ខេត្តកំពង់ឆ្នាំង ៖ អ្នកទាក់និងវាយសត្វឆ្មាម្នាក់ក្នុងចំណោម២នាក់ ត្រូវបានសមត្ថកិច្ចនគរបាលក្បាលក្រុងកំពង់ឆ្នាំង ស្ទាក់ចាប់បាន ជាមួយវត្ថុតាងសត្វឆ្មាងាប់ចំនួន ៨ក្បាល កាលពីវេលារំលងអាធ្រាត្រ ឈានចូលថ្ងៃទី ១៣…
ខេត្តកំពង់ឆ្នាំង ៖ អ្នកទាក់និងវាយសត្វឆ្មាម្នាក់ក្នុងចំណោម២នាក់ ត្រូវបានសមត្ថកិច្ចនគរបាលក្បាលក្រុងកំពង់ឆ្នាំង ស្ទាក់ចាប់បាន ជាមួយវត្ថុតាងសត្វឆ្មាងាប់ចំនួន ៨ក្បាល កាលពីវេលារំលងអាធ្រាត្រ ឈានចូលថ្ងៃទី ១៣ ខែវិច្ឆិកា ឆ្នាំ២០២៤ នៅភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ។
លោក ឆាយ ខេមរ័ត្ន អធិការនគរបាលក្រុងកំពង់ឆ្នាំង បានបញ្ជាក់ថា ដោយទទួលបានព័ត៌មានពីប្រជាពលរដ្ឋដែលតែងតែរាយការណ៍អំពីការបាត់សត្វចិញ្ចឹម មានសត្វឆ្មា សត្វឆ្កែនៅពេលយប់ ព្រមទាំងសាក្សីបញ្ជាក់ពីភិនភាគរបស់ក្រុមអ្នកទាក់ឆ្មានិងឆ្កែផងនោះ ទើបយប់ថ្ងៃទី ១២ ខែ វិច្ឆិកាឆ្នាំ ២០២៤ កម្លាំងសមត្ថកិច្ចរបស់លោក សហការជាមួយគ្រប់បណ្ដាប៉ុស្តិ៍រដ្ឋបាលទាំង៤ ក្នុងក្រុងកំពង់ឆ្នាំង ចេញប្រតិបត្តិការតាមផ្លូវក្នុងក្រុង គ្រប់ច្រកល្ហក ក៏បានប្រទះឃើញជនសង្ស័័យ ចំនួន២នាក់ជិះម៉ូតូមួយគ្រឿង(ម៉ូតូឆ្អឹង)នៅចំណុចភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ។
ក្រោយឃើញសមត្ថកិច្ចភ្លាម ជនសង្ស័យក៏បានបើកម៉ូតូរត់គេចមកដល់ដីឡូតិ៍មួយកន្លែង បានទុកម៉ូតូចោលជាមួយនឹងការ៉ុងធំមួយ ហើយរត់គេចខ្លួន តែសមត្ថកិច្ចព្យាយាមបន្តដេញចាប់បានជនសង្ស័យម្នាក់ក្នុងចំណោម២នាក់ ។
ក្រោយការឃាត់ខ្លួន ក៏បានឆែកនៅក្នុងការ៉ុងឃើញសត្វឆ្មាងាប់ ដែលប្រឡាក់ដោយឈាម ចំនួន ៨ក្បាល ដំបងសម្រាប់វ៉ៃឆ្កែ ប្រវែង១,៤០ម៉ែត្រមួយ និងម៉ូតូមួយគ្រឿង។
ជនសង្ស័យមាន ឈ្មោះ យុន សុីឆាង អាយុ ២៥ ឆ្នាំ មានទីលំនៅភូមិអូរសណ្ដាន់ ឃុំទឹកហូត ស្រុករលាប្អៀរ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនគេពិតជាធ្លាប់ធ្វើសកម្មភាពវាយសត្វឆ្មាជាច្រើនលើក ហើយបានយកទៅលក់នៅភូមិអូរសណ្ដាន់ ដោយក្នុង១ក្បាលបានតម្លៃពី ១ម៉ឺន ទៅ១ម៉ឺន៥ពាន់រៀល ។
ជនសង្ស័យបានសារភាពបន្តទៀតថា ចំពោះវិធីដែលប្រើក្នុងការវាយសត្វឆ្មា គឺពេលជិះម៉ូតូទៅឃើញឆ្មា ក៏បានចាំងភ្លើងពិលឲ្យចំមុខឆ្មា ពេលនោះឆ្មានៅស្ងៀមភ្នែកសម្លឹងមើលភ្លើងពិល ឆ្លៀតឱកាសនោះ ដៃគូម្នាក់ទៀតបានយកដំបងវាយឆ្មាសម្លាប់នឹងរើសច្រកក្នុងការ៉ុងតែម្ដង។ ជាមធ្យម ពួកគេចេញវាយសត្វឆ្មាមួយយប់បានពី៨ ទៅ១០ក្បាល។
ជនសង្ស័យបានសារភាពបន្តទៀតថា ក្រោយពេលវាយឆ្មាបានហើយ គឺយកទៅលក់ឲ្យអ្នកភូមិអូរសណ្ដាន់ឃុំទឹកហូត ដែលជាកន្លែងយកសត្វឆ្មាលក់ នៅតាមបណ្ដោយផ្លូវជាតិលេខ៥ហើយប្រាប់អតិថិជនថាជាសត្វខ្លាត្រី ។ នៅម្ដុំត្រង់នោះ ពុំមានខ្លាត្រីលក់ច្រើនដូច ការដាក់តាំងលក់សត្វឆ្មា ដូចសព្វថ្ងៃនេះទេ។ តែបើមានខ្លាត្រី មួយៗ គេនឹងទុកទាំងរោមដើម្បីឲ្យអ្នកទិញគេស្គាល់ច្បាស់ជាខ្លាត្រីមែន។
គួររំលឹកដែរថា នៅតាមបណ្ដោយផ្លូវជាតិលេខ ៥ ចំណុចភូមិអូរសណ្ដាន់ ឃុំទឹកហូត ស្រុករលាប្អៀរ គេតែងឃើញមានការដាក់តាំងលក់សត្វព្រៃ មានដូចជាសត្វស្លាប សត្វចតុបាតជាដើម ដោយឡែកសត្វឆ្មាគេបានយកមកបន្លំ ធ្វើជាសត្វខ្លាត្រីកុហកអ្នកទិញ ហើយក៏មានសត្វខ្លះទៀតក៏ត្រូវបានបន្លំដែរដូចជាសត្វក្រួចធ្វើសត្វលលកជាដើម។ក្រៅពីនោះ នៅមានសត្វពស់ និងអណ្ដើកជាដើម ។ យូរៗម្ដងគេឃើញសមត្ថកិច្ចជំនាញទៅបង្ក្រាបម្តងហើយ ក្រោយមក នៅតែឃើញមានដាក់តាំងលក់បន្តទៀតដដែល។ នេះក៏ជាសារថ្មីទៀត សម្រាប់អ្នកដែលចូលចិត្តទិញសត្វឆ្មាដែលអ្នកលក់កុហកថាជាខ្លាត្រីយកទៅបរិភោគ ៕
ចែករំលែកព័តមាននេះ