ខេត្តកំពត ៖ ស្ត្រីម្នាក់ឈ្មោះរ៉ាយនី អាយុ65ឆ្នាំ ជាអ្នកលក់ចេកផ្កាសម្រាប់អោយភ្ញៀវទិញយកទៅថ្វាយលោកយាយម៉ៅនៅលើភ្នំបូកគោបាននិយាយកាលពីព្រឹកថ្ងៃទី2 ធ្នូ ឆ្នាំ2024 ថា គាត់ជាស្ត្រីមេម៉ាយមានរបរលក់ផ្កានិងចេក ​ជូនអោយភ្ញៀវទេសចរ​ទិញយកទៅថ្វាយលោកយាយម៉ៅនៅលើ​ភ្នំបូកគោនោះជិត20ឆ្នាំហើយ។

ស្ត្រីរូបនេះបាននិយាយត្អូញត្អែរថា ការលក់ដូរនៅថ្ងៃទី2ធ្នូនេះ ម៉ោងជាង10ទៅហើយ ទើបតែលក់បានទឹកសុទ្ធមួយដបប៉ុណ្ណោះ ។

ស្ត្រីរូបនោះបាននិយាយប្រាប់បន្តថា បើថ្ងៃបុណ្យទានទៅ លក់បានគ្រាន់បើដែរ តែបើ​ថ្ងៃធម្មតាវិញអង្គុយអោយស្ងាត់ឈឹងតែម្ដង ។

ស្ត្រីអ្នកលក់ផ្កានិងចេកផ្លូវឡើងទៅភ្នំបូកគោនិយាយប្រាប់បន្តថា បើលក់គ្មានអ្នកទិញអីចឹង បើសិនជាគេយកថ្លៃឈ្នូលដីទៀត ពិតជាគ្មានលទ្ធភាពបង់អោយថ្លៃដីគេទេ ប៉ុន្តែការដាក់លក់ដូរផ្កានិង​ចេកនេះគឺលើដីរបស់​ឯកឧត្តមសោម ចិន ដោយ​ឯកឧត្តម​មិនដែលយក​ប្រាក់នោះ​ទេ ​៕