រាជធានីភ្នំពេញ ៖ រដ្ឋមន្ត្រីក្រសួងទេសចរណ៍កម្ពុជាបានឱ្យដឹងថា រយៈពេល៨ខែ ដើមឆ្នាំ២០២៤ កម្ពុជាទទួលបានទេសចរណ៍អន្តរជាតិប្រមាណ៤,២៩ លាននាក់ កើនឡើង២២,៥% ក្នុងនោះទេសចរជាជនជាតិចិនមានប្រមាណជិត៥៤ម៉ឺននាក់ កើនឡើង៤៧,៧%…
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍កម្ពុជាបានឱ្យដឹងថា រយៈពេល៨ខែ ដើមឆ្នាំ២០២៤ កម្ពុជាទទួលបានទេសចរណ៍អន្តរជាតិប្រមាណ៤,២៩ លាននាក់ កើនឡើង២២,៥% ក្នុងនោះទេសចរជាជនជាតិចិនមានប្រមាណជិត៥៤ម៉ឺននាក់ កើនឡើង៤៧,៧% បើធៀបនឹងរយៈពេលដូចគ្នាឆ្នាំ២០២៣ ។
ការលើកឡើងរបស់ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ នៅក្នុងជំនួបសម្តែងការគួរសម និងពិភាក្សាការងាររវាងលោកស្រី JING HE អគ្គនាយិកាមន្ទីរវប្បធម៌និង ទេសចរណ៍ខេត្ត
ហីឡុងជាំង (Heilongjiang) នៃសាធារណរដ្ឋប្រជាមានិតចិន កាលពីពេលថ្មីៗនេះ។
ក្នងជំនួបនេះ ឯកឧត្តម ហួត ហាក់ បានកោតសរសើរចំពោះទំនាក់ទំនង មិត្តភាពជាប្រពៃណីទំនាក់ទំនងការទូតដែលមានរយៈពេល៦៦ឆ្នាំ ជាមិត្តភាពដែកថែប និងភាពជាដៃគូយុទ្ធសាស្ត្រគ្រប់ជ្រុងជ្រោយ»។
ក្រោមក្របខណ្ឌ កិច្ចសហប្រតិបត្តិការត្បូងពេជ្រ សំដៅសម្រេចបាននូវការកសាងសហគមន៍ជោគវាសនារួម កម្ពុជា-ចិន កិច្ចសហប្រតិបត្តិការរវាងប្រទេសទាំងពីរ មានភាពរីកចម្រើន និងល្អប្រសើរលើគ្រប់វិស័យ ជាពិសេសវិស័យទេសចរណ៍ ដោយឆ្នាំ២០២៤ ជាឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន។
ឯកឧត្តមរដ្ឋមន្ត្រីក៏បានជម្រាបជូនអំពីលទ្ធផលនៃការចូលរួមពិព័រណ៍ទេសចរណ៍ចិន-អាស៊ាន ឆ្នាំ២០២៤ លើកទី១០ នៅទីក្រុងគួយលីន តំបន់ស្វយ័តក្វាងស៊ី សាធារណរដ្ឋប្រជាមានិតចិន ពីថ្ងៃទី២៤-២៦ ខែកញ្ញា ឆ្នាំ២០២៤ ។
ជាការឆ្លើយតប លោកស្រីអគ្គនាយិកាមន្ទីរវប្បធម៌ និងទេសចរណ៍ខេត្តហឺឡុងជាំង បានថ្លែងអំណរគុណ យ៉ាងជ្រាលជ្រៅជូនចំពោះលោករដ្ឋមន្ត្រី ដែលបានឆ្លៀតពេលវេលាដ៏មមារញឹកអញ្ជើញជាអធិបតីក្នុងពិធីចុះហត្ថលេខាលើអនុស្សរណៈនៃការយោគយល់គ្នា និងអនុញ្ញាតជូនលោកស្រី និងសហការីបានចូលជួបពិភាក្សាការងារ។
