ACU ឃាត់ខ្លួនលោក ឡាយ វិសិដ្ឋ អភិបាលរងខេត្តពោធិ៍សាត់ និងលោក កន សុខកាយ អតីតអភិបាលស្រុកល្វាឯម
រាជធានីភ្នំពេញ ៖ លោក ឡាយ វិសិដ្ឋ អភិបាលរង ខេត្តពោធិ៍សាត់ និងលោក កន សុខកាយ…
រាជធានីភ្នំពេញ ៖ លោក ឡាយ វិសិដ្ឋ អភិបាលរង ខេត្តពោធិ៍សាត់ និងលោក កន សុខកាយ អតីតអភិបាលស្រុកល្វាឯម ត្រូវបានអង្គភាពប្រឆាំងអំពើពុករលួយ ACU សម្រេចឃាត់ខ្លួនបន្ទាប់ពីយកលុយទៅសូកប៉ាន់ រត់ការយកតំណែងតាមរយៈលោក លី សាម៉េត និងលោក ឡាច សំរោង។
តាមព័ត៌មានឱ្យដឹងថា លោកឡាយ វិសិដ្ឋ អភិបាលរង ខេត្តពោធិ៍សាត់ បានយកលុយចំនួន ៥៧ម៉ឺនដុល្លារ សូកប៉ាន់ រត់ការចង់បានតំណែងតាមរយៈលោក លី សាម៉េត និងលោក ឡាច សំរោង ។ ក្រោយបញ្ចប់ការសាកសួរ, អង្គភាពប្រឆាំងអំពើពុករលួយ បានបញ្ជូនខ្លួនលោក ឡាយ វិសិដ្ឋ ទៅតុលាការហើយ នាព្រឹកថ្ងៃទី១២ ខែវិច្ឆិកា ឆ្នាំ២០២៤នេះ ។
ដោយឡែក លោក កន សុខកាយ អតីតអភិបាលស្រុកល្វាឯម ក៏ត្រូវបានអង្គភាពប្រឆាំងអំពើពុករលួយ ACU ឃាត់ខ្លួនផងដែរ ក្រោយយកលុយចំនួន ៣០ម៉ឺនដុល្លារ រត់ការចង់បានតំណែងតាមរយៈលោក លី សាម៉េត និងលោក ឡាច សំរោង ។
តាមព័ត៌មានឲ្យដឹងថា បន្ទាប់ពីសាកសួរ លោក កន សុខកាយ អតីតអភិបាលស្រុកល្វាឯម ត្រូវបានបញ្ជូនទៅកាន់សាលាដំបូងរាជធានីភ្នំពេញ នៅវេលារសៀលថ្ងៃទី១២ ខែវិច្ឆិកា ឆ្នាំ២០២៤នេះ ។
គួរបញ្ជាក់ថា កាលពីថ្ងៃទី៨ ខែតុលា ឆ្នាំ២០២៤ លោក កន សុខកាយ ត្រូវបានសម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានចេញអនុក្រឹត្យបញ្ចប់មុខតំណែង បន្ទាប់ពីសម្ដេចតេជោទម្លាយរឿងលោក លី សាម៉េត ហៅគ្រូមា បោកលុយលោកអស់ ៣០ម៉ឺនដុល្លារ ។
ពាក់ព័ន្ធនឹងការសូកប៉ាន់ រត់ការចង់បានតំណែងនេះ អង្គភាពប្រឆាំងអំពើពុករលួយ ក៏បានសម្រេចឃាត់ខ្លួនលោក មួង ឃីម អតីតឧត្តមសេនីយ៍ចូលនិវត្តន៍ និងលោកឧកញ៉ា អ៊ុត ធី ហើយត្រូវបានតំណាងអយ្យការ សម្រេចចោទប្រកាន់ជាផ្លូវការរួចហើយ ៕
ចែករំលែកព័តមាននេះ