ខេត្តបាត់ដំបង ៖ តូបលក់ដូរយ៉ាងតិចជិត១៥០តូបនៅលើផ្សារ «បឹងឈូក»ជាន់ទី១ ដែលស្ថិតនៅចំកណ្ដាលបេះដូង ក្រុងបាត់ដំបង ត្រូវអគ្គិភ័យដែលគេមិនទាន់ដឹងមូលហេតុលេបត្របាក់យកអស់គ្មានសល់ កាលពីវេលាម៉ោង១០យប់ថ្ងៃទី០៣ វិច្ឆិកា ដែលធ្វើឲ្យអាជីវករខាតបង់ម្នាក់ៗរាប់ម៉ឺនដុល្លារ…
ខេត្តបាត់ដំបង ៖ តូបលក់ដូរយ៉ាងតិចជិត១៥០តូបនៅលើផ្សារ «បឹងឈូក»ជាន់ទី១ ដែលស្ថិតនៅ
ចំកណ្ដាលបេះដូង ក្រុងបាត់ដំបង ត្រូវអគ្គិភ័យដែលគេមិនទាន់ដឹងមូលហេតុលេបត្របាក់យកអស់គ្មានសល់ កាលពីវេលាម៉ោង១០យប់ថ្ងៃទី០៣ វិច្ឆិកា ដែលធ្វើឲ្យអាជីវករខាតបង់ម្នាក់ៗរាប់ម៉ឺនដុល្លារ តែពុំមានគ្រោះថ្នាក់ដល់មនុស្សទេ ។
យោងតាមរបាយការណ៍បឋមរបស់សមត្ថកិច្ចបានឲ្យដឹងថា អគ្គិភ័យដ៏កាចសាហាវនេះ បានឆាបឆេះផ្នែកខាងលើនៃអគារផ្សារបឹងឈូក (ជាន់ទី១) ដែលភាគច្រើននៃទំនិញ គឺលក់ក្រណាត់ និងសម្លៀកបំពាក់ ។ អភិបាលក្រុងបាត់ដំបង លោក លាង វាសនា បានផ្ដល់ព័ត៏មានបឋមដែរថា តូបលក់ដូរនៅជាន់ទី១ ដែលត្រូវភ្លើងឆេះអស់គ្មានសល់មានចំនួន១៤៥តូប ក្នុងចំណោមតូបសរុប១៤៨តូប រីឯចំនួន០៣តូបទៀតរងផលប៉ះពាល់។
ប៉ុន្តែលោកអភិបាលក្រុងរូបនេះ មិនទាន់ធ្វើការសន្និដ្ឋានពីមូលហេតុ ដែលនាំឲ្យមានអគ្គិភ័យនេះកើតឡើងទេ ។ នៅកន្លែងកើតហេតុ គេឃើញកម្លាំងសមត្ថកិច្ចគ្រប់ស្ថាប័នបានចេញជួយអន្តរាគមន៍ជួយលីសែងជញ្ជូនអីវ៉ាន់របស់អាជីវកររំដោះចេញពីតូបលក់ដូរផ្នែកខាងក្រោមនៃអគារផ្សារ ខណៈរថយន្តពន្លត់អគ្គិភ័យរបស់សមត្ថកិច្ចយ៉ាងតិចចំនួន១២គ្រឿង បានឡោមព័ទ្ធជុំវិញផ្សារបាញ់ទឹកពន្លត់ភ្លើងដែលកំពុងឆាបឆេះពេញបន្ទុក ។
ក្នុងសកម្មភាពយ៉ាងសកម្មជួយអត្តរាគមន៍នេះ គេឃើញកម្លាំងយោធា និងកម្លាំងកងរាជអាវុធហត្ថបានប្រឹងប្រែងលីសែងជួយជម្លៀស និងជញ្ជូនអីវ៉ាន់របស់អាជីវកររំដោះចេញក្នុងតូបលក់ដូរផ្នែកខាងក្រោម ខណៈអគ្គិភ័យកំពុងតែប្រឹងលេបត្របាក់តូបជិត១៥០តូប ដែលមានសម្លៀកបំពាក់ និងក្រណាត់នៅផ្នែកខាងលើ ។
