រាជធានីភ្នំពេញ ៖ មុននេះបន្តិច នាល្ងាចថ្ងៃទី០៥ ខែវិច្ឆិកា ឆ្នាំ២០២៤នេះ ចៅក្រមស៊ើបសួរសាលាដំបូងរាជធានីភ្នំពេញ លោក ថោង ផល្លារង្សី…
រាជធានីភ្នំពេញ ៖ មុននេះបន្តិច នាល្ងាចថ្ងៃទី០៥ ខែវិច្ឆិកា ឆ្នាំ២០២៤នេះ ចៅក្រមស៊ើបសួរសាលាដំបូងរាជធានីភ្នំពេញ លោក ថោង ផល្លារង្សី បានសម្រេចចេញដីកាបង្គាប់ឲ្យឃុំខ្លួនលោក លី សាម៉េត ហៅគ្រូមា ដាក់ពន្ធនាគារ “មណ្ឌលអប់រំកែប្រែ(ម១)” ព្រៃ.ស ជាបណ្តោះអាសន្ធ ក្រោមការចោទប្រកាន់ពីបទ.ឆបោក ។
តាមដីកាបង្គាប់ឲ្យឃុំខ្លួនជនត្រូវចោទឈ្មោះ លី សាម៉េត ហៅគ្រូមា ភេទប្រុស អាយុ៧១ឆ្នាំ មុខរបររកស៊ី កំរិតវប្បធម៌គ្មាន (មិនចេះអក្សរ) អាសយដ្ឋានមុនពេលឃាត់ខ្លួន ស្នាក់នៅបុរីរិទ្ធ ផ្ទះលេខL១៣ ផ្លូវលេខ៦A សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ ឲ្យស្ថិតក្រោមការពិនិត្យពីបទ.ឆបោក ប្រព្រឹត្តនៅរាជធានីភ្នំពេញ កាលពីខែកញ្ញា ឆ្នាំ២០២២ និងខែតុលា ឆ្នាំ២០២២ តាមបញ្ញត្តិមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ ។
យោងតាមការចោទប្រកាន់ខាងលើមាត្រា ៣៧៧ និយមន័យ នៃការឆបោក ៖ អំពើឆបោក គឺជាអំពើបន្លំចំពោះរូវន្តបុគ្គល ឬនីតិបុគ្គលណាមួយ ដោយប្រើឈ្មោះក្លែង ដោយអះអាងទៅលើឋានៈក្លែង ដោយរំលោភលើឋានៈពិតប្រាកដ ឬប្រើឧបាយកលទុច្ចរិត ដែលនាំឲ្យខូចប្រយោជន៍របស់បុគ្គលនេះ ឬរបស់តតិជននូវ ៖
១.ការប្រគល់មូលនិធិ តម្លៃ ឬទ្រព្យសម្បត្តិអ្វីមួយ ។
២.ការផ្តត់ផ្គង់សេវា ។
៣.ការធ្វើលិខិតដែលមានតម្លៃជាកាតព្វកិច្ច ឬជាការឲ្យរួចពីកាតព្វកិច្ច ។
មាត្រា ៣៧៨ ទោស ដែលត្រូវអនុវត្ត ៖
អំពើឆបោក ត្រូវផ្តន្ទាទោសដាក់ពន្ធនាគារពី៦ខែ ទៅ៣ឆ្នាំ និងពិន័យជាប្រាក់ពី ១លាន ទៅ ៦លានរៀល ។
លោក លី សាម៉េត ត្រូវបានសមត្ថកិច្ចនគរបាលរាជធានីភ្នំពេញ បញ្ជូនទៅតុលាការ នៅថ្ងៃទី០៥ ខែវិច្ឆិកា ឆ្នាំ២០២៤នេះ ដែលសំណុំរឿងបានដល់ដៃចៅក្រមស៊ើបសួរហើយ ។
