បុរសជនជាតិសិង្ហបុរីវ័យ៥២ឆ្នាំ ត្រូវបានប៉ូលិសថៃអះអាងថា បានស្លាប់បន្ទាប់ពីការម៉ាស្សាប្រេងនៅឆ្នេរសមុទ្រខេត្តភូកេត ។ ស្របគ្នានៃការផ្ទុះកក្រើករឿងរ៉ាវតារាចម្រៀងស្រុកស្រែស្រីវ័យក្មេង ដែលបានស្លាប់ដោយសារតែការម៉ាស្សាបែបប្រពៃណីថៃ នៅឯភូមិភាគឥសាន្ត នាខេត្តអ៊ូដុនថានីនោះ នៅថ្ងៃនេះ ក៏មានសេចក្តីរាយការណ៍ពីករណីស្លាប់ជាថ្មីទៀត…
បុរសជនជាតិសិង្ហបុរីវ័យ៥២ឆ្នាំ ត្រូវបានប៉ូលិសថៃអះអាងថា បានស្លាប់បន្ទាប់ពីការម៉ាស្សាប្រេងនៅឆ្នេរសមុទ្រខេត្តភូកេត ។
ស្របគ្នានៃការផ្ទុះកក្រើករឿងរ៉ាវតារាចម្រៀងស្រុកស្រែស្រីវ័យក្មេង ដែលបានស្លាប់ដោយសារតែការម៉ាស្សាបែបប្រពៃណីថៃ នៅឯភូមិភាគឥសាន្ត នាខេត្តអ៊ូដុនថានីនោះ នៅថ្ងៃនេះ ក៏មានសេចក្តីរាយការណ៍ពីករណីស្លាប់ជាថ្មីទៀត ដោយសារតែការម៉ាស្សានៅក្នុងប្រទេសថៃ ដែលបានកើតឡើងទៅលើបុរសអ្នកទេសចរជាជនជាតិសិង្ហបុរីនៅខេត្តភូកេត ។ នេះបើតាមការចុះផ្សាយរបស់សារព័ត៌មាន The Nation និង channelnewsasia នៅថ្ងៃទី០៩ ខែធ្នូ ឆ្នាំ២០២៤។
ប្រព័ន្ធផ្សព្វផ្សាយសិង្ហបុរីបានអោយដឹងថា បុរសជនជាតិសិង្ហបុរីវ័យ៥២ឆ្នាំ មានឈ្មោះថា Mr Lee Mun Tuk បានស្លាប់ភ្លាមៗកំពុងពេលទទួលសេវាកម្មម៉ាស្សាប្រេងរយៈពេល៤៥នាទី នៅឯហាងម៉ាស្សាបែបថៃមួយកន្លែងតាមបណ្តោយឆ្នេរសមុទ្រ Patong ដែលជាតំបន់ទេសចរណ៍ដ៏ល្បី ប្រចាំខេត្តភូកេត ។
កាសែតបាងកកប៉ុស្តិ៍អះអាងថា មេប៉ូលិសប្រចាំស្រុក Patong លោក Chalermchai Hernsawad បាននិយាយថា ប៉ូលិសទទួលបានការរាយការណ៍ពីករណីនេះនៅម៉ោង១១យប់ថ្ងៃទី០៧ ខែធ្នូ ឆ្នាំ២០២៤ ហើយបានចុះទៅដល់ហាងកើតហេតុ ដើម្បីពិនិត្យ និងស៊ើបអង្កេត។ តាមសាក្សីនៅក្នុងហេតុការណ៍បានបញ្ជាក់ប្រាប់ប៉ូលិសថា បុរសរងគ្រោះនោះបានដេកលក់ក្នុងអំឡុងពេលម៉ាស្សាដោយបានស្រមុកខ្លាំងៗ ។
មិនយូរប៉ុន្មាន ស្រាប់គាត់បានចាប់ផ្តើមបង្ហាញសញ្ញាមិនស្រួល ដោយដង្ហក់តឹងទ្រូង ដកដង្ហើមមិនដល់គ្នា បន្ទាប់មកក៏បាត់មាត់ឈឹងតែម្តង ទោះបីជាមានការខិតខំប្រឹងប្រែងពីបុគ្គលិកហាងម៉ាស្សា ដើម្បីសង្គ្រោះបឋមដល់គាត់យ៉ាងណាក៏ដោយ ក៏ពួកគេនៅតែមិនអាចជួយអោយគាត់ដឹងខ្លួនវិញបានឡើយ ហើយទីបំផុត គាត់ត្រូវបានគេប្រកាសថា បានស្លាប់នៅពេលមកដល់មន្ទីរពេទ្យ។ គ្រូពេទ្យជំនាញជឿថា គាត់បានផុតដង្ហើមតាំងពីនៅកន្លែងម៉ាស្សាមកម្ល៉េះ ។
