ទីក្រុងអាស់ស្តាណា៖ ថ្ងៃនេះលោកពូទីនប្រើប្រាស់យុទ្ធសាស្ត្របត់បែនទៅសភាពការណ៍ជាក់ស្ដែង។ ទោះបីចង់ឱ្យលោកប្រើធម៌ក្ដៅក៏បាន ប្រើធម៌ត្រជាក់ក៏បាននៅក្នុងបញ្ហាអ៊ុយក្រែន។ លោកថ្លែងថាលោកអាចនឹងចាប់ផ្ដើមចរចាគ្នាដើម្បីបិទបញ្ចប់សង្គ្រាមអ៊ុយក្រែនដោយមិនចាំបាច់មានបុរេលក្ខខណ្ឌ។ ប៉ុន្តែលោកក៏ត្រៀមប្រើប្រាស់គ្រប់អាវុធទាំងអស់ដែលមាននៅក្នុងឃ្លាំងដើម្បីវាយប្រហារទៅអ៊ុយក្រែន និងក្រុមបស្ចិមប្រទេសផងបើអ៊ុយក្រែនទទួលបានអាវុធនុយក្លេអ៊ែរមែននោះ។
លោកពូទីនសង្កត់ធ្ងន់ថាកាលពីពេលកន្លងមកអ្វីដែលលោកបានលើកឡើងអំពីការទាមទាររបស់លោកនោះគឺដើម្បីធានាថាការចរចាគ្នាមានដំណើរការទៅមុខ និងចរចាឆាប់ត្រូវគ្នា។ លោកចាត់ទុកថាអ្វីដែលលោកបានទាមទារកាលពិពេលកន្លងមកនោះជា «លក្ខខណ្ឌសន្តិភាព»។ មានន័យថាបើធ្វើតាមការទាមទារនេះ សង្គ្រាមអ៊ុយក្រែននឹងបញ្ចប់ទៅវិញយ៉ាងឆាប់រហ័ស ហើយនឹងធានាសន្តិភាពយូរអង្វែង។
លោកធ្លាប់បានបរិយាលម្អិតអំពីលក្ខខណ្ឌសន្តិភាពនៅក្នុងបញ្ហាអ៊ុយក្រែនតាមរយៈសុន្ទរកថារបស់លោកនៅពេលជួបជាមួយក្រុមអ្នកតំណាងក្រសួងការបរទេសរុស្ស៊ីកាលពីខែមិថុនា។ លោកបញ្ជាក់ថាជំហររបស់រុស្ស៊ីនៅដដែល ឥតមានអ្វីប្រែប្រួលទេនៅក្នុងបញ្ហាអ៊ុយក្រែន។ ម៉្យាងទៀត ទោះបីអ៊ុយក្រែនទទួលបានអាវុធថ្មីៗពីប្រទេសដទៃក៏រុស្ស៊ីត្រៀមកំដរជានិច្ច។
លោកពូទីនថ្លែងថារាល់លក្ខខណ្ឌដែលលោកធ្លាប់បានប្រកាសកាលពីខែមិថុនានោះគឺនៅដដែលឥតប្រែប្រួលទេ។ កាលនោះលោកថ្លែងថាសង្គ្រាមអ៊ុយក្រែន បើចង់បិទបញ្ចប់ ងាយស្រួលបំផុត។ សំខាន់ឱ្យតែអ៊ុយក្រែនឈប់ចូលជាសមាជិកអង្គការណាតូ និងយល់ព្រមទទួលស្គាល់ទឹកដី៤កន្លែងដែលកងទ័ពរុស្ស៊ីកំពុងកាន់កាប់ជាទឹកដីរបស់រុស្ស៊ីដោយស្របច្បាប់។
សំណើរនេះត្រូវអ៊ុយក្រែនច្រានចោលដោយមិនចាំបាច់គិតគូរច្រើនទេ។ អ៊ុយក្រែនអះអាងថាការធ្វើបែបនេះមានន័យស្មើនឹងប្រគល់ពានជ័យជម្នះទៅឱ្យរុស្ស៊ីដែលជាអ្នកឈ្លានពានគេ។ ក្រៅពីនិយាយអំពីការចរចាគ្នា លោកពូទីនក៏ត្រៀមប្រើប្រាស់គ្រឿងសព្វាវុធដែលរុស្ស៊ីមានទាំងប៉ុន្មានដើម្បីតតាំងគ្នាជាមួយអ៊ុយក្រែនផងដែរបើអ៊ុយក្រែនមានអាវុធនុយក្លេអ៊ែរ។
កាលពីសប្ដាហ៍មុន កាសែតញូយ៉កថាមចុះផ្សាយថាប្រទេសលោកខាងលិចខ្លះស្នើសុំឱ្យលោកបៃដិនមុននឹងបញ្ចប់តំណែងនាខែមករាខាងមុខនេះ លោកគួរតែបញ្ជូនអាវុធនុយក្លេអ៊ែរទៅឱ្យអ៊ុយក្រែន។ នៅត្រង់ចំណុចនេះ លោកពូទីនយល់ថាបើអ៊ុយក្រែនមាននុយក្លេអ៊ែរនៅក្នុងដៃ តើយើងត្រូវធ្វើអ្វីជាបន្តទៀត? យើងត្រូវតែប្រើប្រាស់គ្រប់មធ្យោបាយដែលយើងមាន។
យើងនឹងបន្តតាមដានគ្រប់សកម្មភាពរបស់ពួកគេ។ បើពួកគេបញ្ជូននុយក្លេអ៊ែរទៅឱ្យអ៊ុយក្រែនមែន មានន័យថាជាការបំពានពាក្យសន្យារបស់ពួកគេដែលថាមិនរីកសាយភាយអាវុធនុយក្លេអ៊ែរ។ អ៊ុយក្រែនមិនអាចផលិតអាវុធនុយក្លេអ៊ែរបានឡើយ។ ដូច្នេះ ពួកគេអាចនឹងផលិតគ្រាប់បែកលាយវិទ្យុសកម្ម។ បើពួកគេប្រើអាវុធនេះ លោកនឹងឆ្លើយតបទៅតាមនោះ។
អ៊ុយក្រែនធ្លាប់មានអាវុធនុយក្លេអ៊ែរនៅក្នុងដៃតាមរយៈការផ្ទេរពីសហភាពសូវៀតបន្ទាប់ពីសូវៀតដួលរលំកាលពីឆ្នាំ១៩៩១។ ប៉ុន្តែក្រោយមក អ៊ុយក្រែនយល់ព្រមប្រគល់អាវុធទាំងនោះទៅឱ្យប្រទេសរុស្ស៊ីវិញទាំងអស់តាមអនុស្សារណៈប៊ុយដាប៉ែសឆ្នាំ១៩៩៤។ ជាថ្នូរត្រឡប់មកវិញ ប្រទេសរុស្ស៊ី អាមេរិក និងអង់គ្លេសធានាសន្តិសុខជាតិជូនប្រទេសអ៊ុយក្រែន។
ក្រោយមក អ៊ុយក្រែនទំនងជាស្ដាយក្រោយ។ លោកហ្សេឡិនស្គីធ្លាប់និយាយជារឿយៗថាដោយសារប្រគល់នុយក្លេអ៊ែរទៅឱ្យរុស្ស៊ីនេះហើយដែលធ្វើឱ្យប្រទេសរបស់លោករស់នៅគ្មានសន្តិសុខទាល់តែសោះ។ ហេតុនេះលោកយល់ថាអ៊ុយក្រែនត្រូវតែចូលអង្គការណាតូ៕
ចែករំលែកព័តមាននេះ