រាជធានីភ្នំពេញ ៖ ថ្លែងសារទៅកាន់មិត្តភិក្តបរទេសសម្តេចតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រីកម្ពុជា បានសុំការយោគយល់ចំពោះការប្រើកណ្តាប់ដៃដែក នាពេលកន្លងមកត្រួតត្រាទៅលើសភាពការណ៍ ដើម្បីកុំឲ្យមានបដិវត្តន៍ពណ៌កើតឡើង…
រាជធានីភ្នំពេញ ៖ ថ្លែងសារទៅកាន់មិត្តភិក្តបរទេសសម្តេចតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រីកម្ពុជា បានសុំការយោគយល់ចំពោះការប្រើកណ្តាប់ដៃដែក នាពេលកន្លងមកត្រួតត្រាទៅលើសភាពការណ៍ ដើម្បីកុំឲ្យមានបដិវត្តន៍ពណ៌កើតឡើង ដែលក្រុមប្រឆាំងធ្វើសកម្មភាពនានា ក្នុងទម្រង់ប្រឆាំងរាជរដ្ឋាភិបាល ។
ថ្លែងក្នុងសម័យប្រជុំពេញអង្គលើកទី១១ នៃសភាអន្តរជាតិ ដើម្បីភាពអត់ឱន និងសន្តិភាពដែលសភាកម្ពុជា ធ្វើជាម្ចាស់ផ្ទះ នាព្រឹកថ្ងៃ២៤ វិច្ឆិកាឆ្នាំ២០២៤ សម្តេចតេជោ បានលើកពីបញ្ហាសង្គ្រាមនាពេលកន្លងមក ដែលធ្វើឲ្យពលរដ្ឋខ្មែររងការឈឺចាប់ ដែលមកដល់បច្ចុប្បន្នត្រូវធ្វើយ៉ាងណាជៀសវាងកុំឲ្យមានសង្គ្រាមកើតឡើងទៀត ។
នៅចំពោះមុខបណ្តាថ្នាក់ដឹកនាំសភាអន្តរជាតិ សម្តេចតេជោហ៊ុន សែន បានគូសបញ្ជាក់ថា៖ «យើងខ្ញុំទទួលការឈឺចាប់វាលើសពីការគ្រប់គ្រាន់ហើយ យើងខ្ញុំអត់ត្រូវការនូវសង្គ្រាមណាមួយដែលត្រូវបង្កើតនៅកម្ពុជានោះទេ ដូច្នេះបានជាសុំការយោគយល់ពីប្រិយមិត្តបរទេស នៅពេលដែលហ៊ុន សែន ប្រើកណ្តាប់ដៃដែកកន្លងទៅ ដើម្បីត្រួតត្រាសភាពការណ៍កុំឲ្យបដិវត្តន៍ពណ៌កើតឡើង គឺដើម្បីធានានូវភាពសុខសាន្តរបស់ប្រជាជនកម្ពុជាតែប៉ុណ្ណោះ» ។
ជាមួយគ្នានេះ សម្តេចតេជោ ក៏បានលើកពីគុណសម្បត្តិនៃសន្តិភាពដែរថា សន្តិភាព គឺជាកិច្ចការសំខាន់ដែលត្រូវការពារ ដូច្នេះមុននិយាយអ្វីផ្សេងត្រូវនិយាយពីសន្តិភាពជាមុនសិន ព្រោះគ្មានសន្តិភាពមិនអាចធ្វើអ្វីបាននោះទេ ។
សម្តេចតេជោបានរំលឹកថា ទោះបីជាយ៉ាងណាប្រជាពលរដ្ឋមិនត្រូវមើលរំលងនូវកត្តាសន្តិភាពនោះទេ ព្រោះសន្តិភាពនាំមកនូវក្តីសុខដល់ពលរដ្ឋគ្រប់គ្នា ហើយកម្ពុជាត្រូវការសន្តិភាពជាចាំបាច់៕
ចែករំលែកព័តមាននេះ