ប្រទេសព័រទុយហ្គាល់ ៖ ប្រព័ន្ធផ្សព្វផ្សាយរបស់ប្រទេសព័រទុយហ្គាល់ កាលពីពេលថ្មីៗនេះ បានរាយការណ៍ថា កីឡាករ Cristiano Ronaldo កំពុងប្រឈមមុខរឿងដ៏ពិបាកមួយ ដោយបានព្យាយាមចុះឈ្មោះចូលរៀនសម្រាប់កូនៗរបស់ខ្លួននៅសាលារៀន…
ប្រទេសព័រទុយហ្គាល់ ៖ ប្រព័ន្ធផ្សព្វផ្សាយរបស់ប្រទេសព័រទុយហ្គាល់ កាលពីពេលថ្មីៗនេះ បានរាយការណ៍ថា កីឡាករ Cristiano Ronaldo កំពុងប្រឈមមុខរឿងដ៏ពិបាកមួយ ដោយបានព្យាយាមចុះឈ្មោះចូលរៀនសម្រាប់កូនៗរបស់ខ្លួននៅសាលារៀន St. Julian ដ៏ល្បីបំផុតនៅប្រទេសព័រទុយហ្គាល់ ប៉ុន្តែត្រូវបានបដិសេធពីខាងសាសា។
បើយោងតាមប្រភពពីសារព័ត៌មាន AS បានឱ្យដឹងថា កំពូលខ្សែប្រយុទ្ធព័រទុយហ្គាល់ Cristiano Ronaldo គ្រោងនឹងត្រឡប់ទៅប្រទេសកំណើតវិញជាមួយនាង Georgina Rodriguez ដែលជាមិត្តស្រី ចំពេលផ្ទះវីឡាដ៏ធំរបស់ពួកគេស្ថិតនៅក្នុងទីក្រុង Cascais ជិតទីក្រុង Lisbon កំពុងត្រូវបានសាងសង់។ ប៉ុន្តែទោះជាយ៉ាងណាក៏ដោយ ផែនការរស់នៅទីនោះកំពុងប្រឈមនឹងបញ្ហា នៅពេលដែលគូស្នេហ៍១គូនេះ ព្យាយាមស្វែងរកសាលារៀនសម្រាប់កូនទាំង៥នាក់របស់ពួកគេ។
ប្រភពដដែលបន្តថា Ronaldo និងមិត្តស្រីត្រូវបានគេប្រទះឃើញទៅសាលា St. Julian ដែលជាសាលាឯកជនរបស់ចក្រភពអង់គ្លេស ដែលស្ថិតនៅក្នុងចំណោមសាលាដ៏ល្អ និងល្បីល្បាញបំផុតនៅក្នុងប្រទេសព័រទុយហ្គាល់។ សាលារៀននេះ គឺជាកន្លែងផ្តល់ចំណេះដឹងសម្រាប់ក្មេងៗមកពីគ្រួសារអ្នកមានទ្រព្យ និងមានអំណាចបំផុតក្នុងតំបន់ ដែលបានចុះឈ្មោះចូលរៀនចាប់ពីអាយុ ៣ ទៅដល់ ១៨ឆ្នាំ។ នៅទីនោះ Ronaldo និងមិត្តស្រីត្រូវបានរាយការណ៍ថាបានពិភាក្សាអំពីលទ្ធភាពនៃការចុះឈ្មោះចូលរៀនសម្រាប់កូនៗពួកគេ ប៉ុន្តែត្រូវបានខាងសាលាបដិសេធ។
ប្រភពពី V+Fama បានឱ្យដឹងថា ឯកជនភាព គឺជាហេតុផលធំបំផុតដែលសាលារៀន St. Julian មិនចង់ឱ្យកូនរបស់ Ronaldo ក្រេបជញ្ជក់ចំណេះដឹងនៅទីនេះ ដោយសារពួកគេចង់ការពារកូនសិស្សដទៃទៀតពីសំណាក់ក្រុមអ្នកសារព័ត៌មាន ហើយសាលាមិនចង់ក្លាយជាប្រភពនៃប្រធានបទព័ត៌មានឥតឈប់ឈរផងដែរ។
គួរបញ្ជាក់ថា Cristiano Ronaldo និងមិត្តស្រី រួមជាមួយកូន៥នាក់របស់គេកំពុងរស់នៅប្រទេសអារ៉ាប៊ីសាអូឌីត ដែលកីឡាករវ័យ៣៩ឆ្នាំរូបនេះ កំពុងប្រកបអាជីពជាមួយក្លិប Al Nassr នៅលីគកំពូលអារ៉ាប៊ីសាអូឌីត តាំងពីដើមឆ្នាំ ២០២៣។ កិច្ចសន្យាប្រធានក្រុមជម្រើសជាតិព័រទុយហ្គាល់រូបនេះ ជាមួយក្លិបបច្ចុប្បន្ននឹងអស់សុពលភាពនៅរដូវក្តៅឆ្នាំ ២០២៥។ ហើយនៅទីនោះ កីឡាករម្ចាស់ពានរង្វាន់ Ballon d’Or ៥សម័យកាលរូបនេះ ទទួលបានថ្លៃពលកម្ម ២០០លានអឺរ៉ូក្នុង១ឆ្នាំ ដែលធ្វើឱ្យរូបគេក្លាយជាកីឡាករបាល់ទាត់មានថ្លៃពលកម្មខ្ពស់បំផុតនៅលើពិភពលោក។
ក្រៅពីផ្ទះវិឡានៅទីក្រុង Cascais ដែលកំពុងសាងសង់នោះ Ronaldo ក៏មានផ្ទះវីឡានៅទីក្រុង Lisbon និងនៅទីក្រុង Funchal ដែលជាទីកន្លែងកំណើតរបស់ខ្លួនផងដែរ។ លើសពីនេះទៀត គេក៏មានផ្ទះវីឡានៅទីក្រុង Madrid ប្រទេសអេស្ប៉ាញផងដែរ ដែលជាកន្លែងរូបគេរស់នៅ៩ឆ្នាំ អំឡុងពេលប្រកបអាជីពជាមួយនឹងក្លិបស្តេចស Real Madrid៕
ចែករំលែកព័តមាននេះ