ខេត្តព្រះសីហនុ ៖ បាតុភាពកាប់ចាក់គ្នារវាងក្រុមអ្នកដឹកជញ្ជូនWOWNOW និងក្រុមអ្នករត់ម៉ូតូកង់៣ បានធ្វើឱ្យសមត្ថកិច្ចចាត់វិធានការបង្ក្រាបដោយសារតែជម្លោះដ៏សាហាវ ។ ជម្លោះនេះ វាឈានទៅដល់ការរួមគ្នាជាសមាគមក្រុមទុច្ចរិតទៅហើយ ព្រោះភាគីទាំង២សុទ្ធតែមានសមាគមរៀងៗខ្លួន ។…
ខេត្តព្រះសីហនុ ៖ បាតុភាពកាប់ចាក់គ្នារវាងក្រុមអ្នកដឹកជញ្ជូនWOWNOW និងក្រុមអ្នករត់ម៉ូតូកង់៣ បានធ្វើឱ្យសមត្ថកិច្ចចាត់វិធានការបង្ក្រាបដោយសារតែជម្លោះដ៏សាហាវ ។ ជម្លោះនេះ វាឈានទៅដល់ការរួមគ្នាជាសមាគមក្រុមទុច្ចរិតទៅហើយ ព្រោះភាគីទាំង២សុទ្ធតែមានសមាគមរៀងៗខ្លួន ។ លុះពេលមានបាតុភាពរវាងគ្នានិងគ្នាផ្ទុះឡើង ក៏ប្រមូលគ្នាលើកទ័ពរៀងៗខ្លួនមកតទល់គ្នាយកឈ្នះយកចាញ់ ដែលវាមិនខុសពីសមាគមជនទុច្ចរិតឡើយ ។
ទាក់ទិនករណីខាងលើនេះ នៅថ្ងៃទី០៥ ខែធ្នូ ឆ្នាំ២០២៤ វេលាម៉ោងប្រហែល៩យប់ មានប្រជាពលរដ្ឋបានរាយការណ៍មកថា នៅចំណុចម្តុំសាខាពន្ធដារខេត្តព្រះសីហនុ ស្ថិតក្នុងភូមិ១ សង្កាត់លេខ៣ ក្រុងព្រះសីហនុ មានករណីហិង្សាដោយចេតនាមួយកើតឡើង បង្កដោយភាគី២ក្រុម ក្នុងនោះភាគីទី១-ក្រុមដឹកជញ្ជូន WowNow និងភាគីទី២-ក្រុមម៉ូតូកង់បីបានវាយតប់គ្នា ខ្លះដោយដៃនិងខ្លះទៀតប្រើកាំបិតកាប់ចាក់គ្នាទៅវិញទៅមកស៊ីសាច់ហុតឈាម ។
បន្ទាប់ពីទទួលបានព័ត៌មាននេះភ្លាម លោកឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ បានចាត់ឱ្យកម្លាំងជំនាញនៃស្នងការដ្ឋាននគរបាលខេត្តព្រះសីហនុ ចុះទៅដល់ទីតាំងកើតហេតុ តែពួកជនសង្ស័យទាំង២ក្រុម បានរត់គេចខ្លួនបាត់អស់ ។
ក្រោយពីកម្លាំងជំនាញធ្វើការស្រាវជ្រាវយ៉ាងយកចិត្តទុកដាក់ រហូតដល់វេលាម៉ោង៩និង៣០នាទីយប់ថ្ងៃដដែល កម្លាំងសមត្ថកិច្ចបានធ្វើការឃាត់ខ្លួនក្រុមជនសង្ស័យភាគីម៉ូតូកង់បីចំនួន៩នាក់ ព្រមទាំងដកហូតបានម៉ូតូកង់បីចំនួន៨គ្រឿង នៅចំណុចមុខការិយាល័យចរាចរណ៍ផ្លូវគោក ស្ថិតក្នុងភូមិ៣ សង្កាត់លេខ៣ ក្រុងព្រះសីហនុ ។ ព្រមទាំងបន្តឃាត់ខ្លួនបានបក្ខពួកក្រុមម៉ូតូកង់បីចំនួន៩នាក់ផ្សេងទៀត ដោយដកហូតបានម៉ូតូកង់បីចំនួន៩គ្រឿងបន្ថែមទៀត នៅចំណុចព្រៃស្វា ស្ថិតក្នុងភូមិ១ សង្កាត់លេខ៣ ក្រុងព្រះសីហនុ យកមកស្នងការដ្ឋាននគរបាលខេត្តព្រះសីហនុ ដើម្បីសួរនាំ និងស្រាវជ្រាវបន្ត ។
បន្ទាប់ពីកម្លាំងសមត្ថកិច្ចបន្តធ្វើការស្រាវជ្រាវ ក៏បានឈានចូលដល់យប់ថ្ងៃទី០៦ ខែធ្នូ ឆ្នាំ២០២៤ សមត្ថកិច្ចបានឃាត់ខ្លួនក្រុមដឹកជញ្ជូន WowNow ជាបន្តបន្ទាប់សរុបចំនួន១១នាក់បន្ថែមទៀត ជាជនជាតិខ្មែរដែលសង្ស័យពាក់ព័ន្ធនឹងករណីខាងលើ យកមកសួរនាំនៅការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តព្រះសីហនុ ។
ក្នុងកិច្ចប្រតិបត្តិការខាងលេីកម្លាំងជំនាញឃាត់ខ្លួនទាំង២ភាគីបានចំនួន២៩នាក់ ក្នុងក្រុមម៉ូតូកង់បី១៨នាក់ និងក្រុមដឹកជញ្ជូន WowNow១១នាក់ ។ សម្ភារៈវត្ថុតាងចាប់យកបានជាក់ស្តែងមាន ម៉ូតូកង់បី១៧គ្រឿង ម៉ូតូ៧គ្រឿង និងទូរស័ព្ទមួយចំនួន ។ ចំពោះជនសង្ស័យ២៩នាក់ ក៏បានរកឃេីញម្នាក់មានសារធាតុញៀនក្នុងទឹកនោម ។
បច្ចុប្បន្នជនសង្ស័យទាំង២៩នាក់រួមនឹងវត្ថុតាងខាងលើ កំពុងឃាត់ខ្លួននៅការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តព្រះសីហនុ ដេីម្បីសាកសួរនិងបន្តនីតិវិធី ៕
ចែករំលែកព័តមាននេះ