការសម្តែងរបស់ពួកគេសោះ និងថ្មីៗនេះករណីជនជាតិកូរ៉េម្នាក់ដែលបង្ហាញពីសកម្មភាពមួយចំនួននៅរាជធានី ភ្នំពេញថា មានការចាប់ជំរិតខ្លួនពីសំណាក់ជនជាតិចិន តែដល់សមត្ថកិច្ចពាក់ព័ន្ធស្រាវជ្រាវគឺមិនមានរឿងបែប នេះកើតឡើងទេ៕
ចែករំលែកព័តមាននេះ