ទីក្រុងបេរូត៖ តើសង្គ្រាមទ្រង់ទ្រាយធំនៅតំបន់មជ្ឈិមបូព៌ាអាចនឹងទប់ស្កាត់ជាប់ឬមិនជាប់? នេះជាសំណួរដ៏ធំមួយនៅពេលកុ្រមហេសបូឡាប្រកាសទទួលស្គាល់ជាផ្លូវការថាមេដឹកនាំកំពូលរបស់ខ្លួនគឺលោកណាស្រាឡា (Nasrallah) ពិតជាបានស្លាប់ហើយនៅក្នុងការទម្លាក់គ្រាប់បែករបស់អ៊ីស្រាអែលទៅលើបញ្ជាការដ្ឋានសម្ងាត់របស់គាត់នៅទីក្រុងបេរូត ប្រទេសលីបង់កាលពីយប់ថ្ងៃសុក្រ។
សាក្សីនិយាយថាការវាយប្រហារនោះពិតជាមានសភាពខ្លាំងក្លាណាស់ ធ្វើឱ្យរញ្ជួយអស់ទាំងបរិវេណនៅជុំវិញនោះចម្ងាយរាប់សិបគីឡូម៉ែត្រ។ ទីតាំងទម្លាក់គ្រាប់បែកនោះបានបង្កើតជាក្រហូងជម្រៅរហូតដល់ទៅម្ភៃម៉ែត្រឯណោះ។ ដំណឹងមរណភាពនេះជាការបញ្ជាក់បន្ថែមនូវអ្វីដែលអ៊ីស្រាអែលបានអះអាងតាំងពីព្រឹកថ្ងៃសៅរ៍ថាខ្លួនបានកម្ទេចមេដឹកនាំកំពូលរបស់ហេសបូឡារួមជាមួយមេបញ្ជាការកងទ័ពកំពូលរបស់ក្រុមនេះម្នាក់ផងដែរ។
ក្រុមហេសបូឡាបានចេញសេចក្ដីប្រកាសនៅល្ងាចថ្ងៃសៅរ៍បញ្ជាក់ថាលោកហាសាន់ ណាស្រាឡា (Hassan Nasrallah) ជាអគ្គលេខាធិការរបស់ហេសបូឡាបានស្លាប់ដោយសារការវាយប្រហារតាមអាកាសរបស់អ៊ីស្រាអែលទៅលើទីក្រុងបេរូតភាគខាងត្បូង។ ដូច្នេះ ការដឹកនាំចលនាតស៊ូរបស់គាត់រយៈពេល៣២ឆ្នាំចាប់ពីឆ្នាំ១៩៩២មកបានឈានដល់ទីបញ្ចប់ហើយ។
នៅក្នុងសេចក្ដីប្រកាសនោះ ក្រុមហេសបូឡាបញ្ជាក់ថាការស្លាប់នេះមិនមែនជាទីបញ្ចប់នៃការតស៊ូរបស់ខ្លួនឡើយ។ ហេសបូឡាប្ដេជ្ញាថានឹងបន្តការតស៊ូប្រឆាំងនឹងពួកបច្ចាមិត្ត (អ៊ីស្រាអែល) រហូតដល់ថ្ងៃអវសាននៃជីវិត។ ហេសបូឡានឹងបន្តគាំទ្របុព្វហេតុតស៊ូរបស់ពួកប៉ាឡេស្ទីននៅតំបន់ហ្កាហ្សា និងការពារទឹកដីលីបង់ និងប្រជាជនជាទីគោរពសក្ការៈនៃប្រទេសនេះ។
សេចក្ដីប្រកាសនោះមិនបានបញ្ជាក់ថាតើនរណានឹងឡើងមកកាន់តំណែងកំពូលជំនួសលោកណាស្រាឡានោះទេ។ ម៉្យាងទៀត ហេសបូឡាក៏មិនបាននិយាយថាតើខ្លួននឹងចាត់វិធានការឆ្លើយតប ឬសងសឹកបែបណាចំពោះការធ្វើឃាតមេដឹកនាំកំពូលរបស់ខ្លួននោះដែរ។ ហេសបូឡាគ្រាន់តែបញ្ជាក់ដោយខ្លីថាចលនាប្រឆាំងនឹងអ៊ីស្រាអែលត្រូវតែធ្វើជាបន្តទៀត៕
ចែករំលែកព័តមាននេះ