រាជធានីភ្នំពេញ ៖ នៅរសៀលថ្ងៃទី៣១ ខែតុលា ឆ្នាំ២០២៤នេះ លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ…
រាជធានីភ្នំពេញ ៖ នៅរសៀលថ្ងៃទី៣១ ខែតុលា ឆ្នាំ២០២៤នេះ លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានអញ្ជើញនារីម្ចាស់ឆ្កែ មកជួបជាមួយយុវជន ណន សុខហេង នៅស្នងការដ្ឋាននគរបាលរាជធានីភ្នំពេញ ដើម្បីសម្រួលបញ្ចប់ជម្លោះ និងដកពាក្យបណ្តឹងតាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ប្រធានព្រឹទ្ធសភា ។
នៅក្នុងការសម្របសម្រួលនេះ នារីជាម្ចាស់ឆ្កែ មានការសោកស្ដាយរាល់កំហុស ឆេវឆាវ និងមិនបានគិតវែងឆ្ងាយ រួចក៏លើកដៃសំពះយុវជន ណន សុខហេង ហើយយុវជន ណន សុខហេង ក៏លើកដៃសំពះសុំទោស ម្ចាស់ឆ្កែវិញទៅមកផងដែរ ។
បើតាមលោកឧត្តមសេនីយ៍ស្នងការ ជួន ណារិន្ទ នារីជាម្ចាស់ឆ្កែ បានអរគុណសម្ដេចតាតេជោ ហ៊ុន សែន យ៉ាងជ្រាលជ្រៅ រួចស្ម័គ្រចិត្តធ្វើកំណត់ហេតុព្រមព្រៀង និងដកពាក្យបណ្ដឹង ឈប់ប្ដឹងផ្ដល់គ្នាចាប់ពេលនេះតទៅ ។
ក្រោយបញ្ចប់ការបំពេញនីតិវិធី នៅស្នងការដ្ឋាននគរបាលរាជធានីភ្នំពេញរួចរាល់ សំណុំរឿងត្រូវបានបញ្ជូនទៅកាន់សាលាដំបូងរាជធានីភ្នំពេញ ដើម្បីបញ្ចប់តាមតាមផ្លូវច្បាប់ ។
សូមបញ្ជាក់ថា នៅព្រឹកថ្ងៃព្រហស្បតិ៍ ទី៣១ ខែតុលា ឆ្នាំ២០២៤ សម្តេចតេជោ ហ៊ុន សែន បានអនុញ្ញាតឲ្យយុវជន ណន សុខហេង អាយុ២២ឆ្នាំ រស់នៅភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ ដែលមានជម្លោះជាមួយឈ្មោះ គា ចន្ធូ ម្ចាស់ក្រុមហ៊ុន «ស៊ាង ឡង មីងស៊ូ» លក់ និងផ្គត់ផ្គង់សម្ភារការពារជម្រាបទឹក ដែលមានទីតាំងនៅផ្លូវភ្នំពេញហាណូយ ភូមិឈ្មួញ សង្កាត់ឈ្មួញ ខណ្ឌសែនសុខ ចូលជួបដើម្បីសម្របសម្រួលបញ្ចប់ជម្លោះក្រៅប្រព័ន្ធតុលាការ ដោយមានការចូលរួមសម្របសម្រួលដោយ ប្រធានគណៈកម្មាធិការនីតិកម្មព្រឹទ្ធសភា ស្នងការនគរបាលរាជធានីភ្នំពេញ នៅវិមានព្រឹទ្ធសភា រាជធានីភ្នំពេញ ។
នៅក្នុងឱកាសនោះ សម្ដេចតេជោ បានអនុញ្ញាតឲ្យយុវជន ណន សុខហេង បានថតរូបអនុស្សាវរីយ៍ និងបានឧបត្ថម្ភថវិកាចំនួន ១០,០០០ដុល្លារ និង៣៥លានរៀល ព្រមទាំងបានបង្កើតអាជីវកម្ម ឡដុត នំប៉័ងមួយនៅក្នុងក្រុងក្រចេះ ខេត្តក្រចេះ ដល់ចៅប្រុស ដើម្បីប្រកបរបរចញ្ចឹមគ្រួសារ ។
លើសពីនេះសម្ដេចតេជោ បានណែនាំចៅប្រុស ណន សុខហេង ត្រូវយកចិត្តទុកដាក់ក្នុងការប្រកបអាជីវកម្ម ដែលសម្ដេចបានផ្ដល់អោយពេលនេះ ពិសេសត្រូវចេះយកលុយបង្កើតលុយ ហាមលេងល្បែង និងស្មោះត្រង់ជាមួយប្រពន្ធ ៕
ចែករំលែកព័តមាននេះ