រាជធានីភ្នំពេញ ៖ រថយន្តដឹកឥដ្ឋ មួយគ្រឿង បានទាញចង្កូត គេចរថយន្តម៉ាកឡិចស៊ិស៥៧០ មួយគ្រឿង បត់ឆ្លងផ្លូវ ហើយរេចង្កូតទៅចូលចំណែកផ្លូវម្ខាងបុករះរថយន្តម៉ាកឡិចស៊ីសមួយគ្រឿង, ម៉ូតូកង់បីមួយគ្រឿង…
រាជធានីភ្នំពេញ ៖ រថយន្តដឹកឥដ្ឋ មួយគ្រឿង បានទាញចង្កូត គេចរថយន្តម៉ាកឡិចស៊ិស៥៧០ មួយគ្រឿង បត់ឆ្លងផ្លូវ ហើយរេចង្កូតទៅចូលចំណែកផ្លូវម្ខាងបុករះរថយន្តម៉ាកឡិចស៊ីសមួយគ្រឿង, ម៉ូតូកង់បីមួយគ្រឿង និងម៉ូតូមួយគ្រឿង ក្នុងទិសដៅបញ្ច្រាសគ្នា បណ្ដាលឲ្យរងរបួសស្រាលចំនួន៣នាក់ ហើយរថយន្តបានជ្រុលចង្កូតឡើងចិញ្ចើមផ្លូវ ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១០និង២៥នាទីព្រឹកថ្ងៃទី១២ ខែវិច្ឆិកា ឆ្នាំ២០២៤ នៅមុខសាលាបឋមសិក្សាភ្នំពេញថ្មី ស្ថិតនៅតាមបណ្ដោយផ្លូវភ្នំពេញហាណូយ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
រថយន្ត ដែលបង្កគ្រោះថ្នាក់នោះ ម៉ាក ហ៊ីយ៉ាន់ដាយ ដឹកឥដ្ឋ ពណ៌ស ទ្រុងខៀវ ពាក់ផ្លាកលេខតាកែវ 3A-4074 បើកបរដោយបុរសម្នាក់ រួមដំណើរដោយប្រពន្ធ និងកូន ព្រមទាំងកម្មករ ។ ចំណែកឯ មធ្យោបាយ ៣គ្រឿងទៀត ដែលរងការខូចខាត រួមមាន ៖ ១. ម៉ូតូហុងដាឌ្រីមសង់ ១គ្រឿង ពាក់ស្លាកលេខ ភ្នំពេញ 1GB-2042 ជិះដោយបុរសម្នាក់រងរបួសស្រាល ។ ២. រថយន្តម៉ាក ឡិចស៊ី RX ៣០០ ពណ៌ទឹកមាស ពាក់ស្លាកលេខ សៀមរាម 2C-1906 មានមនុស្សមួយគ្រួសារ ៤នាក់ រងរបួសស្រាលស្ត្រីម្នាក់ ។ ៣. កង់បីឥណ្ឌា ពណ៍ស ពាក់ស្លាកលេខ ភ្នំពេញ (ត) 1HM-1835 ម្ចាស់កងបីរងរបួសស្រាល ។
តាមសាក្សី បានឲ្យដឹងថា នៅមុនពេលកើតហេតុ គេឃើញរថយន្តដឹកឥដ្ឋ មួយគ្រឿងខាងលើ បានធ្វើដំណើរតាមបណ្ដោយផ្លូវភ្នំពេញហាណូយ ក្នុងទិសដៅពីជើង ទៅត្បូង នៅពេលធ្វើដំណើរមកដល់ចំណុចកើត ក៏បានរេចង្កូតទៅឆ្វេងដៃ ចូលចំណែកផ្លូវម្ខាង ទៅបុករះរថយន្តម៉ាកឡិចស៊ីស RX៣០០ មួយគ្រឿង, ម៉ូតូ១គ្រឿង និងម៉ូតូកង់បីឥណ្ឌាមួយគ្រឿង ដែលធ្វើដំណើរ ក្នុងទិសដៅបញ្ច្រាស់ទិសគ្នា បណ្ដាលឱ្យអ្នកជិះម៉ូតូកង់បីម្នាក់ និងស្ត្រីម្នាក់ជិះក្នុងរថយន្ត បានរងរបួសស្រាល ហើយរថយន្តបង្ក ក៏បានរុញម៉ូតូកង់បីជ្រុលឡើងចិញ្ចើមផ្លូវ ។
តាមអ្នកបើកបរ បានអោយដឹងថា មូលហេតុ ដែលនាំឲ្យកើតមានគ្រោះថ្នាក់នេះ ដោយសារតែវាក់នឹងរថយន្តម៉ាក់ឡិចស៊ីស៥៧០មួយគ្រឿង បើកឆ្លងផ្លូវ ហើយគាត់បានជាន់ហ្វាំងមិនស៊ី ក៏ទាញចង្កូតគេច ហើយជ្រុលបង្កទៅជាគ្រោះថ្នាក់តែម្ដង ។
ភ្លាមៗ នគរបាលមូលដ្ឋាន ក៏បានចុះទៅសម្របសម្រួល និងទាក់ទង ហៅនគរបាលចរាចរណ៍ ចុះមកវាស់វែងបញ្ជូនយានយន្តទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយសងការខូចខាត ៕
ចែករំលែកព័តមាននេះ