រាជធានីភ្នំពេញ ៖ ឯកឧត្តម ប៉ែន បូណាអ្នកនាំពាក្យរាជរដ្ឋាភិបាលកម្ពុជាបានដាក់សំណួរទៅកាន់សហគមន៍អន្តរជាតិមួយចំនួនយ៉ាងដូច្នេះ តើពួកគេចង់ផ្តល់គំរូអ្វីឱ្យពិតប្រាកដដល់កម្ពុជា? យោងតាមបណ្តាញសង្គមតេឡេក្រាមរបស់ ឯកឧត្តម ប៉ែន បូណា…
រាជធានីភ្នំពេញ ៖ ឯកឧត្តម ប៉ែន បូណាអ្នកនាំពាក្យរាជរដ្ឋាភិបាលកម្ពុជាបានដាក់សំណួរទៅកាន់សហគមន៍អន្តរជាតិមួយចំនួនយ៉ាងដូច្នេះ តើពួកគេចង់ផ្តល់គំរូអ្វីឱ្យពិតប្រាកដដល់កម្ពុជា?
យោងតាមបណ្តាញសង្គមតេឡេក្រាមរបស់ ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋ មន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល នៅយប់ថ្ងៃទី៨ តុលា ឆ្នាំ២០២៤បានលើកឡើងថា រាជរដ្ឋាភិបាលដឹកនាំដោយគណបក្សប្រជាជនកម្ពុជាបានរំដោះជីវិតខ្មែរឱ្យរួចផុតពីការកាប់សម្លាប់ស្ទើរផុតពូជរហូតនាំប្រទេសមកដល់សម័យកាលសម្បូរសប្បាយដូចបច្ចុប្បន្ន គេ
ស្រែកថា សិទ្ធិមនុស្សនៅកម្ពុជាដើរថយក្រោយ? ទាល់តែកើតសង្គ្រាមកាប់សម្លាប់គ្នាបង្កវិនាសកម្មផ្តាច់ផ្តិលជីវិតមនុស្សស្ទើរមិនលស់ថ្ងៃដែលកំពុងកើតមានក្នុងបណ្តាប្រទេសមួយចំនួនដូចសព្វថ្ងៃទើបហៅថា ស្ថានភាពសិទ្ធិមនុស្សដើរទៅមុខឬ? កម្ពុជាឈានឆ្ពោះទៅមុខជានិច្ចមិនបែរថយក្រោយឡើយ។
ឯកឧត្តមបានបន្ថែមថា គ្រាន់តែចាត់វិធានការផ្លូវច្បាប់ប្រឆាំងមនុស្សមួយក្តាប់តូចដែលប៉ុនប៉ងបង្កចលាចលសង្គម និងប៉ុនប៉ងបំផ្លាញសុខសន្តិភាពដើម្បីការពារសេចក្តីសុខរបស់ប្រជាពលរដ្ឋទូទាំងប្រទេស បែរជាស្រែកថាព្រួយបារម្ភនិងថ្កោលទោសអំពីការរឹតត្បិតសេរីភាព និងការរំលោភសិទ្ធិមនុស្ស?
ឯកឧត្តមអ្នកនាំពាក្យបានបញ្ជាក់ថា «តើគេចង់ឱ្យខ្មែររស់ក្នុងសន្តិភាព ឬក្នុងភ្លើងសង្គ្រាម? តើប្រទេសណាមានលំហសម្រាប់មនុស្សបំពានច្បាប់?»
ជាមួយគ្នានោះដែរ ឯកឧត្តមអ្នកនាំពាក្យបានលើកឡើងថា គ្រាន់តែដាក់ឱ្យប្រើប្រាស់ធម្មនុញ្ញវិជ្ជាជីវៈសារព័ត៌មាន ដើម្បីលើកកម្ពស់គុណតម្លៃអ្នកសារព័ត៌មាន គេបែរទៅជាសម្តែងការព្រួយបារម្ភ ខណៈដែលអ្នកបង្កើត និងបង្ហោះព័ត៌មានក្លែងក្លាយ ប្រឌិត ញុះញង់ពេញបណ្តាញសង្គម បែរជានាំគ្នាការពារទៅវិញ? តើគេចង់លើកទឹកចិត្តឱ្យអ្នកសារព័ត៌មានគោរពក្រមសីលធម៌វិជ្ជាជីវៈ និងផ្តល់ព័ត៌មានពិត ឬចង់ឱ្យចេះតែភាសាញុះញង់ ប្រឌិត បំផ្លើសបំភ្លៃ និងមួលបង្កាច់?
ឯកឧត្តមក៏សូមប្រជាពលរដ្ឋខ្មែរពិចារណា ដើម្បីយល់ទាំងអស់គ្នា ហើយរួមគ្នាកសាងប្រទេសជាតិយើងឱ្យបានរីកលូតលាស់ទៅមុខជានិច្ច ក្រោមម្លប់សុខសន្តិភាពដែលរកបានដោយលំបាកលំបិនបំផុត។ អរគុណស្ថាបនិក និងប្រតិបត្តករសន្តិភាព។ អរគុណនយោបាយឈ្នះឈ្នះដែលអនុញ្ញាតឱ្យយើងមានអ្វីៗថ្ងៃនេះ និងកំពុងសម្លឹងឆ្ពោះទៅអនាគតដ៏រុងរឿងនាឆ្នាំ២០៥០ តទៅស្របតាមយុទ្ធសាស្ត្របញ្ចកោណរបស់រាជរដ្ឋាភិបាល។
សូមជម្រាបថា ការលើកឡើងរបស់អ្នកនាំពាក្យរាជរដ្ឋាភិបាល បន្ទាប់ពីវិទ្យអាស៊ីសេរី(RFI)បានផ្សាយថា សហគមន៍អន្តរជាតិព្រួយបារម្ភ និងថ្កោលទោសកម្ពុជាដែលធ្វើឱ្យស្ថានភាព សិទ្ធិមនុស្សដើរថយក្រោយ។
សហភាពអឺរ៉ុប សហរដ្ឋអាមេរិក និងប្រទេសអង់គ្លេសបានបង្ហាញក្តីកង្វល់ នៅថ្ងៃទី០៧ ខែតុលាចំពោះស្ថានភាព សិទ្ធិមនុស្សនៅកម្ពុជា និងបាន ថ្កោលទោសរដ្ឋាភិបាលកម្ពុជាដែលបាន ប្រើប្រព័ន្ធតុលាការ ដើម្បីបំបិទសំឡេង៕
ចែករំលែកព័តមាននេះ