លោក លី សាម៉េត ហៅគ្រូមា ត្រូវបានកម្លាំងសមត្ថកិច្ច នៃស្នងការដ្ឋាននគរបាលរាជធានីភ្នំពេញ សហការជាមួយស្នងការដ្ឋាននគរបានខេត្តព្រះសីហនុ ចាប់ខ្លួនតាមដីកាបង្គាប់ឲ្យនាំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ បន្ទាប់ពីមានប្រតិកម្មពីសម្តេចតេជោ ហ៊ុន សែន ប្រធានព្រឹត្តសភា ។
នៅថ្ងៃទី០៤ ខែវិច្ឆិកា លោក លី សាម៉េត ហៅគ្រូមា ត្រូវបានសមត្ថកិច្ចចូលទៅនាំខ្លួនចេញពីលំនៅឋានរបស់លោកពីក្រុងព្រះសីហនុ មកកាន់ស្នងការដ្ឋាននគរបាលរាជធានីភ្នំពេញ ទាំងយប់ ។ លុះព្រឹកថ្ងៃទី០៥ ខែវិច្ឆិកា ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ឯក ជួន ណារិន្ទ អគ្គស្នងរង ជាស្នងការនគរបាលរាជធានីភ្នំពេញ សមត្ថកិច្ចការិយាល័យនគរបាលសន្តិសុខ បានបញ្ជូនលោក លី សាម៉េត ហៅគ្រូមា ទៅតុលាការ ដែលសំណុំរឿងបានស្ថិតនៅចៅក្រមស៊ើបសួរ ដំណើរស៊ើបសួរ តាមនីតិវិធី ។
សូមជម្រាបថា លោកក លី សាម៉េត ហៅគ្រូមា នៅថ្ងៃទី៤ វិច្ឆិកា ឆ្នាំ២០២៤ បានចេញមុខសារភាពតាមបណ្តាញសង្គមពីកន្លែងលាក់ខ្លួន ដោយប្រកាសទទួលសា្គល់កំហុសទាំងអស់ ដែលខ្លួនបានប្រពឹត្តកាលពីពេលកន្លងទៅ ដោយដាក់កំហុសលើការលោភលន់ ។ កុ្នងវីដេអូ ដែលមានរយៈពល៥នាទី ប្រកាសដោយទឹកមុខយំ មិនចេញទឹកភ្នែក លោក លី សាម៉េត បានសុំទោសសម្ដេចតេជោ ហ៊ុន សែន ប្រធានព្រឹទ្ធសភា ដែលកន្លងទៅ ខ្លួនពិតជាបានយកឈ្មោះរបស់សម្ដេច ដើរបោកប្រាស់អ្នកដទៃ ពិតប្រាកដមែន ហើយសកម្មភាពបោកប្រាស់នោះ មិនជាប់ពាក់ព័ន្ធជាមួយសម្ដេចបនិ្ដចសោះឡើយ ។
លោកគ្រូមា អាប់យស រូបនេះ និយាយទៀតថា ការដែលខ្លួនយកឈ្មោះសម្ដេចតេជោ ទៅប្រើប្រាស់នេះ គឺដើម្បីផ្ដល់ទំនុកចិត្តដល់អ្នកដទៃ ។ រាល់អំពើបោកប្រាស់ ដែលខ្លួនបានប្រព្រឹត្ត គឺធ្វើដោយចិត្តឯង មិនជាប់ពាក់ព័ន្ធបន្ដិចណាសោះ ជាមួយសម្ដេចតេជោ ទេ ។ គាត់បញ្ជាក់ថា ខ្លួនមិនដែលចូលផ្ទះសម្ដេច សូម្បីតែម្ដង ហើយក៏មិនសា្គល់ផ្ទះសម្ដេច បែរមុខទៅទិសណាដែរ ប៉ុន្ដែបានកុហកអ្នកដទៃថា ខ្លួនចេញចូលផ្ទះសម្ដេច ពេលណាក៏បានដែរ ។
