រាជធានីភ្នំពេញ ៖ ជនសង្ស័យ០២នាក់ ត្រូវបានកម្លាំងនគរបាលខណ្ឌទួលគោក សហការជាមួយនគរបាលខណ្ឌឬស្សីកែវ ឃាត់ខ្លួនកាលពីវេលាម៉ោង១១យប់ថ្ងៃទី១៣ ខែតុលា ឆ្នាំ២០២៤ បន្ទាប់ពីធ្វើសកម្មភាពឆក់ទូរសព្ទដៃពីនារីម្នាក់ តាមដងផ្លូវ នៅក្នុងសង្កាត់បឹងកក់ទី២ ខណ្ឌទួលគោក បានសម្រេច ហើយព្យាយាមគេចខ្លួន ។
ជនសង្ស័យដែលត្រូវឃាត់ខ្លួន រួមមាន ៖ ១-ឈ្មោះ ទ្រី ប៊ុនហាប់ ហៅ ហាប់ ភេទប្រុស អាយុ១៨ឆ្នាំ ជនជាតិខ្មែរ ស្នាក់នៅបន្ទប់ជួល ផ្លូវ សង្កាត់ផ្សារកណ្ដាលទី១ ខណ្ឌដូនពេញ និង២-ឈ្មោះ ហ៊ុន សេង ហៅ សេង ភេទប្រុស អាយុ១៨ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅផ្ទះជួល ផ្លូវបេតុង សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមនគរបាលខណ្ឌទួលគោក បានឲ្យដឹងថា ជនសង្ស័យទាំងពីរនាក់បានសមត្ថកិច្ចឃាត់ខ្លួនពីបទលួចមានស្ថានទម្ងន់ទោស (ឆក់ទូរសព្ទដៃ០១គ្រឿង) ។
តាមនគរបាលបានឲ្យដឹងទៀតថា នៅថ្ងៃទី១៣ ខែតុលា ឆ្នាំ២០២៤ វេលាម៉ោងប្រហែល២៣និង០០នាទី កម្លាំងផ្នែកជំនាញ នៃអធិការដ្ឋាននគរបាលខណ្ឌទួលគោក បានសហការជាមួយកម្លាំងអធិការដ្ឋាននគរបាលខណ្ឌឬស្សីកែវ បានធ្វើការឃាត់ខ្លួនជនសង្ស័យ០២នាក់ ពីបទលួចមានស្ថានទម្ងន់ទោស (ឆក់ទូរសព្ទដៃ០១គ្រឿង) ឃាត់ខ្លួននៅចំណុចលើផ្លូវជាតិលេខ៥ សង្កាត់គីឡូត៍ម៉ែត្រលេខ៦ ខណ្ឌឬស្សីកែវ រាជធានីភ្នំពេញ ប្រព្រឹត្តនៅចំណុចលើដងផ្លូវលេខ២៩១ ក្រុមទី៦៤ ភូមិ១៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ កាលពីថ្ងៃទី១៣ ខែតុលា ឆ្នាំ២០២៤ វេលាម៉ោងប្រហែល២២និង៤០នាទី ។
បន្ទាប់ពីចាប់ខ្លួនសមត្ថកិច្ចដកហូតវត្ថុតាង រួមមាន ៖
ម៉ូតូ០១គ្រឿងម៉ាក Suzuki Nex ស៊េរី 2024 ពណ៍សលាយខៀវ ពាក់ផ្លាកលេខ ភ្នំពេញ 1KO-4643 ជារបស់ជនសង្ស័យជិះធ្វើសកម្មភាពឆក់ និងទូរសព្ទដៃ០១គ្រឿងម៉ាក iPhone11 ពណ៌ស ជារបស់ជនរងគ្រោះឈ្មោះ ផាន គីមហួយ ភេទស្រី អាយុ២១ឆ្នាំ ដែលជនសង្ស័យធ្វើសកម្មភាពឆក់ ។
បច្ចុប្បន្ន ជនសង្ស័យខាងលើ កំពុងឃាត់ខ្លួននៅអធិការដ្ឋាននគរបាលខណ្ឌទួលគោក ដើម្បីចាត់បន្តតាមនិតិវិធី ៕
ចែករំលែកព័តមាននេះ