ថៃ ៖ ឈានមកដល់ថ្ងៃទី២៥ ខែវិច្ឆិកា ឆ្នាំ២០២៤ អាជ្ញាធរថៃ បានដាក់ចេញបំរាមហាមមិនឱ្យព្រះចៅអធិការវត្តព្រៃនគរឆៃបវន ផ្លាស់ទីសាកស.ពទាំង៤១ ដែលត្រូវបានរកឃើញ ចេញពីទីតាំងដើមជាដាច់ខាត…
ថៃ ៖ ឈានមកដល់ថ្ងៃទី២៥ ខែវិច្ឆិកា ឆ្នាំ២០២៤ អាជ្ញាធរថៃ បានដាក់ចេញបំរាមហាមមិនឱ្យព្រះចៅអធិការវត្តព្រៃនគរឆៃបវន ផ្លាស់ទីសាកស.ពទាំង៤១ ដែលត្រូវបានរកឃើញ ចេញពីទីតាំងដើមជាដាច់ខាត ដោយរង់ចាំលទ្ធផលស៊ើបអង្កេត និងផ្ទៀងផ្ទាត់អត្តសញ្ញាណជាមុនសិន ។ នេះបើយោងតាមការចុះផ្សាយរបស់សារព័ត៌មានថៃ PBS World នៅថ្ងៃទី២៥ ខែវិច្ឆិកា ឆ្នាំ២០២៤។
សូមជម្រាបថា វត្តព្រៃនគរឆៃបវន ដែលត្រូវបានគេស្គាល់ថា ជាទីតាំងសម្រាប់អ្នកប្រតិបត្តិវិបស្សនា ដើម្បីហាត់ពត់លត់ដំបង្វឹកផ្លូវចិត្តជាមួយនឹងវិធីសាស្ត្រដ៏ចម្លែក ដោយត្រូវការសាកស.ពរបស់មនុស្សជាច្រើន ដើម្បីធ្វើពិធីសមាធិនៅក្នុងទីតាំងនោះ ហើយកាលពីថ្ងៃទី២២ ខែវិច្ឆិកាកន្លងទៅ ប៉ូលិសថៃបានរកឃើញសាកស.ពសរុបចំនួន៤១ ដែលតម្កល់ក្នុងមឈូស នៅក្នុងវត្តកណ្តាលព្រៃមួយនេះដែលមានទីតាំងនៅភូមិបានណយ ស្រុកផូថាល ខេត្តពិចិត្រ ។
សាកស.ពទាំងនេះត្រូវបានព្រះគ្រូចៅអធិការអះអាងថា គឺជាប្រគេនដោយស្ម័គ្រចិត្តពីសំណាក់សាច់ញាតិនៃស.ពដោយមានសំបុត្រមរណៈ និងលិខិតប្រគល់ស.ពត្រឹមត្រូវ ប៉ុន្តែនៅថ្ងៃទី២៥ ខែវិច្ឆិកា ទីភ្នាក់ងារជំនាញដែលរួមមានទាំងប៉ូលិស អាជ្ញាធរមូលដ្ឋាន មន្ត្រីសុខាភិបាល និងស្ថាប័នពាក់ព័ន្ធកំពុងដុតដៃដុតជើងផ្ទៀងផ្ទាត់អត្តសញ្ញាណសាកស.ពទាំង៤១ ដោយពន្លឿនការធ្វើតេស្ត DNA និងពិនិត្យមើលឯកសារ ដើម្បីរកអោយឃើញថា តើការអះអាងរបស់ព្រះចៅអធិការត្រឹមត្រូវដែរឬក៏អត់?
លើសពីនេះ មន្ត្រីជំនាញក៏នឹងពិនិត្យផងដែរថា តើសាកស.ពនីមួយៗស្លា.ប់ដោយធម្មតា ឬខុសពីធម្មតា ។ បន្ថែមលើនេះ ប៉ូលិសក៏បានស្នើសូមឱ្យមន្ទីរធម្មការខេត្តពិចិត្រចុះទៅពិនិត្យថា តើការធ្វើសមាធិ ឬការធ្វើពិធីសាសនាដែលប្រើប្រាស់សាកស.ពបែបនេះត្រឹមត្រូវឬអត់?
គួរកត់សម្គាល់ថា ហេតុការណ៍រកឃើញសាកស.ព៤១ ប្រើសម្រាប់សមាធិ នៅខេត្តពិចិត្រ កើតមានឡើងរំលងគ្នាតែ២ថ្ងៃប៉ុណ្ណោះពីការរកឃើញសាកស.ពចំនួន១២ផ្សេងទៀតនៅក្នុងវត្តព្រៃស៊ីរីចាន់ នៅឯខេត្ត Kamphaeng Phet កាលពីថ្ងៃទី២០ ខែវិច្ឆិកា ដែលកំពុងត្រូវបានប៉ូលិសបើកការស៊ើបអង្កេតដូចគ្នា ។
ក្រៅពីរកឃើញសាកស.ពចំនួន៤១ នៅទីតាំងវត្តនោះក៏មានស្រះដ៏ធំមួយ ដែលមានក្រពើជាង៦០០ក្បាលត្រូវបានព្រះសង្ឃចិញ្ចឹម ដោយត្រូវបានគេអោយឈ្មោះថា ស្រះក្រពើបង្វឹកចិត្ត ។
បើតាមការអះអាងរបស់លោកអធិការស្រុកផូថាល បានបង្ហើបឱ្យដឹងថា តំបន់វត្តទាំងមូលមានផ្ទៃដីប្រហែល១០រ៉ៃ ជាដីដែលអ្នកភូមិបានប្រគេនព្រះសង្ឃ ដោយសាងសង់ជារោងចំនួន៤មានតែដំបូលគ្មានជញ្ជាំងសម្រាប់ជាកន្លែងសមាធិ ប៉ុន្តែទីទាំងវត្តនេះមិនមានការស្នើសុំច្បាប់បង្កើតវត្តជាផ្លូវការនោះទេ ៕
ចែករំលែកព័តមាននេះ