ទីក្រុងវ៉ាស៊ីនតោន៖ រដ្ឋាភិបាលអាមេរិកកំពុងតែល្វីងមុខនឹងរឿងថ្មីមួយទៀតហើយ។ នោះគឺការលួចបញ្ចេញការណ៍សម្ងាត់អំពីគម្រោងអ៊ីស្រាអែលត្រៀមវាយប្រហារអ៊ីរ៉ង់នាពេលខាងមុខនេះ។ មិនទាន់បានវាយប្រហារផង ផែនការនេះត្រូវបែកធ្លាយចេញទៅខាងក្រៅ។ ដូច្នេះ អាមេរិកកំពុងតែស្រាវជ្រាវយ៉ាងដុតដៃដុតជើងដើម្បីតាមរកមុខអ្នកណាដែលបញ្ចេញរឿងនេះទៅខាងក្រៅ។ នេះបើយោងតាមប្រធានរដ្ឋអាមេរិក លោកម៉ាយចនសុន (Mike Johnson) ប្រកាសកាលពីថ្ងៃអាទិត្យ។
ឯកសារសម្ងាត់នោះរៀបចំដោយទីភ្នាក់ងារសម្ងាត់ NGIA និយាយពីការវិភាគស្ថានការណ៍ដោយផ្អែកទៅលើរូបភាពពីផ្កាយរណបចាប់ពីថ្ងៃទី១៥-១៦ ខែតុលាដែលតាមដានសកម្មភាពរបស់កងទ័ពអាកាស និងទ័ពជើងទឹកអ៊ីស្រាអែល។ សំណុំឯកសារសម្ងាត់នោះត្រូវគេផ្សព្វផ្សាយតាមបណ្ដាញតេឡេក្រាមរបស់រុស្ស៊ី។ អ៊ីស្រាអែលបន្តរៀបចំផែនការវាយប្រហារសងសឹកអ៊ីរ៉ង់ពីបទបាញ់មីស៊ីល១៨០គ្រាប់កាលពីថ្ងៃទី១ ខែតុលា។ នេះជាលើកទី២ដែលអ៊ីរ៉ង់វាយប្រហារអ៊ីស្រាអែល។ កាលពីលើកទី១ អ៊ីរ៉ង់បាញ់មីស៊ីល និងយន្តហោះដ្រូនចូលអ៊ីស្រាអែល។
បន្ទាប់ពីបាញ់សម្លាប់មេដឹកនាំកំពូលរបស់ក្រុមហាម៉ាស់ឈ្មោះស៊ីនវ៉ារួចមក អ៊ីស្រាអែលចាប់ផ្ដើមបង្កើនការវាយលុកកាន់តែខ្លាំងស្មើដៃគ្នាទៅលើមូលដ្ឋានរបស់ក្រុមហាម៉ាស់នៅហ្កាហ្សា និងមូលដ្ឋានរបស់ហេសបូឡានៅលីបង់។ ចំពោះសំណួររបស់អ្នកសារព័ត៌មានដែលថាតើនឹងមានវិធានការបែបណាចំពោះអ្នកបញ្ចេញឯកសារសម្ងាត់? លោកចនសុនឆ្លើយតបថាសំណុំរឿងនេះកំពុងស្ថិតនៅក្នុងការស៊ើបអង្កេតនៅឡើយ។ លោកនឹងជម្រាបឱ្យដឹងបន្ថែមទៀតនៅក្នុងពេលឆាប់ខាងមុខនេះ។
លោកថ្លែងបន្តទៀតថាយើង (រដ្ឋសភា)កំពុងបន្តតាមដានរឿងនេះយ៉ាងយកចិត្តទុកដាក់ជាទីបំផុត។ ទីភ្នាក់ងារស៊ើបការណ៍សម្ងាត់ NGIA និងការិយាល័យស៊ើបការណ៍ជាតិ DNA មិនទាន់ធ្វើអត្ថាធិប្បាយអ្វីទាំងអស់ទៅលើរឿងនេះ។ ចំណែកមន្ទីរបញ្ចកោណថ្លែងថាខ្លួនកំពុងពិនិត្យមើលព័ត៌មានផ្សាយអំពីការបែកធ្លាយការណ៍សម្ងាត់នោះ។ យោងតាមកាសែតញូយ៉កថាមស៍, មន្ត្រីរដ្ឋាភិបាលអាមេរិកបានទទួលស្គាល់ស្ងាត់ៗថាឯកសារដែលគេទម្លាយតាមតេឡេក្រាមនោះគឺជាការពិត។
ប៉ុន្តែឯកសារនោះគ្រាន់តែមួយចំណែកតូចនៃឯកសារសម្ងាត់ដ៏ច្រើនសន្ធឹកសន្ធាប់ទៀតដែលអាមេរិកប្រមូលបាននៅក្នុងដៃពាក់ព័ន្ធនឹងផែនការសម្ងាត់របស់អ៊ីស្រាអែល។ ឯកសារទីមួយមានចំណងជើងថា «អ៊ីស្រាអែល៖ កងទ័ពអាកាសបន្តត្រៀមខ្លួនបើកប្រតិបត្តិការវាយប្រហារអ៊ីរ៉ង់ និងត្រៀមខ្លួនធ្វើសមយុទ្ធយោធាដែនអាកាស»។ ឯកសារនេះនិយាយអំពីយុទ្ធសាស្ត្ររបស់អ៊ីស្រាអែលដែលត្រៀមវាយប្រហារដោយគ្រាប់មីស៊ីល និងមីស៊ីលបាញ់ពីអាកាសទៅលើដី (បាញ់ចេញពីយន្តហោះ)។
ឯកសារសម្ងាត់ទី២មានចំណងជើងថា «អ៊ីស្រាអែល៖ កងទ័ពការពារជាតិបន្តរៀបចំផែនការវាយប្រហារទីតាំងស្តុកទុកអាវុធ និងវាយប្រហារជាសម្ងាត់តាមយន្តហោះដ្រូនទៅលើប្រទេសអ៊ីរ៉ង់»។ លោកបៃដិនថ្លែងប្រាប់អ្នកសារព័ត៌មានកាលពីសប្ដាហ៍មុនថាលោកយល់ច្បាស់ថាអ៊ីស្រាអែលនឹងចាត់វិធានការឆ្លើយតបទៅអ៊ីរ៉ង់នៅពេលណា និងឆ្លើយតបកម្រិតណា។ ប៉ុន្តែលោកយល់ថាប្រទេសទាំង២នៅមានឱកាសដើម្បីទប់ស្កាត់មិនឱ្យកើតមានការសងសឹកគ្នាទៅវិញទៅមកបែបនេះ។ លោកចង់មានន័យថាប្រទេសទាំង២គួរតែចរចាគ្នាឱ្យមានបទឈប់បាញ់៕
ចែករំលែកព័តមាននេះ