រាជធានីភ្នំពេញ ៖ ផ្ទះ១ខ្នងដែលសង់ពីឈើខាងលើ និងរៀបបន្ទប់ថ្មខាងក្រោម ដំបូលប្រក់ក្បឿង ត្រូវបានក្លាយជាចំណីព្រះអគ្គិទាំងស្រុង ហើយ បើតាមការស្រាវជ្រាវពីកម្លាំងសមត្ថកិច្ចបានរកឃើញថា ការឆាបឆេះនេះបង្កឡើងដោយការឆ្លងចរន្តអគ្គិសនី ។…
រាជធានីភ្នំពេញ ៖ ផ្ទះ១ខ្នងដែលសង់ពីឈើខាងលើ និងរៀបបន្ទប់ថ្មខាងក្រោម ដំបូលប្រក់ក្បឿង ត្រូវបានក្លាយជាចំណីព្រះអគ្គិទាំងស្រុង ហើយ បើតាមការស្រាវជ្រាវពីកម្លាំងសមត្ថកិច្ចបានរកឃើញថា ការឆាបឆេះនេះបង្កឡើងដោយការឆ្លងចរន្តអគ្គិសនី ។
ដោយឡែក ស្ត្រីដែលជាម្ចាស់ផ្ទះម្នាក់ក្រោយពេលបានឃើញផ្ទះ រួមនិងទ្រព្យសម្បត្តិទាំងអស់ត្រូវភ្លើងឆេះបំផ្លាញអស់គ្មានសល់បែបនេះ ធ្វើឲ្យគាត់មានការតក់ស្លុតរន្ធត់ខ្លាំងណាស់ រហូតដួលសន្ល.ប់ស្ដូកស្ដឹងថែមទៀតផង ។
ហេតុការណ៍នោះបានកើតឡើង បង្កឲ្យមានការភ្ញាក់ផ្អើល កាលពីវេលាម៉ោង១០និង១៥នាទីព្រឹក ថ្ងៃទី២៧ ខែវិច្ឆិកា ឆ្នាំ២០២៤ នៅក្នុងភូមិកំរៀង សង្កាត់កន្ទោក ខណ្ឌកំបូល រាជធានីភ្នំពេញ ។
ផ្ទះដែលត្រូវភ្លើងឆេះខាងលើនោះ មានទំហំ៧ម៉ែត្រគុណនឹង១២ម៉ែត្រ ជាប្រភេទផ្ទះឈើខាងលើ និងមានបន្ទប់ថ្មខាងក្រោម ដំបូលប្រក់ក្បឿង ដែលមានម្ចាស់ឈ្មោះ យ៉ាំ យឿន ភេទស្រី អាយុ៥៨ឆ្នាំ គាត់ជាស្រីមេម៉ាយ ។
តាមប្រជាពលរដ្ឋ ដែលរស់នៅក្នុងភូមិខាងលើបានប្រាប់ថា នៅមុនពេលមានភ្លើងឆេះនោះ ស្ត្រីដែលម្ចាស់ផ្ទះខាងលើបានទៅស្នាក់នៅជាមួយកូនស្រីម្នាក់ នៅជិតសាលាកូរ៉េ សង្កាត់សំរោងក្រោម ខណ្ឌពោធិ៍សែនជ័យ ។ គាត់បានទុកកូនប្រុសម្នាក់ ឈ្មោះ លន រតនៈ អាយុ២៤ឆ្នាំ ឲ្យនៅចាំផ្ទះម្នាក់ឯង រហូតដល់ពេលកើតហេតុ ស្រាប់តែមានភ្លើងឆេះផ្ទះ ហើយទាល់តែឆេះខ្លាំងសន្ធោសន្ធៅទៅហើយ ទើបដឹង និងមានការភ្ញាក់ផ្អើល ។
ពេលនោះ អ្នកភូមិបាននាំគ្នាជួយពន្លត់ដែរ ប៉ុន្តែមិនរលត់នោះទេ ភ្លើងឆេះលឿនខ្លាំងណាស់ ព្រោះតែជាផ្ទះឈើ និងពុំអាចយកទ្រព្យសម្បត្តិចេញពីក្នុងផ្ទះនោះទាន់ឡើយ ។
សមត្ថកិច្ចបានប្រាប់ឲ្យដឹងថា នៅពេលកើតមានគ្រោះអគ្គិភ័យនោះភ្លាម កម្លាំងអាជ្ញាធរ និងសមត្ថកិច្ចបានចេញអន្តរាគមន៍ និងហៅរថយន្តពន្លត់អគ្គិភ័យជាច្រើនគ្រឿងចេញទៅអន្តរាគមន៍បាញ់ពន្លត់ទើបរលត់ទៅវិញមិនឆេះរាលដល់ផ្ទះអ្នកជិតខាង ។
ក្នុងនោះមានរថយន្តការិយាល័យបង្ការ ពន្លត់ និងសង្គ្រោះអគ្គិភ័យចំនួន០៦គ្រឿងប្រើប្រាស់ទឹកអស់ចំនួន២រថយន្តស្មើនឹង៨ម៉ែត្រគូប ។ រថយន្តពន្លត់អគ្គិភ័យប្រចាំការ នៅសាលាខណ្ឌកំបូល០១គ្រឿង ប្រើប្រាស់ទឹកអស់០១រថយន្តស្មើនឹង៤ម៉ែត្រគូប ។
រថយន្តពន្លត់អគ្គិភ័យរបស់កងពលតូចលេខ៧០ ចំនួន៦គ្រឿងប្រើប្រាស់ទឹកអស់៤រថយន្ត ស្មើនឹង៣៦ម៉ែត្រគូប ។ រថយន្តពន្លត់អគ្គិភ័យរបស់បញ្ជាការដ្ឋានទ័ពពិសេសឆ័ត្រយោង៩១១ចំនួន៣គ្រឿង ប្រើប្រាស់ទឹកអស់៣ រថយន្តស្មើនឹង១២ម៉ែត្រគូប ។ និងរថយន្តពន្លត់អគ្គិភ័យរបស់បុរីសង្ឃឹមថ្មី ចំនួន០២គ្រឿងប្រើប្រាស់ទឹកអស់២រថយន្ត ស្មើនឹង៨ម៉ែត្រគូប ។
ដោយឡែក យុវជនឈ្មោះ លន រតនៈ ដែលត្រូវជាកូនម្ចាស់ផ្ទះបាននិយាយនៅក្រោយពេលកើតហេតុនោះថា ខ្លួនក៏មិនបានដឹងថា ភ្លើងឆេះផ្ទះភ្លាមៗនោះឡើយ ព្រោះនៅមុនពេលកើតហេតុ ខ្លួនបានបិទទ្វារផ្ទះចាក់សោចោលរួចទៅមើលស្រែ ហើយបានបិទបារ៉ែតភ្លើងរួចរាល់ទើបចេញទៅ លុះក្រោយមកស្រាប់តែមានភ្លើងឆេះផ្ទះបែបនេះតែម្ដង ៕
ចែករំលែកព័តមាននេះ