ខេត្តស្វាយរៀង ៖ ករណីគ្រោះថ្នាក់ចរាចរណ៍ដ៏រន្ធត់មួយ បណ្តាលឱ្យកម្មការិនីម្នាក់ស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ធ្ងរបាក់ជើងទាំងពីរសន្លប់ស្តូកស្តឹង ហើយបានស្លាប់ពេលបញ្ជូនទៅដល់មន្ទីរពេទ្យខេត្តស្វាយរៀងគួរឲ្យសង្វេគ ។ ករណីនេះ កើតឡើងនៅវេលាម៉ោង៥និង១៤នាទីល្ងាចថ្ងៃទី២០ វិច្ឆិកា…
ខេត្តស្វាយរៀង ៖ ករណីគ្រោះថ្នាក់ចរាចរណ៍ដ៏រន្ធត់មួយ បណ្តាលឱ្យកម្មការិនីម្នាក់ស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ធ្ងរបាក់ជើងទាំងពីរសន្លប់ស្តូកស្តឹង ហើយបានស្លាប់ពេលបញ្ជូនទៅដល់មន្ទីរពេទ្យខេត្តស្វាយរៀងគួរឲ្យសង្វេគ ។ ករណីនេះ កើតឡើងនៅវេលាម៉ោង៥និង១៤នាទីល្ងាចថ្ងៃទី២០ វិច្ឆិកា ២០២៤ ស្ថិតនៅលើកំណាត់ផ្លូវជាតិលេខ៣១៤D ត្រង់ចន្លោះគីឡូម៉ែត្រលេខ១២_១៣ ខាងត្បូងវត្តព្រៃធ្លក ក្នុងភូមិព្រៃធ្លក ឃុំស្វាយតាយាន ស្រុកកំពង់រោទ៍ ។
បើតាមអ្នកឃើញហេតុការណ៍ផ្ទាល់ភ្នែកបានឲ្យដឹងថា មុនពេលកើតហេតុ គេឃើញស្ត្រី២នាក់ បានចុះពីលើរថយន្តដឹកកម្មករ (រថយន្តឈប់នៅលើចិញ្ចើមផ្លូវខាងស្តាំ) ខណៈស្ត្រីរងគ្រោះកំពុងដើរតាមលើចិញ្ចើមផ្លូវបម្រុងចូលទៅផ្ទះ ស្រាប់តែមានរថយន្តដឹកកម្មករកម្មការនីមួយគ្រឿងទៀត ម៉ាកហ៊ីយ៉ាន់ដាយ បើកពីទិសខាងជើងទៅត្បូង ស្របទិសគ្នាយ៉ាងលឿន ចាប់ហ្វ្រាំងមិនទាន់ក៏វ៉ាជែងរថយន្ត១គ្រឿងដែលឈប់ដាក់កម្មការិនីឲ្យចុះនោះ គឺវ៉ាខាងស្តាំ ក៏ជ្រុលទៅបុកជនរងគ្រោះទាំងពីរនាក់ពីក្រោយពេញទំហឹង រួចកិនពីលើ បណ្តាលឲ្យស្ត្រីម្នាក់បាក់ខ្ទេចត្រឹមចង្កេះទៅក្រោមស្លាប់ភ្លាមៗនៅនិងកន្លែង និងស្ត្រីម្នាក់ទៀតកិនបាក់ភ្លៅទាំងពីសន្លប់ស្តូកស្តឹងនៅនិងកន្លែង ហើយបានស្លាប់ពេលបញ្ជូនទៅដល់មន្ទីរពេទ្យខេត្តស្វាយរៀង។
ចំពោះមូលហេតុមកពីរថយន្តបង្កបើកបរល្បឿនលឿនវ៉ាជែងខាងស្តាំខ្វះការប្រុងប្រយត្ន័ ក៏ជ្រុលទៅបុកស្ត្រីរងគ្រោះទាំង២នាក់ពីក្រោយហើយកិនចំពីលើគួឲ្យញាក់សាច់ ។ ប្រភពបន្តថា ក្រោយពីបុកហើយកិនស្ត្រីរងគ្រោះទាំងពីររួច អ្នកបើកបររថយន្តបង្កបានបើកទ្វាររត់គេចខ្លួនពីកន្លែងកើតហេតុភ្លាមៗ បន្សល់ទុកតែរថយន្តនៅកន្លែងកើតហេតុ ។ ក៏ប៉ុន្តែសមត្ថកិច្ចបានឲ្យដឹងថា បានស្គាល់អត្តសញ្ញាណហើយ ជនសង្ស័យមានទីលំនៅភូមិព្ររបឹស ឃុំត្នោតស្រុកកំពង់រោទ៌ សមត្ថកិច្ចកំពុងស្រាយជ្រាវ ដើម្បីចាប់ឃាត់ខ្លួនមកដោះស្រាយតាមនីតិវិធី។
រីឯសពស្ត្រីរងគ្រោះទាំងពីរនាក់ សមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី(ស្ត្រីរងគ្រោះទាំងពីគឺនៅផ្ទះក្បែគ្នា)។ មហាជនបានលើកឡើងថា អ្នកបើកបររថយន្តដឹកកម្មករភាគច្រើនបើកបរល្បឿនលឿន ខ្វះក្រមសីលធម៌ណាស់ បើកវ៉ាជែងគ្នាឆ្វេងស្តាំ មិនគោរពច្បាប់ចរាចរណ៍ ដូច្នេះ សូមអំពាវនាវដល់អាជ្ញាធរមានសមត្ថកិច្ចមេត្តាពិនិត្យ និងរឹតបន្តឹងច្បាប់ចរាចរណ៍ដល់អ្នកបើកបររថយន្តដឹកកម្មករកម្មកានី កុំឲ្យបន្តល្មើសច្បាប់ចរាចរណ៍បន្តទៀត ។
ចែករំលែកព័តមាននេះ