រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្តែងក្តីសង្ឃឹមថា រឿងបាយឆានៅក្នុងខេត្តកែប នឹងមិនកើតមានទៀតនោះឡើយ នឹងឲ្យខេត្ត…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្តែងក្តីសង្ឃឹមថា រឿងបាយឆានៅក្នុងខេត្តកែប នឹងមិនកើតមានទៀតនោះឡើយ នឹងឲ្យខេត្ត ដែលមានសក្ដានុពលទេសចរណ៍ ត្រូវបង្កើតក្រុមការងាររងចាំឆ្លើយតបចំពោះបញ្ហាអ្នកទេសចរ ។
ការថ្លែងបែបនេះ ធ្វើឡើងក្នុងឱកាសសម្តេចបវរធិបតី ហ៊ុន ម៉ាណែត អញ្ជើញសម្ពោធដាក់ឱ្យប្រើប្រាស់ជាផ្លូវការ «វិថីតេជោសន្តិភាពឆ្នេរអង្កោល» ស្ថិតនៅតាមបណ្ដោយឆ្នេរអង្កោល ស្រុកដំណាក់ចង្អើរ ខេត្តកែប នាព្រឹកថ្ងៃទី១១ ខែវិច្ឆិកា ឆ្នាំ២០២៤ ។
សម្ដេចបវរធិបតី បានរំឭកថា សម្ដេចទើប តែបានផ្ដល់គោលការណ៍បង្កើតក្រុមខេត្តទេសចរណ៍ ដូចជាក្រុមនិរតីមានខេត្តកែប ខេត្តកំពត ខេត្តព្រះសីហនុ និងខេត្តកោះកុង។ ក្រុមឧត្តរមានខេត្តសៀមរាប ខេត្តបន្ទាយមានជ័យ ខេត្តឧត្តរមានជ័យ និងខេត្តព្រះវិហារ។ ក្រុមឦសាន មានខេត្តក្រចេះ ខេត្តស្ទឹងត្រែង ខេត្តមណ្ឌលគិរី និងខេត្តរតនគិរី។ គោលដៅ នៃការបង្កើតក្រុមខេត្តនេះ គឺដើម្បីរួមគ្នាបង្កើតជាសហថាមពល បង្កើតឱ្យមានកម្មវិធីទេសចរណ៍ ឱ្យបានច្រើន បង្កើតកញ្ចប់ទេសចរណ៍រួមគ្នា ចែកគោលដៅឱ្យភ្ញៀវទេស ចរណ៍ទៅទស្សនា ។
ជាមួយគ្នានោះដែរ សម្ដេចបវរធិបតី ក៏បានណែនាំជំរុញដល់រដ្ឋបាលខេត្តនានា ពិសេសខេត្តដែលមានសក្ដានុពលទេសចរណ៍ ត្រូវយកចិត្តទុកដាក់ចំពោះបញ្ហាសេវាកម្ម តម្លៃ គុណ ភាព ក៏ដូចជាតម្រូវការរបស់អ្នកទេសចរ ។
សម្ដេចបវរធិបតី បានផ្ដាំផ្ញើទៅអភិបាលខេត្តកែបថា កុំឱ្យរឿងបាយឆាមួយចាន កើតឡើងទៀត ។ សម្ដេចបវរធិបតីថ្លែងថា «ប្រសិនបើមានបញ្ហា រដ្ឋបាលខេត្ត ត្រូវចាត់ការ ត្រូវប្រតិកម្មរហ័ស បំភ្លឺជូនភ្ញៀវទេសចរ ប្រជាពលរដ្ឋឱ្យបានភ្លាមៗ តួយ៉ាងដូចរឿងករណីបាយឆា នៅខេត្តកែប កាលពីពេលកន្លងទៅ» ។
សម្តេចមហាបវធិបតី ហ៊ុន ម៉ាណែត បានបញ្ជាក់ទៀតថា អភិបាលខេត្ត ត្រូវមានចក្ខុវិស័យច្បាស់លាស់ ត្រូវតាមដាន ហើយទទួលខុសត្រូវ មើលថា ក្នុងខេត្តរបស់ខ្លួនមានសក្ដានុពលអ្វីខ្លះ ត្រូវរៀបចំដាក់ផែនការ អភិវឌ្ឍឱ្យបានត្រឹមត្រូវ។ មួយវិញទៀត មន្ត្រីរាជការ ដៃគូអភិវឌ្ឍ ប្រតិបត្តិករ ក៏ត្រូវចូលរួមអនុវត្តប្រកបដោយភាពស្មោះត្រង់ និងម៉ឺងម៉ាត់តាមផែនការ ដែលបានដាក់ចេញ។ ចំពោះប្រជាពលរដ្ឋ អាជីវករ វិស័យឯកជន ក៏ត្រូវសហការចូលរួមជាមួយអាជ្ញាធរ មន្ទីរ អង្គភាពជំនាញផងដែរ ដើម្បីរួមគ្នាឱ្យខេត្តរបស់ខ្លួនកាន់តែមានភាពទាក់ទាញបន្ថែមទៀត ៕
ចែករំលែកព័តមាននេះ