រាជធានីភ្នំពេញ ៖ រដ្ឋបាល រាជធានីភ្នំពេញ បានបង្ហាញតម្រាយផ្លូវ ដែលសមត្ថកិច្ចគ្រោងនឹងធ្វើការបញ្ចៀសចរាចរ ដើម្បី រត់ភ្លើងគប់អបអរសាទរពិធីបើកការប្រកួតកីឡាជាតិលើកទី៤ និងកីឡាជាតិជនពិការ លើកទី២…
រាជធានីភ្នំពេញ ៖ រដ្ឋបាល រាជធានីភ្នំពេញ បានបង្ហាញតម្រាយផ្លូវ ដែលសមត្ថកិច្ចគ្រោងនឹងធ្វើការបញ្ចៀសចរាចរ ដើម្បី រត់ភ្លើងគប់អបអរសាទរពិធីបើកការប្រកួតកីឡាជាតិលើកទី៤ និងកីឡាជាតិជនពិការ លើកទី២ នៅពហុកីឡដ្ឋានជាតិអូឡាំពិក ដែលនឹងប្រព្រឹត្តទៅនៅថ្ងៃទី៣០ ខែតុលា ឆ្នាំ២០២៤នេះ ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ បានឱ្យដឹងថា ក្រសួងអប់រំ យុវជន និងកីឡា សហការជាមួយគណៈកម្មាធិការជាតិអូឡាំពិកកម្ពុជា គណៈកម្មាធិការជាតិប៉ារ៉ាឡាំពិកកម្ពុជា សហព័ន្ធកីឡាជាតិ និងស្ថាប័នពាក់ព័ន្ធ នឹងរៀបចំពិធីបើកការប្រកួតកីឡាជាតិ លើកទី៤ និងកីឡាជាតិជនពិការ លើកទី២ នៅពហុកីឡដ្ឋានជាតិអូឡាំពិក ស្ថិតនៅសង្កាត់វាលវង់ ខណ្ឌ៧មករា រាជធានីភ្នំពេញ ដែលនឹងប្រព្រឹត្តទៅនៅថ្ងៃទី៣០ ខែតុលា ឆ្នាំ២០២៤ ចាប់ពីវេលាម៉ោង១៥:៣០នាទី ក្រោមអធិបតីភាពដ៏ខ្ពង់ខ្ពស់ សម្ដេចបហាបវរធិបតី ប៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ប៊ុន ម៉ាណែត ។
ពិធីបើកការប្រកួតកីឡាជាតិខាងលើ នឹងមានពិធីរត់ភ្លើងគប់ នៅវេលាម៉ោង១៤:០០នាទី ដោយចេញដំណើរពីខេត្តកណ្តាល កន្លែងការដ្ឋានសាងសង់ព្រែកជីកហ្វូណនតេជោ ឆ្ពោះទៅផ្លូវជាតិលេខ១ រហូតដល់ផ្លូវបត់ស្តាំទៅកោះនរា ឆ្ពោះមកកោះពេជ្រ ចេញតាមស្ពាននាគភ្លោះ រហូតដល់រង្វង់មូលសម្តេចសង្ឃរាជ ជួន ណាត មកមហាវិថីព្រះសុរាម្រឹត ឆ្ពោះមកមហាវិថីព្រះសីហនុ បត់ស្តាំមហាវិថីសម្តេចមុនីរ៉េត បត់ស្តាំចូលពហុកីឡដ្ឋានជាតិអូឡាំពិក ។
ដើម្បីរក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ក្នុងពិធីរត់ភ្លើងគប់សមត្ថកិច្ចនឹងធ្វើការបញ្ចៀសចរាចរតាមតម្រាយផ្លូវខាងលើជាបណ្តោះអាសន្ន ។
អាស្រ័យហេតុនេះ សូមបងប្អូនប្រជាពលរដ្ឋ ដែលត្រូវធ្វើដំណើរឆ្លងកាត់តាមតម្រាយផ្លូវខាងលើមេត្ត យោគយល់ អធ្យាស្រ័យ និងចូលរួមបញ្ចៀសការធ្វើដំណើរឆ្លងកាត់តាមតម្រាយផ្លូវរត់ភ្លើងគប់ខាងលើ ដើម្បីកាត់បន្ថយការកកស្ទះចរាចរណ៍ដោយក្ដីអនុគ្រោះ ៕
ចែករំលែកព័តមាននេះ