ទីក្រុងប៉េកាំង៖ ប្រទេសចិនមានសារនយោបាយសំខាន់ៗនៅថ្ងៃនេះបន្ទាប់ពីទទួលដំណឹងថាលោកត្រាំបានឈ្នះអង្គបោះឆ្នោតលើសពីចំនួនកំណត់ដើម្បីក្លាយជាប្រធានាធិបតីនៅអាណត្តិថ្មី។ រដ្ឋាភិបាលចិន តាមរយៈក្រសួងការបរទេសរបស់ខ្លួន សង្ឃឹមថាចិន និងអាមេរិកនឹងរួមរស់នៅជាសន្តិសហវិជ្ជមានជាមួយគ្នា។ ភាសានេះក៏ធ្លាប់ត្រូវអតីតសហភាពប្រើប្រាស់ផងដែរកាលពីសម័យសង្គ្រាមត្រជាក់។
អ្នកនាំពាក្យចិន លោកស្រីម៉ៅនីង (Mao Ning) ថ្លែងថាយើងនឹងបន្តរក្សាទំនាក់ទំនងរវាងចិន និងអាមេរិកដោយផ្អែកទៅលើគោលការណ៍គោរពគ្នាទៅវិញទៅមក, សន្តិសហវិជ្ជមាន និងនយោបាយឈ្នះ-ឈ្នះ។ លោកស្រីបញ្ជាក់ថានយោបាយការបរទេសរបស់ចិនចំពោះប្រទេសអាមេរិកមិនប្រែប្រួលទេ គឺរក្សាជំហរដដែលដូចកាលពីជំនាន់លោកបៃដិនដូច្នេះដែរ។
លោកស្រីម៉ៅនីងមិនបានធ្វើអត្ថាធិប្បាយពាក់ព័ន្ធនឹងការទទួលជ័យជម្នះរបស់លោកត្រាំទេ។ លោកស្រីនិយាយនៅក្នុងន័យទូទៅថាដំណើរការបោះឆ្នោតប្រធានាធិបតីនៅអាមេរិកជាកិច្ចការផ្ទៃក្នុងរបស់អាមេរិក។ ចង់មានន័យថាប្រទេសចិនប្រកាន់នយោបាយការបរទេសមិនជ្រៀតជ្រែកកិច្ចការប្រទេសដទៃ ឬធ្វើអត្ថាធិប្បាយថែមថយអ្វីទេ។ សំខាន់គឺអ្នកណាឈ្នះឆ្នោត ប្រទេសចិននឹងធ្វើការជាមួយអ្នកនោះ។
លោកស្រីថ្លែងបន្តទៀតថាបន្ទាប់ពីការបោះឆ្នោតនេះចេញលទ្ធផលចុងក្រោយ និងប្រកាសលទ្ធផលជាផ្លូវការ យើងនៅតែបន្តដោះស្រាយបញ្ហាតាមធម្មតាដូចដែលយើងធ្លាប់ធ្វើកាលពីពេល។ លោកស្រីថ្លែងដូច្នេះតបទៅនឹងសំណួររបស់អ្នកសារព័ត៌មានដែលថាតើប្រមុខដឹកនាំចិន លោកស៊ីជីនពីង នឹងហៅទូរស័ព្ទទៅលោកត្រាំដើម្បីអបអរសាទរការឈ្នះឆ្នោតនេះដែរឬទេ?
តាមពិត ប្រទេសចិនតាមដានដំណើរការបោះឆ្នោតនៅអាមេរិកដោយយកចិត្តទុកដាក់បំផុត។ គិតត្រឹមម៉ោង៤ល្ងាចថ្ងៃពុធ ប្រជាជនចិនគ្រប់ស្រទាប់វណ្ណៈពិភាក្សាគ្នាយ៉ាងផុលផុសអំពីការបោះឆ្នោតនេះនៅបណ្ដាញវេបូ (Weibo)។ តាំងពីមុនការបោះឆ្នោតនេះ បេក្ខជនរបស់គណបក្សទាំង២របស់អាមេរិកបានប្រកាសអំពីការប្រកាន់ជំហរក្ដៅចំពោះប្រទេសចិនជានិច្ច។
ត្រាំប្រកាសថាលោកនឹងដំឡើងពន្ធគយ៦០%ទៅលើទំនិញរបស់ចិនដែលនាំចូលប្រទេសអាមេរិក។ ដូច្នេះគេគិតថាសង្គ្រាមពាណិជ្ជកម្មរវាងចិន និងអាមេរិកនឹងចាប់ផ្ដើមសាជាថ្មី។ រឿងនេះច្បាស់ណាស់។ ប្រទេសចិនក៏រំពឹងថាបញ្ហានេះនឹងកើតឡើងផងដែរ។ អ្នកលេងបណ្ដាញសង្គមរបស់ចិនបង្ហោះសាររបស់ខ្លួនថាសង្គ្រាមពាណិជ្ជកម្មចាប់ផ្ដើមផ្ទុះឡើងទៀតហើយ។
អ្នកលេងបណ្ដាញសង្គមខ្លះសរសេររៀបរាប់ថាក្រុមគ្រួសាររបស់ខ្លួនត្រូវនាំទំនិញទៅលក់នៅទីផ្សារអន្តរជាតិ។ បើលោកត្រាំដំឡើងពន្ធគយម្លឹងៗពួកគេត្រូវតែផ្លាស់ប្ដូរមុខរបរ ឬរកការងារផ្សេងដើម្បីធ្វើហើយទើបបាន។ អ្នកខ្លះទៀតសរសេរថាត្រឹមតែដំឡើងពន្ធ២០%ក៏យំលែងចេញទៅហើយ កុំថាឡើយដល់ទៅដំឡើង៦០%។ ដូច្នេះហើយពួកយើងគួរតែរកការងារផ្សេងធ្វើជាបណ្ដើរៗទៅ៕
ចែករំលែកព័តមាននេះ