អធិការក្រុងបាត់ដំបង លោក ពេជ្រ សារ៉ែន បានប្រាប់ថា ស្ទើរពេញមួយយប់កម្លាំងសមត្ថកិច្ចបានហ៊ុមព័ទ្ធអគារផ្សារ (យាម) ដើម្បីរង់ចាំគណៈកម្មការត្រូតពិនិត្យនៅព្រឹកថ្ងៃទី០៤ វិច្ឆិកា ។ ប៉ុន្តែលោកមិនទាន់ដឹងពីមូលហេតុ ដែលនាំឲ្យមានអគ្គិភ័យដ៏កាចសាហាវនេះទេ ។
ពាក់ព័ន្ធនឹងអគ្គិភ័យឆេះផ្សារបឹងឈូកទាំងកណ្ដាលយប់នេះ បើតាមសាក្សីរស់នៅក្បែរផ្សារបឹងឈូក បាននិយាយថា គេឃើញអគ្គិភ័យចាប់ផ្ដើមឆេះនៅចំពាក់កណ្ដាលតួរផ្សារជាន់លើផ្នែកខាងជើង ។ ពេលនោះគេឮសម្លេងផ្ទះផូងផាង ហើយអណ្ដាលភ្លើងហក់ឡើងកាន់ខ្លាំង ឆេះរាលដាលយ៉ាងលឿន ពាសពេញក្នុងអគារផ្សារជាន់ទី១ ។
សាក្សីខ្លះអះអាងថា អគ្គិភ័យនេះអាចបណ្ដាលមកពីការទុស្សេខ្សែចរន្តអគ្គិសនី ខណៈមន្ត្រីជំនាញមិនទាន់ហ៊ានធ្វើការសន្និដ្ឋាននៅឡើយទេ ។ អ្នកលក់ដូរក្នុងផ្សារបឹងឈូកបាននិយាយដែរថា ជាធម្មតាផ្សារបឹងឈូកត្រូវបិទទ្វារនៅម៉ោង៧យប់ ហើយប្រព័ន្ធភ្លើងក៏ត្រូវបិទដែរ តែគេមិនដឹងយ៉ាងម៉េចបានជាមានអគ្គិភ័យកើតឡើងយ៉ាងសាហាវបែបនេះ ? ដោយឡែក បើនិយាយពីទំនិញនៅក្នុងតូបលក់ដូររបស់អាជីវករដែលត្រូវភ្លើងឆេះវិញ គឺអស់ទាំងស្រុងតែម្ដង ។ ហើយទំនិញភាគច្រើនជាសម្លៀកបំពាក់ និង ក្រណាត់ ដែលម្នាក់ៗខាត់បង់អស់រាប់ម៉ឺនដុល្លារ ។
បើតាមប្រភពព័ត៏មាននៅកន្លែងកើតហេតុ អាជីវករខ្លះទើបខ្ចីលុយធនាគាររាប់ម៉ឺនដុល្លារទិញអីវ៉ាន់ចូលស្ដុបទើបបានប៉ុន្មានថ្ងៃប៉ុណ្ណោះ ក៏ត្រូវភ្លើងឆេះអស់គ្មានសល់ ។ របាយការណ៍បឋមរបស់ការិយាល័យជំនាញបានឲ្យដឹងថា រថយន្តពន្លត់អគ្គិភ័យសរុបចំនួន១២គ្រឿងបានចូលជួយអន្តរាគមន៍បាញ់ទឹកពន្លត់ តែដោយសារអីវ៉ាន់ភាគច្រើនជាក្រណាត់ ទើបត្រូវចំណាយទឹកច្រើនរហូតដល់ទៅ១២រថយន្ត ទើបសន្ទុះភ្លើងថមថយ តែអីវ៉ាន់ត្រូវខូចខាតទាំងស្រុង ។
លោក លាង វាសនា អភិបាលក្រុងបាត់ដំបងបានបញ្ជាក់ដែរថា គិតត្រឹមម៉ោង៩ព្រឹកថ្ងៃទី០៤ វិច្ឆិកា នេះ យើងមិនទានអាចវាយតំលៃពីការខូចខាតបាននៅឡើយទេ ។ ព្រោះយើងកំពុងប្រជុំបង្កើតគណៈកម្មការ ដើម្បីចុះពិនិត្យកន្លែងកើតហេតុផ្ទាល់ និងធ្វើការស្រាវជ្រាវរកមូលហេតុ ដែលនាំឲ្យមានអគ្គិភ័យនេះកើតឡើង៕
ចែករំលែកព័តមាននេះ