យ៉ាងណាក៏ដោយ ជុំវិញករណីនេះ មេប៉ូលិសប្រចាំស្រុក Patong បាននិយាយថា ប្រពន្ធរបស់បុរសរងគ្រោះ ដែលអ្នកទាំងពីរ បានធ្វើដំណើរកម្សាន្តនៅខេត្តភូកេតជាមួយគ្នា មិនអនុញ្ញាតឱ្យប៉ូលិសធ្វើកោសល្យវិច័យសាកសពទេ ហើយបានស្នើសុំធ្វើមាតុភូមិនិវត្តន៍សពទៅប្រទេសសិង្ហបុរី ដើម្បីធ្វើពិធីសាសនា។
ស្ត្រីជាប្រពន្ធរូបនេះ បានប្រាប់ប៉ូលិសថៃថា ប្តីរបស់នាងបានផឹកស្រាបៀរមុនពេលទៅម៉ាស្សា ហើយនាងមិនមានសង្ស័យថា ប្តីរបស់នាងស្លាប់ដោយសារការម៉ាស្សាខុសបច្ចេកទេសនោះទេ ព្រោះនាងដឹងច្បាស់ពីស្ថានភាពសុខភាពរបស់ប្តីនាងច្បាស់ ដោយសារតែគាត់ជាមនុស្សដែលមានជំងឺប្រចាំកាយស្រាប់ ទម្លាប់ហូបអាហារមិនល្អ មិនសូវធ្វើលំហាត់ប្រាណ និងសម្រាកមិនគ្រប់គ្រាន់ ។
គួរកត់សម្គាល់ថា នេះជាករណីស្លាប់លើកទីពីរនៅហាងម៉ាស្សាថៃក្នុងរយៈពេលមួយសប្តាហ៍ បន្ទាប់ពីតារាចម្រៀងស្រីថៃម្នាក់បានស្លាប់បន្ទាប់ពីទទួលការម៉ាស្សាកនៅហាងម៉ាស្សាមួយក្នុងខេត្តអ៊ូដុនថានី ភាគឦសានប្រទេសថៃ ។
ករណីស្លាប់ផ្ទួនៗ ដោយសារការម៉ាស្សានេះ កំពុងបង្កការភ័យខ្លាចក្នុងស្រទាប់ភ្ញៀវទេសចរទូទាំងសាកលលោក ចំពោះការម៉ាស្សាបែបប្រពៃណីថៃ ដែលមានកេរ្តិ៍ឈ្មោះល្បីរាប់ឆ្នាំមកហើយ ។ ឧបទ្ទវហេតុនាពេលថ្មីៗនេះ បានជំរុញឱ្យអ្នកជំនាញផ្នែកវេជ្ជសាស្ត្រចេញការព្រមានអំពីហានិភ័យនៃបច្ចេកទេសម៉ាស្សាបែបខ្លាំង ឬចម្លែកៗ ដែលឈានទៅដល់កម្រិតគ្រោះថ្នាក់។
ដើម្បីបន្ធូបន្ថយស្ថានការណ៍ និងកាត់បន្ថយផលប៉ះពាល់ជាអវិជ្ជមានដល់វិស័យទេសចរណ៍ថៃនោះ ឈានមកដល់ថ្ងៃទី១០ ខែធ្នូ ឆ្នាំ២០២៤នេះ ស្រាប់តែសារព័ត៌មានបាងកកប៉ុស្តិ៍ដែលចុះផ្សាយព័ត៌មានដោយកែប្រែមូលហេតុនៃការស្លាប់របស់អ្នកចម្រៀងស្រី Ping Chayada កាលពីថ្ងៃទី៨ ខែធ្នូ ឆ្នាំ២០២៤ មិនមែនបណ្តាលមកពីការម៉ាស្សា.កនោះទេ តែការស្លាប់នោះ ត្រូវបានគ្រូពេទ្យជំនាញ បញ្ជាក់ជាថ្មីថា ដោយសារតារាចម្រៀងស្រីរូបនេះ មានមេរោគក្នុងឈាម (Blood infection ) និងការហើមសរសៃឆ្អឹងខ្នង ( swollen spinal cord ) ។
បន្ថែមលើនេះ សារព័ត៌មានបាងកកប៉ុស្តិ៍ក៏បានបញ្ជាក់ថា អាជ្ញាធរថៃបាននិយាយថា ហាងម៉ាស្សានៅខេត្តអ៊ូដនថានី ដែលត្រូវបានចោទប្រកាន់ថា បានធ្វើអោយតារាចម្រៀងស្រីរូបនោះស្លាប់ គឺជាហាងម៉ាស្សាដែលមានអាជ្ញាបណ្ណអាជីវកម្មត្រឹមត្រូវ ហើយអ្នកម៉ាស្សា និងចាប់សរសៃទាំងអស់ នៅក្នុងហាងនេះសុទ្ធតែបានឆ្លងវគ្គហ្វឹកហ្វឺនជំនាញច្បាស់លាស់ដូចគ្នា ។
តើលោកអ្នកគិតថា ព័ត៌មានកែតម្រូវថ្មីនេះ អាចជឿជាក់បាន ប៉ុន្មានភាគរយ ?
ចែករំលែកព័តមាននេះ