រាជធានីភ្នំពេញ ៖ នៅព្រឹកថ្ងៃទី២២ ខែតុលា ឆ្នាំ២០២៤ មន្ត្រីជំនាញសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) រាជធានីភ្នំពេញ សហការជាមួយលោកអនុប្រធានផ្សារចាក់អង្រែ បានចុះត្រួតពិនិត្យ កន្លែងលក់ ពងមាន់ ពងទា ពងក្រួច មួយកន្លែង ដែលបានដាក់ពាក្យបណ្តឹងមកអគ្គនាយកដ្ឋាន (ក.ប.ប.) តាមរយៈគេហទំព័រហ្វេសបុក ថា មានការចរាចរលក់ពងមាន់ ពងទា ពងក្រួច ដែលដាក់សារធាតុគីមី និងជាពង(ជ័រ) ផងដែរ ។
ពេលនេះដឹងការពិតហើយ តាមលទ្ធផល នៃការត្រួតពិនិត្យជាក់ស្តែង មន្ត្រីជំនាញបានពិនិត្យឃើញថា មិនមានពងមាន់ ពងទា ដែលដាក់សារធាតុគីមី រឺពងមាន់ធ្វើពីផ្លាស្ទិច(ជ័រ) ដូចពាក្យចចាមអារ៉ាម នោះទេ! ។
យ៉ាងណាមិញ រសៀលថ្ងៃដដែលនា មន្ត្រីសាខា (ក.ប.ប.) រាជធានីភ្នំពេញ សហការជាមួយមន្ត្រីអាជ្ញាធរមូលដ្ឋាន ចុះធ្វើការត្រួតពិនិត្យជាក់ស្តែង លើផលិតផលពោះគោ ក្រពះគោ ក្រពះត្រី ដែលស្តុកទុក ធ្វើការកែច្នៃ សម្អាត និងវេចខ្ចប់ សម្រាប់លក់ចែកចាយ តាមទីផ្សារក្នុង និងក្រៅស្រុកចំនួន ១ទីតាំងទៀត ។ ជាលទ្ធផល មន្ត្រីជំនាញបញ្ជាក់ថា ផលិតផល ពុំទាន់អនុលោមភាពផ្នែកបទដ្ឋានបច្ចេកទេស និងបានដកយកសំណាកគំរូ ចំនួន ៨សំណាកគំរូ បញ្ជូនមកមន្ទីរពិសោធន៍ នៃអគ្គនាយកដ្ឋាន (ក.ប.ប.) ដើម្បីធ្វើការវិភាគលម្អិតបន្ត ។
ជាមួយគ្នានេះដែរ មន្ត្រីជំនាញ បានធ្វើការណែនាំដល់ម្ចាស់ទីតាំង អំពីច្បាប់ និងបទប្បញ្ញតិបច្ចេកទេសនានា ធ្វើយ៉ាងណារៀបចំកន្លែងផលិតផឱ្យមានអនាម័យស្អាតល្អ និងបានអញ្ជើញម្ចាស់ទីតាំងមកបំភ្លឺបន្ថែមនៅសាខា (ក.ប.ប.) រាជធានីភ្នំពេញ ៕
ចែករំលែកព័តមាននេះ