គួររំឭកថា ដោយទ្រាំលែងបាន ក្រោយពីទទួលបានព័ត៌មានឆបោក ជាច្រើនករណីនោះ កាលពីល្ងាចថ្ងៃទី៨ ខែតុលា ឆ្នាំ២០២៤ សម្តេចតេជោ ហ៊ុន សែន ប្រធានព្រឹទ្ធសភា បានចេញមកទម្លាយពីករណីឆបោកជាច្រើនករណីរបស់លោក លី សាម៉េត ហៅគ្រូមា ព្រមទាំងស្នើទៅរដ្ឋមន្ត្រីក្រសួងយុតិ្តធម៌ ធ្វើការជាមួយតុលាការ បង្កកទ្រព្យសម្បត្តិរបស់លោក លី សាម៉េត ។
សម្តេចតេជោ ក៏បានអំពាវនាវឲ្យអ្នករងការចាញ់បោកលោក លី សាម៉េត ទាំងអស់ ដាក់ពាក្យបណឹ្ដង ដោយក្រុមមេធាវីរបស់សម្តេច មានលោក គី តិច ជាប្រធាន រង់ចាំពាក្យបណឹ្ដងទាំងនោះ ។ សារទាំងស្រុងរបស់សម្តេចតេជោ បានលើកឡើងថា ដោយរឿងច្រើនពេក ថ្ងៃនេះ ខ្ញុំសម្រេចចិត្តបង្ហោះសារទាក់ទងដល់លោក លីសាម៉េត ហៅគ្រូមា ។
លី សាម៉េត តែងប្រើឈ្មោះខ្ញុំ ដើរបោកប្រាស់គេរហូត ថាយកលុយ ដែលបោកប្រាស់បាន យកមកជូនខ្ញុំទៀតផង ដោយប្រាប់គេថា ខ្លួនចេញចូលផ្ទះខ្ញុំ ក្នុងពេលណាក៏បាន ក្នុងពេលដែល លី សាម៉េត មិនដឹងថា ផ្ទះខ្ញុំបែរមុខទៅទិសខាងណាផង ។
ឆ្នាំ២០២២ លី សាម៉េត បោកលុយឈ្មោះ សុខ ឡេង ១០លានដុល្លារ ថាយកមកឲ្យខ្ញុំ តែពេល សុខ ឡេង ផ្តាំឲ្យសួរខ្ញុំ តាមកូនចិញ្ចឹមខ្ញុំ ទ្រី សុខា ទើបខ្ញុំដឹងក៏ទាមទារពី លី សាម៉េត ប្រគល់ឲ្យ សុខ ឡង វិញទាំងអស់ ដោយពេលនោះយក លី សាម៉េត ទៅសួរចម្លើយ និងប្រគល់-ទទួលប្រាក់នៅស្នងការដ្ឋាននគរបាលក្រុងភ្នំពេញ ។
មុននេះ ប៉ុន្មានថ្ងៃ ខ្ញុំបានប្រាប់ លី សាម៉េត ឲ្យសងលុយទៅ មួង ឃីម ចំនួន ២៣ម៉ឺនដុល្លារ ក្រោយពី មួង ឃីម បញ្ជូនសារជា វីដេអូ មកខ្ញុំ អមដោយសារសំឡេងឆ្លងឆើ្លយគ្នា (បានសងរួចហើយ) ។
ថ្ងៃនេះ ខ្ញុំទទួលវីដេអូពីលោក កន សុខកាយ អភិបាលក្រុងអរិយក្សត្រ ថា លី សាម៉េត បានយកប្រាក់ពីគាត់ ចំនួន៣០ម៉ឺនដុល្លារ ដើម្បីរត់ការ បានតំណែងជាអភិបាលក្រុងអរិយក្សត្រ ។
