ក្វាងណៃ ៖ សារព័ត៌មានវៀតណាម VN Express បានឱ្យដឹងថា តម្លៃស្លានៅវៀតណាមបានឈានទៅបំបែកកំណត់ត្រាដោយគ្រាប់ស្លាមួយគីឡូបានហក់ឡើងជិតដល់១០ម៉ឺនដុង នៅតាមបណ្តាខេត្តមួយចំនួនដូចជា ខេត្តក្វាងណៃ និងខេត្តក្វាងណាម ដែលជាអត្រាតម្លៃទ្វេគុណជាង៧ដង បើធៀបនឹងឆ្នាំមុន ។
អាជីវករប្រមូលទិញស្លា បានអះអាងថា គ្រាប់ស្លា១គីឡូក្រាម អាចលក់បានក្នុងចន្លោះពី 94.000 – 100.000 ដុង ដែលជួយកសិកររកចំណូលបានពីរាប់រយទៅរាប់ពាន់លានដុង ។ កសិករឈ្មោះ Phung Van Chinh ជាពលរដ្ឋរស់នៅឃុំ Tien Lanh ស្រុក Tien Phuoc ខេត្តក្វាងណាម ដែលបានដាំដើមស្លា ៣០០០ ដើមជុំវិញចម្ការរបស់គាត់បានឱ្យដឹងថា ដើមស្លារបស់គាត់២០០ដើម អាចប្រមូលផលបានរៀងរាល់ឆ្នាំចាប់ពីខែសីហា ដល់ខែធ្នូ ។
បច្ចុប្បន្នតម្លៃមួយគីឡូ៩៤០០០ដុង ក្នុងមួយគីឡូក្រាម ដែលវាខុសគ្នាឆ្ងាយពីឆ្នាំមុខដែលមានតម្លៃត្រឹមតែ ១៣០០០ ទៅ១៥០០០ដុងតែប៉ុណ្ណោះ ។ ដោយឡែកកសិករម្នាក់ទៀតឈ្មោះ លោក Nguyen Xuan Hoc នៅឃុំ Tien Canh បាននិយាយដោយរីករាយថា «នេះជាលើកទីមួយមិនធ្លាប់ជួបប្រទះដែលគ្រាប់ស្លាស្រស់ឡើងថ្លៃខ្ពស់ដូចនេះ ហើយអាចរកចំណូលបានច្រើនជាងចិញ្ចឹមបង្គា ដាំដើមអាកាស្យា និងដំណាំហូបផ្លែទៅទៀត។»
ជាមួយតម្លៃខ្ពស់បែបនេះ គាត់រំពឹងថា ឆ្នាំនេះនឹងអាចរកចំណូលបានជាង២៥០ ទៅ៣០០លានដុង។ បច្ចុប្បន្នដែលស្ថិតពាក់កណ្តាលរដូវប្រមូលផលនៅឡើយ គេសង្កេតឃើញថា ឈ្មួញជាច្រើនបាននាំគ្នាបន្តសម្រុកប្រមូលទិញដល់ចម្ការស្លារដែលត្រូវគេរំពឹងថា នៅចុងរដូវតម្លៃស្លាអាចនឹងកើនឡើងបន្ថែមទៀត ។ ឈ្មួញកណ្តាលម្នាក់បានឱ្យដឹងថា ក្រោយពីការប្រមូលទិញស្លាស្រស់ទាំងនោះ ត្រូវដឹកទៅលក់ឱ្យកន្លែងកែច្នៃដែលមានចម្ងាយ២០គីឡូម៉ែត្រពីភូមិក្នុងតម្លៃ១០ម៉ឺនដុង ក្នុងមួយគីឡូក្រាម ។ ដើមស្លា ត្រូវបានពលរដ្ឋវៀតណាមនិយមដាំលម្អជុំវិញផ្ទះ ជាពិសេសបន្ទាប់ពីដើមស្លាដែលទិញពីផ្សារយកមកតាំងកំឡុងពេលបុណ្យចូលឆ្នាំថ្មី ។
ដើមស្លា គឺងាយស្រួលដាំដុះ ត្រូវការការថែទាំតិចតួចធន់នឹងខ្យល់ឆាប់អោយផល បន្ទាប់ពីដាំបាន៥ឆ្នាំ ហើយក្រោយពីដាំបានទី៧ គេអាចប្រមូលផលបានរាប់ទសវត្សរ៍ ។ ចំពោះដើមហេតុដែលនាំឱ្យតម្លៃស្លាស្រស់ក្នុងប្រទេសវៀតណាម កើនឡើងខ្ពស់នោះត្រូវបានលោក Nguyen Xuan Vu អនុប្រធាននាយកដ្ឋានកសិកម្ម និងអភិវឌ្ឍន៍ជនបទខេត្ត Quang Nam អះអាងថា ដោយសារមានតម្រូវខ្ពស់នៅឯប្រទេសចិន និងឥណ្ឌា ជំរុញឱ្យមានបញ្ជាទិញ និងនាំចេញយ៉ាងគំហុក ។
យ៉ាងណាក៏ដោយ មន្ត្រីកសិកម្មរូបនេះ សម្តែងការព្រួយបារម្ភចំពោះការឡើងថ្លៃកប់ពពកបែបនេះដោយក្រើនរំលឹកដល់ប្រជាជនក្នុងតំបន់ថា នេះគ្រាន់តែជាឆ្នាំដំបូងនៃការឡើងថ្លៃប៉ុណ្ណោះ ដូច្នេះយើងត្រូវតាមដានបន្តទៀតជៀសវាងឃើញតម្លៃខ្ពស់ក៏ផ្អើលដាំតៗគ្នាខ្លាចក្រែងដាំកាន់តែច្រើន តម្លៃប្រែជាទាបទៅវិញ ។
មន្ត្រីកសិកម្មរូបនេះបន្តថា ខេត្ត Quang Nam ទាំងមូលមានផ្ទៃដីដាំស្លាជិត១០០០ហិកតា ដែលផ្តោតសំខាន់ នៅស្រុក Tien Phuoc និង Bac Tra My ហើយអាចប្រមូលផលជាមធ្យមឈានដល់ជិត៨ពាន់តោនក្នុងមួយឆ្នាំ ។ ឃុំ Tien Canh ស្រុក Tien Phuoc ខេត្តក្វាងណាម ត្រូវបានគេចាត់ទុកថា ជាមជ្ឈមណ្ឌលកែច្នៃគ្រាប់ស្វាយចន្ទីសម្រាប់នាំចេញទៅក្រៅប្រទេសដែលមានរោងចក្រកែច្នៃជិត១០ ។
លោក Thai Phuc Thinh ជាម្ចាស់រោងចក្របានមានប្រសាសន៍ថា ក្នុងមួយថ្ងៃលោកទិញបានស្លាស្រស់យ៉ាងហោចណាស់១០តោន ហើយបើថ្ងៃណាច្រើននោះ លោតដល់៣៥តោន ដើម្បីសម្ងួត និងនាំចេញទៅប្រទេសចិន ។ គ្រាប់ស្លាសម្ងួតរួច ដែលត្រូវបានវៀតណាមនាំចេញទៅប្រទេសចិនរាប់ម៉ឺនតោន ក្នុងមួយឆ្នាំៗនោះត្រូវបានគេយកទៅផលិតជាស្ករគ្រាប់ ឬស្ករបៀម ដែលមានប្រសិទ្ធភាពការពារការឈឺបំពង់ក និងធ្វើឱ្យរាងកាយមានភាពកក់ក្តៅ ៕
ចែករំលែកព័តមាននេះ