ខេត្តបន្ទាយមានជ័យ ៖ រឿងរ៉ាវស្នេហាមានទំហំធំធេងណាស់ ហើយក៏មានជម្រៅជ្រៅជាងមហាសមុទ្រដែរ ដូច្នេះហើយទើបស្នេហាខ្លះតួស្រី និងតួប្រុសស៊ូស្លា.ប់ទាំងអស់គ្នា ព្រោះតែមានឥទ្ធិពលផ្សេងមករារាំងធ្វើឱ្យអណ្តាតភ្លើងស្នេហ៍របស់គេមិនបានដូចបំណង ហើយក៏មានខ្លះទៀតលួចស្រឡាញ់គេតែម្នាក់ឯង គេមិនស្រឡាញ់វិញ
ខេត្តបន្ទាយមានជ័យ ៖ រឿងរ៉ាវស្នេហាមានទំហំធំធេងណាស់ ហើយក៏មានជម្រៅជ្រៅជាងមហាសមុទ្រដែរ ដូច្នេះហើយទើបស្នេហាខ្លះតួស្រី និងតួប្រុសស៊ូស្លាប់ទាំងអស់គ្នា ព្រោះតែមានឥទ្ធិពលផ្សេងមករារាំងធ្វើឱ្យអណ្តាតភ្លើងស្នេហ៍របស់គេមិនបានដូចបំណង ហើយក៏មានខ្លះទៀតលួចស្រឡាញ់គេតែម្នាក់ឯង គេមិនស្រឡាញ់វិញ ក៏តូចចិត្តសម្លាប់ខ្លួន ធ្វើដូចជាក្នុងលោកនេះមានតែប្រុស ឬស្ត្រីតែម្នាក់ គ្មានអ្នកជំនួសបាន ។
ជុំវិញរឿងរ៉ាវស្នេហាមួយដែលបុរសម្នាក់បានធ្លាក់ក្នុងអន្លង់ស្នេហ៍មោះមុតតែម្នាក់ឯង តាមស្រឡាញ់នារីម្នាក់ ប៉ុន្តែនារីម្នាក់នោះមិនដែលនឹកនា ឬប្រគល់បេះដូងឱ្យបុរសនេះឡើយ។ ទីបំផុតការស្រឡាញ់យ៉ាងងប់ងល់នេះបានក្លាយជាការបញ្ចប់ជីវិតដោយខ្លួនឯង ដើម្បីគេចឱ្យផុតពីលើលោកនេះកុំឱ្យភ្លើងស្នេហ៍បង្កជាស្នាមរបួសផ្លូវចិត្ត ។ ការសម្រេចធ្វើអត្តឃាតរបស់យុវជនរូបនេះពិតជាឆោតល្ងង់ពេកណាស់ ហើយក៏អាចចោទសួរដែរថា តើកើតមកធ្វើអ្វី បើសម្រាប់តែស្រឡាញ់នារីម្នាក់មិនបានបែរជាសម្លាប់ខ្លួនបែបនេះ ។ ពិតហើយ ការគិតរបស់យើងគ្រប់គ្នាមិនដូចអ្វីដែលយុវជនរូបនេះគិតទេ ។ ប្រការដែលគួរឱ្យកត់សម្គាល់នោះគឺថា យុវជនដែលបានធ្លាក់ក្នុងអន្លង់ស្នេហ៍យ៉ាងជ្រៅនោះ ធ្លាប់លបលួចឡើងទៅលើផ្ទះចូលដេកក្នុងមុងជាមួយនារីដែលខ្លួនស្រឡាញ់ដល់ឆ្អឹងនេះ ហើយត្រូវឪពុកម្តាយរបស់នាងប្តឹងទាមទារឱ្យបង់លុយអស់ចំនួន៦០ម៉ឺនរៀលផងដែរ ។
ទាក់ទិននឹងការផឹកថ្នាំពុលសម្លាប់ខ្លួន ព្រោះតែមិនអាចស្រឡាញ់នារីម្នាក់នោះបាន ត្រូវបានលោកវរសេនីយ៍ត្រី កែវ ប៊ុនយឿន អធិការនគរបាលស្រុកព្រះនេត្រព្រះ ឱ្យដឹងថា យុវជនរូបនេះ ឈ្មោះរឿន ចេង ហៅរ៉ាយ អាយុ២២ឆ្នាំ នៅភូមិកន្ទុយជូន ឃុំបេង ស្រុកបន្ទាយអំពិល ខេត្តឧត្តរមានជ័យ បានមកស្នាក់នៅដាំបន្លែជាមួយបងប្អូននៅចំណុចស្ពានត្បែង ខាងលិចភូមិរំដួល ឃុំភ្នំលៀប ស្រុកព្រះនេត្រព្រះ ។ នៅចន្លោះពីម៉ោង១០យប់ ថ្ងៃទី១៩ មិថុនា ដល់ម៉ោង៦ព្រឹក ថ្ងៃទី២០ មិថុនា ឆ្នាំ២០១១ គេបានប្រទះឃើញសពយុវជនរូបនេះនៅលើផ្លូវលំជិតកន្លែងដាំបន្លែ ដោយរូបកាយប្រឡាក់ភក់ពេញដែលទំនងជាប្រកាច់ពេលផឹកថ្នាំពុល ហើយតាមការស្រាវជ្រាវ គឺយុវជនរូបនេះបានផឹកថ្នាំកណ្តុរ ។
លោកអធិការបានបន្តទៀតថា បើតាមអ្នកភូមិបំភ្លឺប្រាប់សមត្ថកិច្ច គឺយុវជនរូបនេះបានតាមស្រឡាញ់នារីឈ្មោះវ៉ាន់ លន់ អាយុ១៥ឆ្នាំ នៅភូមិព្រីងជូរ ឃុំភ្នំលៀប ស្រុកព្រះនេត្រព្រះ ហើយការធ្វើអត្តឃាតនេះ ក៏ព្រោះតែតូចចិត្តនឹងនារីរូបនោះមិនព្រមស្រឡាញ់ខ្លួន ។ ម្យ៉ាងទៀត កាលពីយប់ថ្ងៃទី៤ មិថុនា ឆ្នាំ២០១១ យុវជនរូបនេះបានផឹកស្រាស្រវឹងហើយឡើងទៅដេកក្នុងមុងជាមួយនាង ព្រោះតែស្រឡាញ់សុខចិត្តមានទោស ប៉ុន្តែត្រូវឪពុកម្តាយនាងដឹងទាន់ក៏បានប្តឹងទាមទារឱ្យបង់លុយ ។
លោកកែវ ប៊ុនយឿន បានបញ្ជាក់ថា សពយុវជនរឿន ចេង ហៅរ៉ាយ ក្រោយពីពិនិត្យនិងធ្វើកោសល្យវិច័យរួចក៏បានប្រគល់ឱ្យបងប្អូនចាត់ចែងធ្វើបុណ្យតាមប្រពៃណី ។ ការធ្វើអត្តឃាតបែបនេះ មិនគួរជាគំរូសម្រាប់យុវជនដទៃទៀតឡើយ តើខ្វះណាស់ទៅឬប្រុសពេញដី ស្រីពេញនគរ ?
ចែករំលែកព័តមាននេះ