រាជធានីភ្នំពេញ ៖ ថ្ងៃទី០១ ខែធ្នូ ឆ្នាំ២០២៤ ព្រឹកស្អែកនេះ នៅស្នងការដ្ឋាននគរបាលរាជធានីភ្នំពេញ គ្រោងនឹងធ្វើពិធីបង្ហាញ មុខជនសង្ស័យចំនួន ៣នាក់…
រាជធានីភ្នំពេញ ៖ ថ្ងៃទី០១ ខែធ្នូ ឆ្នាំ២០២៤ ព្រឹកស្អែកនេះ នៅស្នងការដ្ឋាននគរបាលរាជធានីភ្នំពេញ គ្រោងនឹងធ្វើពិធីបង្ហាញ មុខជនសង្ស័យចំនួន ៣នាក់ ជាមុខសញ្ញាឆក់ទូរសព្ទដៃ ជនបរទេស ដែលជាជនជាតិចិន ប្រព្រឹត្តនៅរាជធានីភ្នំពេញ ។
ជនសង្ស័យទាំង៣នាក់នោះ មាន ៖
១. ឈ្មោះ ហាក់ ម៉េងហៀង ហៅមាន់ ភេទប្រុស អាយុ១៧ឆ្នាំ មុខរបរ សិស្សសាលាសុវណ្ណភូមិ ថ្នាក់ទី១១B ស្នាក់នៅផ្ទះមិនចាំលេខ ផ្លូវលំ ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
២. ឈ្មោះ ជុំ បញ្ញា ភេទប្រុស អាយុ១៧ឆ្នាំ មុខរបរ មិនពិតប្រាកដ ស្នាក់នៅផ្ទះមិនចាំលេខ ផ្លូវលំ ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
៣. ឈ្មោះ អុល ដេវីត ភេទប្រុស អាយុ១៧ឆ្នាំ ជនជាតិខ្មែរ មុខរបរ សិស្សវិទ្យាល័យសន្ធរម៉ុក ថ្នាក់ទី១០C១ ស្នាក់នៅផ្ទះលេខ១ ផ្លូវបេតុង ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ទាក់ទិននឹងការគ្រោងនឹងបង្ហាញមុខក្រុមឆក់ជនបរទេសខាងលើនេះ លោកវរៈសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាល បានឲ្យដឹងថា ក្រោមការដឹកនាំបញ្ជាពីលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី២៩ ខែវិច្ឆិកា ឆ្នាំ២០២៤ វេលាម៉ោង០១ និង៣០នាទី កម្លាំងការិយាល័យនគរបាលព្រហ្មទណ្ឌកម្រិតស្រាល បានឃាត់ខ្លួនជនសង្ស័យជាបន្តបន្ទាប់ចំនួន ០៣នាក់ នៅចំណុចផ្ទះសំណាក់លីហួរ សង្កាត់កាកាប១ ខណ្ឌពោធិសែនជ័យ រាជធានីភ្នំពេញ រួមទាំងចាប់យកម៉ូតូ ដែលជនសង្ស័យជិះធ្វើសកម្មភាព ចំនួន០១ គ្រឿង។
ក្រោយឃាត់ខ្លួន ជនសង្ស័យបានសារភាពថា ពួកគេបានប្រព្រឹត្តបទល្មើសអំពើលួចមានស្ថានទម្ងន់ទោស ដោយសារការប្រើអំពើហិ.ង្សា (ឆក់ទ្រព្យសម្បត្តិរបស់ប្រជាពលរដ្ឋ) ចំនួន០៤ លើក ៖
លើកទី១ ៖ កាលពីថ្ងៃទី២៨ ខែវិច្ឆិកា ឆ្នាំ២០២៤ វេលាម៉ោង២២និង២០នាទី ឆក់យកទូរសព្ទដៃមិនបានសម្រេច នៅចំណុចមុខសណ្ឋាគារឈុនហ៊ួយ ផ្លូវលេខ១១៣K ភូមិក្បាលដំរី២ សង្កាត់កាកាប២ ខណ្ឌពោធិសែនជ័យ រាជធានីភ្នំពេញ ។ ជនរងគ្រោះ ជាជនជាតិចិន មិនដាក់ពាក្យបណ្តឹងទេ ។
លើកទី២ ៖ កាលពីថ្ងៃទី២៨ ខែវិច្ឆិកា ឆ្នាំ២០២៤ វេលាម៉ោង២២និង៣០នាទី ឆក់ទូរសព្ទដៃមិនបានសម្រេច នៅចំណុចទល់មុខកន្លែងជួសជុលម៉ូតូ យីហោជាងកេងជួសជុលម៉ូតូ ផ្លូវលេខ១១៣K ភូមិព្រៃទា១ សង្កាត់ចោមចៅ៣ ខណ្ឌពោធិសែនជ័យ រាជធានីភ្នំពេញ ជនរងគ្រោះភេទស្រីជាជនជាតិចិន មិនបានដាក់ពាក្យបណ្តឹងទេ ។
លើកទី៣ ៖ កាលពីថ្ងៃទី២៥ ខែវិច្ឆិកា ឆ្នាំ២០២៤ វេលាម៉ោង២១ និង២៥នាទី ឆក់ទូរសព្ទដៃ នៅចំណុចមុខរោងចក្រឌីជេ ផ្លូវបេតុង ភូមិក្បាលដំរី២ សង្កាត់កាកាប២ ខណ្ឌពោធិសែនជ័យ រាជធានីភ្នំពេញ ។ ជនរងគ្រោះជាជនជាតិចិន មិនបានដាក់ពាក្យបណ្តឹងទេ ។
លើកទី៤ ៖ កាលពីថ្ងៃទី២៦ ខែវិច្ឆិកា ឆ្នាំ២០២៤ វេលាម៉ោង២១និង១០នាទី ឆក់យកទូរសព្ទដៃ ម៉ាកអាយហ្វូន១៣ ពណ៌ ទឹកប៊ិច ប្រព្រឹត្តនៅចំណុចមុខហាងស៊ុបសាច់គោ ផ្លូវសហព័ន្ធរុស្សី ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ ។ ជនរងគ្រោះភេទស្រីជាជនជាតិចិន មិនបានដាក់ពាក្យបណ្តឹងទេ ។
វត្ថុតាងចាប់យក រួមមាន ៖ ម៉ូតូម៉ាកស៊ុយហ្ស៊ុយគី និច ពណ៌ស-ក្រហម សេរីឆ្នាំ២០២៤ ពាក់ស្លាកលេខ ភ្នំពេញ 1LB-1101 ចំនួន០១ គ្រឿង ។
ជនសង្ស័យ និងវត្ថុតាង បន្ទាប់ពីបង្ហាញមុខរួច សមត្ថកិច្ចនឹងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