ទីក្រុងសេអ៊ូល៖ ផែនការដ៏ខ្មៅងងឹតរបស់ប្រធានាធិបតីកូរ៉េខាងត្បូង លោកយូនស៊ុកយូល កាលពីរាត្រីថ្ងៃអង្គារនោះហាក់ដូចជាវែងឆ្ងាយ និងមានចរិតហិង្សាជ្រុលពេកហើយ។ ព័ត៌មានអាថ៌កំបាំងបានទម្លាយឱ្យដឹងថានៅរាត្រីដែលលោកប្រកាសប្រើច្បាប់អាជ្ញាសឹកនោះ លោកប្រុងចាប់ខ្លួនទាំងប្រធានគណបក្សរបស់ខ្លួនឯងថែមទៀត។ នៅក្នុងបញ្ជីខ្មៅដែលត្រូវចាប់ខ្លួននោះក៏មានឈ្មោះលោកលីជេម្យុង (Lee Jae-myung) ដែលប្រធានគណបក្សប្រឆាំងធំជាងគេ និងអ្នកតំណាងរាស្ត្រក្រុមប្រឆាំង៣នាក់។ នេះបើយោងតាមលទ្ធផលស្រាវជ្រាវបឋមរបស់ទីភ្នាក់ងារស៊ើបការណ៍សម្ងាត់ជាតិ។
ប្រធានក្រុមស៊ើបការណ៍សម្ងាត់អះអាងថាប្រធានាធិបតីរូបនេះប្រុងបោសសម្អាតនរណាក៏ដោយដែលទើសមុខ ឬជាឆ្អឹងទទឹងករបស់គាត់ឱ្យអស់ដើម្បីក្ដោបក្ដាប់អំណាចរបស់គាត់តែម្នាក់ឯងនៅពេលអនុវត្តច្បាប់អាជ្ញាសឹក។ ការទម្លាយអាថ៌កំបាំងនេះកើតឡើងចំពេលដែលគណបក្សនយោបាយនានានៅកូរ៉េខាងត្បូងបានកោះប្រជុំបន្ទាន់កាលពីថ្ងៃសុក្រ។ ក្រុមអ្នកតំណាងរាស្ត្រត្រៀមកោះប្រជុំសភានៅថ្ងៃសៅរ៍ដើម្បីបោះឆ្នោតទម្លាក់លោកយូនស៊ុកយូលពីអំណាច។
លោកអាចនឹងត្រូវព្យួរតំណែងបើអ្នកតំណាងរាស្ត្រ២/៣បោះឆ្នោតប្រឆាំងនឹងរូបលោក។ បន្ទាប់មក គេនឹងបញ្ជូនសំណើនេះទៅតុលាការធម្មនុញ្ញដើម្បីសម្រេចជាលើកចុងក្រោយថាតើត្រូវដកតំណែងរបស់គាត់ ឬត្រូវប្រគល់តំណែងឱ្យគាត់វិញ។ ប្រធានគណបក្សរបស់លោកយូនស៊ុកយូលយល់ថាបើទុកឱ្យគាត់បន្តដឹកនាំប្រទេសទៀតមិនកើតទេ គ្រោះថ្នាក់ខ្លាំងណាស់សម្រាប់ជាតិមាភុភូមិ។
ប្រធានគណបក្សរូបនេះមុនដំបូងប្រុងកាន់ជើងលោកយូនស៊ុកយូល។ ប៉ុន្តែនៅពេលគាត់ដឹងថាលោកយូនស៊ុកយូលដល់ថ្នាក់ចង់ចាប់ខ្លួនតាំងពីប្រធានគណបក្សខ្លួនឯងយកទៅដាក់គុកទៀតនោះ គាត់ក៏សហការជាមួយគណបក្សប្រឆាំងដើម្បីបោះឆ្នោតទម្លាក់លោកយូនស៊ុកយូលពីអំណាច។ លោកយូនស៊ុកយូលបានត្រៀមបន្ទប់ឃុំឃាំងរួចហើយនៅទីក្រុងក្វាឈុន (Gwacheon)។
ជាថ្មីម្ដងទៀត ប្រធានគណបក្សកាន់អំណាចរូបនេះនៅតែបារម្ភថាបើបណ្ដោយឱ្យលោកយូនស៊ុកយូលកាន់អំណាចទៀត គាត់នឹងប្រកាសប្រើច្បាប់អាជ្ញាសឹកជាលើកទី២។ លើកនេះប្រហែលជាគាត់លេងដៃធ្ងន់ជាងមុនផងក៏មិនដឹងដើម្បីកុំឱ្យបរាជ័យដូចកាលពីយប់ថ្ងៃអង្គារ។ កាលពីល្ងាចថ្ងៃសុក្រ គេទទួលដំណឹងថាលោកយូនស៊ុកយូលធ្វើដំណើរទៅរដ្ឋសភាក្នុងបំណងអ្វីម៉្យាង។ ប៉ុន្តែក្រុមអ្នកតំណាងរាស្ត្រឈរតម្រង់ជួរគ្នាចាំស្ទាក់ផ្លូវរបស់គាត់។ ពួកគេស្រែកពាក្យស្លោកខ្លាំងៗថាត្រូវតែដកតំណែងរបស់គាត់៕
ចែករំលែកព័តមាននេះ