រាជធានីភ្នំពេញ ៖ លោកបណ្ឌិត យង់ ពៅ អ្នកជំនាញវិទ្យាសាស្ត្រនយោបាយ បានលើកឡើងថា ពិតប្រាកដ ណាស់ការរីកចម្រើន នៃសេដ្ឋកិច្ចនិងសង្គមកម្ពុជា…
រាជធានីភ្នំពេញ ៖ លោកបណ្ឌិត យង់ ពៅ អ្នកជំនាញវិទ្យាសាស្ត្រនយោបាយ បានលើកឡើងថា ពិតប្រាកដ ណាស់ការរីកចម្រើន នៃសេដ្ឋកិច្ចនិងសង្គមកម្ពុជា និងទំនាក់ទំនងល្អរវាងកម្ពុជាជាមួយនិងប្រទេសណាមួយ ពុំបានបង្កផលរំខាន ឬគំរាមកំហែងដល់សន្តិសុខ និងសណ្ដាប់ធ្នាប់ពិភពលោកឡើយ ។
យោងតាមការចេញផ្សាយរបស់រាជ្យបណ្ឌិតសភាកម្ពុជា លោកបណ្ឌិត យង់ ពៅ បានលើកឡើងថា កម្ពុជាតែងតែមានចេតនានៅក្នុងការចូលរួមចំណែកជំរុញសន្តិសុខ សន្តិភាព ស្ថិរភាព និងសណ្ដាប់ធ្នាប់ពិភពលោកជារៀងដរាប ដែលសក្ខីភាពជាក់ស្ដែង គឺកម្ពុជាតែងតែបានបញ្ជូនកងកម្លាំងរក្សាសន្តិភាព ទៅចូលរួមនៅក្នុងបេកសកកម្មថែរក្សាសន្តិភាពរបស់អង្គការសហប្រជាជាតិ នៅតាមបណ្ដាប្រទេសនានា ។
កម្ពុជាពុំធ្លាប់បានអភិវឌ្ឍ និងពង្រឹងខ្លួន ដើម្បីបង្កការប៉ះពាល់ ឬគំរាមកំហែងទៅដល់បណ្ដាប្រទេសណាមួយឡើយ វៀរលែងតែ ក្នុងករណី ដែលកម្ពុជាជួបប្រទះ នឹងកលយុគនយោបាយ-សង្គម ដែលអាចជះឥទ្ធិពល ឬបង្កផលប៉ះពាល់ដល់ប្រទេសក្នុងតំបន់ ឬពិភពលោក។ ដូច្នេះ គេគួរតែអបអរសាទរ ដែលប្រទេសកម្ពុជា ទទួលបាននូវការរីកចម្រើន ហើយបណ្ដាប្រទេសជាមិត្តនានា គួរតែជួយស្វែងរកច្រក ដើម្បីជំរុញឱ្យកម្ពុជាកាន់តែមានភាពរីកចម្រើន និងមានភាពសុខដុម ដើម្បីធានា នូវសណ្ដាប់ធ្នាប់តំបន់ និងពិភពលោក ។
អ្នកនយោបាយមួយក្រុមតូច និងអ្នកវិភាគមួយចំនួន មិនគួរសម្ដែងការព្រួយបារម្ភ នឹងការ ដែលកម្ពុជាពង្រឹង និង ពង្រីកទំនាក់ទំនងល្អជាមួយនឹងមហាអំណាចណាមួយ ដើម្បីឈានទៅអភិវឌ្ឍសេដ្ឋកិច្ច និងសង្គមជាតិរបស់ខ្លួននោះទេ។
ទាក់ទិននឹងការទស្សនកិច្ចរបស់សម្តេចតេជោ ហ៊ុន សែន ប្រធានព្រឹទ្ធសភា នៅប្រទេសចិន លោកបណ្ឌិត យង់ ពៅ បានគូសបញ្ជាក់ថា នៅក្នុងទំនាក់ទំនងកម្ពុជា-ចិន នាយុគសម័យទំនើបថ្មីនេះ ប្រទេសទាំងពីរ ពិតជាបានរួមចំណែកនៅក្នុងការជំរុញការរីកចម្រើនព្រមគ្នា និងថែមទាំងបានគាំទ្រគ្នា ក៏ដូចជាការពារផលប្រយោជន៍ឱ្យគ្នាទៅវិញទៅមកថែមទៀតផង។ ទំនាក់ទំនងទ្វេភាគីនេះ កម្ពុជា-ចិន បានបន្តទំនាក់ទំនងល្អ និងប្រកបដោយផ្លែផ្កា ក៏ដូចជាទំនាក់ទំនង ក្នុងភាពស្មើមុខមាត់គ្នា ស្របតាមច្បាប់អន្តរជាតិយ៉ាងពិតប្រាកដ បើទោះបីជាចិន បានក្លាយជាមហាអំណាចពិភពលោកទី២ និងជាប្រទេសជឿនលឿនក៏ដោយក្ដី ក៏ប្រទេសទាំងពីរ គោរពផលប្រយោជន៍គ្នាទៅវិញទៅមក និងគាំទ្រគ្នាទៅនៅក្នុងទិដ្ឋភាពនយោបាយ ភូមិសាស្ត្រ នយោបាយ និងសេដ្ឋកិច្ចជាដើម។ ហេតុនេះ កម្ពុជា ពិតជាមានភាពចាំបាច់ នៅក្នុងការពង្រឹង និងពង្រីកទំនាក់ទំនងកម្ពុជា-ចិន ឱ្យរីកចម្រើន និងឆ្ពោះទៅមុខកាន់តែប្រសើរឡើងថែមទៀត តាមរយៈកិច្ចសហប្រតិបត្តិការជិតស្និទ្ធ និងការបំពេញទស្សនកិច្ចទៅវិញទៅមករវាងថ្នាក់ដឹកនាំ នៃប្រទេសទាំងពីរ។
លោកបណ្ឌិត លើកឡើងទៀតថា ស្របតាមរដ្ឋធម្មនុញ្ញ ក៏ដូចជាគោលនយោបាយរបស់រាជរដ្ឋាភិបាល និងគណបក្សប្រជាជនកម្ពុជា ដែលគណបក្សកាន់អំណាចបច្ចុប្បន្ន តាមរយៈទស្សនកិច្ចនាពេលនេះ បានសបញ្ជាក់កាន់តែច្បាស់បន្ថែមទៀតថា កម្ពុជាពិតជាបានបើកចំហរទំនាក់ទំនង និងកិច្ចសហប្រតិបត្តិការល្អ ជាមួយគ្រប់បណ្ដាប្រទេសទាំងអស់លើពិភពលោក។ ត្រង់ចំណុចនេះ នៅក្នុងក្របខ័ណ្ឌធម្មនុញ្ញអង្គការសហប្រជាជាតិ ធម្មនុញ្ញអាស៊ាន ក៏ដូចជា ធម្មនុញ្ញ នៃបណ្ដាប្រទេសនានា ឬមហាអំណាចទាំងអស់ មិនបានចែងថា ប្រទេសមួយមិនត្រូវ ធ្វើកិច្ចសហប្រតិបត្តិការជាមួយប្រទេស ឬមហាអំណាចណាមួយផ្សេងៗពីខ្លួន ឬដាក់កំហិត មិនឱ្យមានទំនាក់ទំនងល្អជាមួយនឹងប្រទេស ឬមហាអំណាចណាមួយខ្ពស់ ឬទាបជាងខ្លួននោះទេ ។
លោកបន្ថែមថា កម្ពុជានៅតែបន្តប្រកាន់ នូវគោលការណ៍សន្តិសហវិជ្ជមាន ពោលគឺធ្វើកិច្ចសហប្រតិបត្តិការជាមួយគ្រប់បណ្ដាប្រទេស និងមហាអំណាចទាំងអស់ នៅក្នុងយុគសម័យទំនើប ដែលគ្មានការប្រកួតប្រជែង ឬបែងចែកមនោគមវិជ្ជា ដូចសម័យសង្គ្រាមត្រជាក់។ ការធ្វើទំនាក់ទំនងល្អ ឬជិតស្និទ្ធជាមួយនឹងបណ្ដាប្រទេស ឬមហាអំណាចជាដៃគូនីមួយៗ គឺអាស្រ័យនៅលើឆន្ទៈរបស់ប្រទេស និងមហាអំណាចទាំងនោះ ជាមួយនឹងប្រទេសកម្ពុជា ព្រោះនៅក្នុងទំនាក់ទំនងការទូត គឺទាមទារឱ្យមានការខិតខំប្រឹងប្រែងជំរុញទំនាក់ទំនង និងផ្ដល់នូវផលប្រយោជន៍ឱ្យគ្នាទៅវិញទៅមក ពោលគឺមិនមែនមានតែកិច្ចខិតខំប្រឹងប្រែងពីសំណាក់កម្ពុជាតែម្ខាង អាចធ្វើឱ្យទំនាក់ទំនងនោះមានភាពប្រសើរឡើងនោះទេ។ ទោះជាយ៉ាងណាកម្ពុជា ក៏ត្រូវស្វះស្វែងរកទំនាក់ទំនងល្អ និងកិចច្ចសហប្រតិបត្តិការកាន់តែប្រសើរជាមួយប្រទេសជាដៃគូ ឬមហាអំណាចផ្សេងទៀតផងដែរ ដើម្បីជាតុល្យភាព នៃទំនាក់ទំនង ដែលជាគោលដៅ នៃនយោបាយការបរទេស និងដើម្បីបំពេញតម្រូវការ នៃការអភិវឌ្ឍសេដ្ឋកិច្ច និងសង្គមជាតិរបស់ខ្លួន ៕
ចែករំលែកព័តមាននេះ