ក្នុងមុខតំណង ជារដ្ឋមន្ត្រី ៦ឆ្នាំ ជានាយករដ្ឋមន្ត្រី ៣៨ឆ្នាំ និងពេលនេះជាប្រធានព្រឹទ្ធសភា អមដោយអំណាចជាប្រមុខរដ្ឋស្តីទី កុ្នងពេលអវត្តមានព្រះមហាក្សត្រ ខ្ញុំធ្លាប់ចុះហត្ថលេខាតែងតាំង និងដំឡើងស័ក្តិ មន្ត្រីរាប់ម៉ឺននាក់ ទាំងស៊ីវិល និងកងកម្លាំងប្រដាប់អាវុធ ខ្ញុំមិនដែលទទួលយក អន្តរាគមន៍ពីនរណានោះឡើយ មិនថា តាមការសើ្នសុំ ឬតាមសំណូកណាមួយនោះឡើយ ។ ផ្ទុយទៅវិញ មន្ត្រីមួយចំនួន ទទួលបានការតែងតាំងហើយ ទទួលបានការជួយពីខ្ញុំ ថែមទៀត ដើម្បីឲ្យពួកគាត់មានមធ្យោបាយធ្វើការ ។
ករណី លី សាម៉េត អាចនៅមានមនុស្សចើនទៀត ដែលចាញ់បោកគាត់ ក្រោមរូបភាព យកឈ្មោះខ្ញុំទៅប្រើ ។ ដើម្បីជម្រះបញ្ជីមួយនេះ តាមរបៀបពន្លត់ភ្លើង ជាជាងអង្គុយបក់ផ្សែង ខ្ញុំសូមសើ្ន ៖
១- រដ្ឋមន្ត្រីក្រសួងយុតិ្តធម៌ ធ្វើការជាមួយតុលាការ ដើម្បីចេញដីកា ការពារទ្រព្យសម្បតិ្ត លី សាម៉េត ដើម្បីទុកសងដល់អ្នកចាញ់បោក លី សាម៉េត ។
២-អ្នកចាញ់បោក លី សាម៉េត ទាំងអស់ ដាក់ពាក្យប្តឹង ឬទាមទារសំណងទៅកាន់មេធាវី សម្តេចតេជោ ។
៣-ឯកឧត្តម គី តិច រៀបចំមេធាវីសម្តេចតេជោ ចាំទទួលពាក្យបណ្តឹង និងធើ្វការសម្របសម្រួលលើរឿងដែលអាចសម្របសម្រួលបាន ។ ចំពោះរឿងមិនអាចសម្របសម្រួលបាន ត្រូវប្តឹងទៅតុលាការ ចាត់ការតាមច្បាប់ ។
៤-ស្នើសុំ សមត្ថកិច្ចតាមឃ្លាំមើល លី សាម៉េត កុំឲ្យរត់ចេញផុតពីសំណាញ់ច្បាប់ ។
សម្តេចតេជោ ឆ្លើយតបភ្លាមៗ ខ្ញុំសូមបញ្ជាក់ជូនថា មិនមែនដោយសារតែ វីដេអូ សារភាពកំហុស និងសូមទោសមួយនេះ លី សាម៉េត ត្រូវបានរួចខ្លួននោះឡើយ ។ ជំនួយការខ្ញុំ ឈ្មោះ ដួង តារា ត្រូវបានឃាត់ខ្លួន រង់ចាំការកាត់ទោស ដោយសារជាប់ពាក់ព័ន្ធឆបោកជាមួយ លី សាម៉េត នេះ ។
ពេលនេះ លី សាម៉េត ក្រោយពីរត់គេចខ្លួន បានបង្ហាញខ្លួនហើយ សូមសមត្ថកិច្ច ដែលជានគរបាល ឬកងរាជអាវុធហត្ថ ទៅនាំខ្លួន លី សាម៉េត បញ្ជូនទៅតុលាការ ដើម្បីកាត់ទោសតាមច្បាប់ ។
លី សាម៉េត បានសុំពេលព្យាបាលខ្លួននៅផ្ទះ មុនពេលចូលខ្លួនឲ្យតុលាការកាត់ទោស ។ មិនអាចធ្វើបែបនេះបានឡើយ នគរបាលយុត្តិធម៌ ត្រូវនាំខ្លួន លី សាម៉េត បញ្ជូនទៅតុលាការ តាមនីតិវិធី ។ ខ្ញុំសង្ឃឹមថា សមត្ថកិច្ចមិនបន្តឲ្យ លី សាម៉េត បានស្ថិតនៅក្រៅសំណាញ់ច្បាប់ទៀតទេ ៕
ចែករំលែកព័តមាននេះ