រាជធានីភ្នំពេញ ៖ ចៅក្រមជំនុំជម្រះ សាលាដំបូងរាជធានីភ្នំពេញ នារសៀលថ្ងៃទី៥ ខែធ្នូ ឆ្នាំ២០២៤ បានប្រកាសសាលក្រម សម្រេចផ្ដន្ទាទោសជនជាតិវៀតណាម ២នាក់…
រាជធានីភ្នំពេញ ៖ ចៅក្រមជំនុំជម្រះ សាលាដំបូងរាជធានីភ្នំពេញ នារសៀលថ្ងៃទី៥ ខែធ្នូ ឆ្នាំ២០២៤ បានប្រកាសសាលក្រម សម្រេចផ្ដន្ទាទោសជនជាតិវៀតណាម ២នាក់ ម្នាក់ដាក់ពន្ធនាគារមួយជីវិត និងម្នាក់ទៀតដាក់ពន្ធនាគារ ២៧ឆ្នាំ និងពិន័យប្រាក់សរុបចំនួន ១៨០លានរៀល ក្រោមការចោទប្រកាន់ពីបទ រក្សាទុក និងជួញដូរដោយខុសច្បាប់ នូវសារធាតុញៀន ។
សាលក្រម បានផ្តន្ទាទោសជនជាប់ចោទឈ្មោះ ង្វៀន ទៀងមិញ ភេទប្រុស អាយុ៣៣ឆ្នាំ ជនជាតិវៀតណាម ដាក់ពន្ធនាគារមួយជីវិត និងពិន័យជាប្រាក់ចូលថវិការដ្ឋ ចំនួន១០០លានរៀល ។ ផ្តន្ទាទោសលើឈ្មោះ ង្វៀន វ៉ាន់ណឹង ភេទប្រុស អាយុ៣៤ឆ្នាំ ជនជាតិវៀតណាម ដាក់ពន្ធនាគារកំណត់ ២៧ឆ្នាំ និងពិន័យជាប្រាក់ចូលថវិការរដ្ឋ ចំនួន៨០លានរៀល ។
សាលក្រមប្រកាសជាសាធារណៈ និងទុកសិទ្ធិឲ្យប្តឹងឧទ្ធរណ៍ តាមកំណត់ច្បាប់ បើសិនមិនសុខចិត្តចំពោះការកាត់ក្តីនេះ ។
សូមរម្លឹកថា កាលពីថ្ងៃទី២៤ ខែមិថុនា ឆ្នាំ២០២៣ សមត្ថកិច្ចនគរបាលមន្ទីរប្រឆាំងបទល្មើសគ្រឿងញៀន បានបើកប្រតិបត្តិការបង្ក្រាបករណីជួញដូរដោយខុសច្បាប់ នូវសារធាតុញៀន ចំនួន ២គោលដៅ នៅក្នុងរាជធានីភ្នំពេញ ។
គោលដៅទី១ នៅក្នុងបុរីមួយប៉េងហួត ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ និងគោលដៅទី២ ក៏នៅបុរីប៉េងហួត ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ ។
ការបង្ក្រាបទាំង២ទីតាំងនោះ សមត្ថកិច្ចបានចាប់យកវត្ថុតាងសារធាតុញៀនប្រភេទ មេតំហ្វេតាមីន ចំនួន ៧៩០.៩៣ ក្រាម, MDMA ៣,២១៥.០៥ក្រាម និងហេរ៉ូអីន ៣,៦៤០ ក្រាម សរុបសារធាតុញៀនទាំងអស់មានទម្ងន់ ៧គីឡូក្រាម និង៦៤៥ក្រាម ។
ដោយចាប់ជនសង្ស័យជនជាតិវៀតណាម ២នាក់ ឈ្មោះ ង្វៀង ទៀងមិញ និងង្វៀង វ៉ាន់ណឹង (ទាំង២នាក់ជាបងថ្លៃ និងប្អូនថ្លៃ) ។ ក្រោយឃាត់ខ្លួនជនសង្ស័យ និងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ តាមនីតិវិធី ជនត្រូវចោទត្រូវបានចៅក្រមស៊ើបសួរ សម្រេចឃុំខ្លួនដាក់ពន្ធនាគារជាបណ្តោះអាសន្ន នៅថ្ងៃទី២៩ ខែមិថុនា ឆ្នាំ២០២៣ រហូតដល់មកថ្ងៃប្រកាសសាលក្រមនេះ ៕
ចែករំលែកព័តមាននេះ