ជាកិច្ចបន្ទាប់ លោករដ្ឋមន្ត្រី បានជម្រាបជូនអំពីស្ថានភាពនយោបាយ ដែលមានសភាពល្អប្រសើរ លើគ្រប់ទិដ្ឋភាពរួមមាន៖ នយោបាយ សង្គម សេដ្ឋកិច្ច ដែលបង្កបរិយាកាសអនុគ្រោះ និងអំណោយផលដល់ ការអភិវឌ្ឍសង្គម-សេដ្ឋកិច្ច ទាក់ទាញទេសចរអន្តរជាតិ និងការវិនិយោគ ក ក្រោមការដឹកនាំដ៏ឈ្លាស និងប៉ិនប្រស របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង យន្តការលើកទឹកចិត្តជាច្រើនដល់វិស័យឯកជន ជាពិសេសលើវិស័យទេសចរណ៍ ដែលបានដាក់ចេញដោយ រាជរដ្ឋាភិបាលកម្ពុជានាពេលកន្លងមក។
ក្នុងឆ្នាំ២០២៣ កន្លងទៅ ប្រទេសកម្ពុជាទទួល បានទេសចរអន្តរជាតិប្រមាណ ៥,៤៥ លាននាក់ ក្នុង នោះទេសចរជនជាតិចិន មានប្រមាណជាង៥៤ម៉ឺននាក់។ កិច្ចជំនួបពិភាក្សាការងារ ក្រោមអធិបតីភាព លោករដ្ឋមន្ត្រី បានបញ្ចប់ដោយភាតរភាព និងផ្លែផ្កា ដែលទទួលបានលទ្ធផល លើការពង្រឹងកិច្ចសហប្រតិបត្តិការ ក្នុងវិស័យទេសចរណ៍ដូចខាងក្រោម៖
១-រដ្ឋបាលខេត្តហឺឡុងជាំង ផ្តល់កិច្ចសហការល្អ និងជិតស្និទ្ធជាមួយក្រសួងទេសចរណ៍កម្ពុជា ដើម្បីជួយផ្សព្វផ្សាយពីសក្តានុពល និងគោលដៅទេសចរណ៍កម្ពុជា ឱ្យបានទូលំទូលាយដល់ប្រជាជនចិន និងជំរុញ ដល់ប្រជាជនចិន មកធ្វើដំណើរកម្សាន្តនៅកម្ពុជាកាន់តែច្រើន ព្រមទាំងជួយទប់ស្កាត់ និងលុបបំបាត់រាល់ព័ត៌មាន ក្លែងក្លាយដែលជះផលអវិជ្ជមាន ដល់ប្រទេសកម្ពុជា។
២-រដ្ឋបាលខេត្តហឺឡុងជាំង ជួយជំរុញទាក់ទាញអ្នកវិនិយោគចិន មកបណ្តាក់ទុនបង្កើតផលិតផលទេសចរណ៍នៅកម្ពុជា ដែលជាប្រទេសពោរពេញដោយ សក្តានុពលវិនិយោគ។
៣-ក្រសួងទេសចរណ៍ នឹងបន្តកិច្ចសហប្រតិបត្តិការជាមួយរដ្ឋបាលខេត្តហឺឡុងជាំង ដើម្បីដាក់ចេញ នូវផែនការនិងសកម្មភាពចាំបាច់នានារួមគ្នា ដើម្បីជំរុញលំហូរទេសចរនៃគោលដៅទាំងពីរ។
៤-លោករដ្ឋមន្ត្រី នឹងពិនិត្យលទ្ធភាពដឹកនាំគណៈប្រតិភូក្រសួងទេសចរណ៍ទៅបំពេញទស្សនកិច្ច ផ្លាស់ប្តូរបទពិសោធនៅខេត្តហឺឡុងជាំង នាពេលវេលាសមស្របខាងមុខ តបតាមការអញ្ជើញរបស់លោកស្រី អគ្គនាយិកា។
ក្រោយបញ្ចប់កិច្ចជំនួបពិភាក្សាការងារ លោករដ្ឋមន្ត្រី បានផ្តល់កិត្តិយសជាអធិបតីក្នុងពិធីចុះ ហត្ថលេខា លើអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការជំរុញលំហូរទេសចរ រវាងគោលដៅទាំងពីរ រវាងក្រសួងទេសចរណ៍នៃព្រះរាជាណាចក្រកម្ពុជា តំណាងដោយ អគ្គនាយកនៃអគ្គនាយកដ្ឋានអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ និងរដ្ឋបាលខេត្តហីឡុងជាំង តំណាងដោយលោកស្រីអគ្គនាយិកាមន្ទីរវប្បធម៌និង ទេសចរណ៍ខេត្ត៕
ចែករំលែកព័តមាននេះ