ទីក្រុងវ៉ាស៊ីនតោន៖ អនាគតប្រធានាធិបតីអាមេរិក លោកត្រាំ បានតែងតាំងលោកអ៊ីឡនម៉ាស់ដើម្បីដឹកនាំក្រសួងដែលទើបបង្កើតថ្មីឈ្មោះ «ក្រសួងរៀបចំប្រសិទ្ធភាពរដ្ឋាភិបាល» ដើម្បីរុះរើប្រព័ន្ធការិយាធិបតេយ្យ ឬការិយាល័យនិយមនៅប្រទេសអាមេរិក។ លោកត្រាំក៏តែងតាំងពិធីកររបស់ទូរទស្សន៍ហ្វក់ញូ (Fox News)…
ទីក្រុងវ៉ាស៊ីនតោន៖ អនាគតប្រធានាធិបតីអាមេរិក លោកត្រាំ បានតែងតាំងលោកអ៊ីឡនម៉ាស់ដើម្បីដឹកនាំក្រសួងដែលទើបបង្កើតថ្មីឈ្មោះ «ក្រសួងរៀបចំប្រសិទ្ធភាពរដ្ឋាភិបាល» ដើម្បីរុះរើប្រព័ន្ធការិយាធិបតេយ្យ ឬការិយាល័យនិយមនៅប្រទេសអាមេរិក។ លោកត្រាំក៏តែងតាំងពិធីកររបស់ទូរទស្សន៍ហ្វក់ញូ (Fox News) លោកភីធី ហេកសិទ្ធិជារដ្ឋមន្ត្រីការពារជាតិ។
លោកអ៊ីឡនម៉ាស់រួមគ្នាជាមួយលោកវិវេក រ៉ាម៉ាស្វាមី (Vivek Ramaswamy) នឹងក្លាយជាអ្នកនាំមុខគេនៅក្នុងការរុះរើប្រព័ន្ធការិយាល័យនិយមរបស់រដ្ឋាភិបាល, កាត់បន្ថយរបៀបធ្វើការដែលមានច្បាប់ទម្លាប់ច្រើនពេក, កាត់បន្ថយការចំណាយខ្ជះខ្ជាយថវិកាជាតិ និងរៀបចំរចនាសម្ព័ន្ធ និងរបៀបធ្វើការនៅក្នុងស្ថាប័នជាតិឡើងវិញ។ ខាងលើនេះជាអ្វីដែលោកត្រាំសរសេររៀបរាប់នៅក្នុងសេចក្ដីប្រកាសរបស់លោក។
លោកម៉ាស់បានក្លាយជាសម្ព័ន្ធមិត្តដ៏សំខាន់ម្នាក់របស់លោកត្រាំ។ គ្រាន់តែ១រដូវកាលឃោសនាបោះឆ្នោតរបស់លោកត្រាំថ្មីៗនេះ លោកម៉ាស់ដៃធំមែនទែន ហ៊ានចំណាយលុយហោប៉ៅផ្ទាល់ខ្លួន១០០លានដុល្លារដើម្បីជួយជ្រោមជ្រែងលោកត្រាំឱ្យឈ្នះឆ្នោត។ មិនត្រឹមតែជួយជាលុយកាក់ប៉ុណ្ណោះទេ លោកក៏មានបណ្ដាញសង្គមអ៊ិចផងដែរ។ ដូច្នេះ លោកប្រើអ៊ិចនេះដើម្បីជួយឃោសនាឱ្យលោកត្រាំថែមទៀត។
លោកត្រាំថ្លែងថាលោកម៉ាស់ និងលោករ៉ាម៉ាស្វាមី នឹងដឹកនាំក្រសួងរៀបចំប្រសិទ្ធភាពរដ្ឋាភិបាល។ យោងតាមលោកត្រាំ ក្រសួងថ្មីនេះនឹងដើរតួនាទីជាអ្នកពិគ្រោះ និងផ្ដល់យោបល់ក្នុងនាមជាអ្នកនៅខាងក្រៅក្របខណ្ឌរដ្ឋាភិបាល។ ក្រសួងនេះនឹងបញ្ជូនសារទៅប្រព័ន្ធដឹកនាំរដ្ឋាភិបាលទាំងមូល។ លោកត្រាំចាត់ទុកគម្រោងបង្កើតក្រសួងថ្មីនេះប្រៀបបាននឹងគម្រោងម៉ាន់ហាថាន់ (The Manhattan Project)។ ម៉ាន់ហាថាន់ជាផែនការផលិតគ្រាប់បែកនុយក្លេអ៊ែរអាមេរិកកាលពីអំឡុងសង្គ្រាមលោកលើកទី២។
កងទ័ពរបស់យើងនឹងអស្ចារ្យម្ដងទៀត
លោកត្រាំថ្លែងថាលោកបានជ្រើសរើសលោកភីធី ហេកសិទ្ធិជារដ្ឋមន្ត្រីការពារជាតិនៅអាណត្តិថ្មី។ លោកសិទ្ធិជាអ្នកធ្វើអត្ថាធិប្បាយនយោបាយតាមកញ្ចក់ទូរទស្សន៍ហ្វក់ (Fox) និងក៏ជាទាហានជើងចាស់ម្នាក់ផងដែរ។ លោកត្រាំចាត់ទុកលោកភីធី សិទ្ធិជាមនុស្សឆ្លាតវាងវៃ និងជាអ្នកដែលមានជំនឿយ៉ាងពិតប្រាកដថាអាមេរិកត្រូវតែតម្កល់ផលប្រយោជន៍អាមេរិកទី១។
លោកធ្លាប់បំពេញបេសកកម្មនៅអាហ្វហ្កានីស្ថាន, អ៊ីរ៉ាក់ និងឆកសមុទ្រខ្វានតាណាម៉ូ (Guantanamo) នៃប្រទេសគុយបា។ លោកត្រាំថ្លែងថានៅពេលលោកហេកសិទ្ធិឡើងធ្វើជាប្រមុខការពារជាតិអាមេរិក ពួកបច្ចាមិត្តរបស់អាមេរិកមិនអាចឡើងចាង និងធ្វើខ្លាំងដៃបានឡើយ។ កងទ័ពរបស់យើងនឹងអស្ចារ្យម្ដងទៀត។ អាមេរិកគ្មានថ្ងៃដកថយជាដាច់ខាត៕
ចែករំលែកព័តមាននេះ