ខេត្តព្រះសីហនុ ៖ នៅថ្ងៃទី២០ ខែវិច្ឆិកា ឆ្នាំ២០២៤ វេលាម៉ោង៣ៈ០០នាទី ស្នងការដ្ឋាននគរ បាលខេត្តព្រះសីហនុ ទទួលបានពាក្យបណ្តឹងថា មានបុរសជនជាតិចិន២នាក់…
ខេត្តព្រះសីហនុ ៖ នៅថ្ងៃទី២០ ខែវិច្ឆិកា ឆ្នាំ២០២៤ វេលាម៉ោង៣ៈ០០នាទី ស្នងការដ្ឋាននគរ បាលខេត្តព្រះសីហនុ ទទួលបានពាក្យបណ្តឹងថា មានបុរសជនជាតិចិន២នាក់ បានប្រើប្រាស់កាំភ្លើងខ្លី១ដើម(មិនស្គាល់ម៉ាក)ធ្វើសកម្មភាពបាញ់ទៅលើបុរសចិនម្នាក់បណ្តាលឲ្យរងរបួសធ្ងន់ នៅចំណុចបុរី BS.O5 ក្រុម១៧ ភូមិ៥ សង្កាត់លេខ៤ ក្រុងព្រះសីហនុ ។ បន្ទាប់ពីធ្វើសកម្មភាពរួច ក្រុមជនសង្ស័យបាននាំគ្នារត់គេចខ្លួនបាត់ ។
ក្រោយពីទទួលបានព័ត៌មាន នៅថ្ងៃទី២០ ខែវិច្ឆិកា ឆ្នាំ២០២៤ វេលាម៉ោង១៦ៈ០០នាទី ដោយអនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ កម្លាំងជំនាញរបស់នាយកដ្ឋាននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន អនុប្រធាននាយកដ្ឋាន បានដឹកនាំសហការជាមួយកម្លាំងជំនាញរបស់ស្នងការដ្ឋាននគរបាលខេត្តព្រះសីហនុ និងស្នងការដ្ឋាននគរបាលរាជធានីភ្នំពេញ ដោយឃាត់ខ្លួនបានជនសង្ស័យចំនួន៣នាក់ ។
ជនសង្ស័យទាំង៣នាក់រួមមាន
១-ឈ្មោះ ZHANG HAO ភេទប្រុស អាយុ៣៤ឆ្នាំ ជនជាតិចិន ។
២-ឈ្មោះ WANG SHENG HOU ភេទប្រុស អាយុ៤៦ឆ្នាំ ជនជាតិចិន ។
និង៣-ឈ្មោះ YANG OU ភេទប្រុស អាយុ៣៥ឆ្នាំ ជនជាតិចិន ។
វត្ថុតាងដកហូតបានរថយន្ដ៣គ្រឿង កាំភ្លើងខ្លីមួយដើម គ្រាប់ប្រភេទ380mm ចំនួន១០គ្រាប់ និងសម្បកកាទុស្ស១គ្រាប់ ខ្នោះដៃចំនួន២ ផ្លាកលេខរថយន្ដ២គូ និងទូរស័ព្ទដៃ២គ្រឿង ។
បច្ចុប្បន្ ជនសង្ស័យខាងលើ ត្រូវបាននាយកដ្ឋាននគរបាលព្រហ្មទណ្ឌ ប្រគល់ជូនស្នងការដ្ឋាននគរបាលខេត្តព្រះសីហនុ ដើម្បីបន្តនីតិវិធី ៕
ចែករំលែកព័តមាននេះ