ខេត្តស្ទឹងត្រែង ៖ កម្ពស់ទឹកទន្លេមេគង្គខេត្តស្ទឹងត្រែងបានស្រកចុះបន្តិចខណៈទឹកទន្លេមេគង្គខេត្តក្រចេះបន្តហក់ឡើងបន្តិចនឹះបើគិតត្រឹមព្រឹកថ្ងៃទី២៥កញ្ញា២០២៤យោងតាមពីស្ថានភាពអាកាសធាតុនិងជលសាស្ត្រប្រចាំខេត្តស្ទឹងត្រែងនិងខេត្តក្រចេះ។ សម្រាប់ខេត្តស្ទឹងត្រែងកំពស់ទឹក ទន្លេមេគង្គ (កំពស់ប្រកាសអាសន្ន ១១.៣០ ម)នៅស្ថានីយ៍ ស្ទឹងត្រែង ព្រឹកមិញកម្ពស់…
ខេត្តស្ទឹងត្រែង ៖ កម្ពស់ទឹកទន្លេមេគង្គខេត្តស្ទឹងត្រែងបានស្រកចុះបន្តិចខណៈទឹកទន្លេមេគង្គខេត្តក្រចេះបន្តហក់ឡើងបន្តិចនឹះបើគិតត្រឹមព្រឹកថ្ងៃទី២៥កញ្ញា២០២៤យោងតាមពីស្ថានភាពអាកាសធាតុនិងជលសាស្ត្រប្រចាំខេត្តស្ទឹងត្រែងនិងខេត្តក្រចេះ។
សម្រាប់ខេត្តស្ទឹងត្រែងកំពស់ទឹក ទន្លេមេគង្គ (កំពស់ប្រកាសអាសន្ន ១១.៣០ ម)នៅស្ថានីយ៍ ស្ទឹងត្រែង ព្រឹកមិញកម្ពស់ ១០.៤០ម៉ែត្រ ថ្ងៃត្រង់នេះកម្ពស់ ១០.៣២ ម៉ែត្រ ទឹកស្រក០.០៨ម៉ែត្រ និងកម្ពស់ទឹក ប្រុងប្រយ័ត្ន ១០.៧០ម៉ែត្រ ។
លោក ម៉ែន គង់ នាយករងរដ្ឋបាលសាលាខេត្តស្ទឹងត្រែងនិងជាអ្នកនាំពាក្យសាលាខេត្តបានបញ្ជាក់ថាខេត្តស្ទឹងត្រែងផលប៉ះពាល់បឋមដោយទឹកជំនន់ គិតត្រឹមថ្ងៃត្រង់ថ្ងៃទី២៥ ខែកញ្ញា ឆ្នាំ២០២៤ នៅទាំង ៦ក្រុង ស្រុកក្នុងខេត្ត (ស្រុកថាឡាបរិវ៉ាត់, ស្រុកបុរីអូរស្វាយសែនជ័យ, ស្រុកសេសាន, ស្រុកសៀមបូក, ក្រុងស្ទឹងត្រែង, និងស្រុកសៀមប៉ាង) ស្មើនឹង ២២ឃុំ សង្កាត់ និង ៥២ភូមិ ដោយប៉ះពាល់សរុប៖ ប្រជាពលរដ្ឋ៧៩០គ្រួសារ ប៉ះពាល់ផ្ទះជារួម ២២៣ខ្នង។
ចំណែកស្រូវប៉ះពាល់៥៤៣ហិកតាស្រូវខូចខាត ៤០៧ហិកតា។ ផ្លូវដីរងផលប៉ះពាល់ ១០.៦៤៤ម៉ែត្រ (១០,៦៤គីឡូម៉ែត្រ) លោកបន្ថែមថាស្រុកចំនួន ០៣ ប៉ះពាល់ច្រើនជាងគេ រួមមាន៖ ស្រុក ថា
ឡាបរិវ៉ាត់ ស្រុកសេសាន និងស្រុកបុរីអូរស្វាយសែនជ័យ មានប្រជាពលរដ្ឋប៉ះពាល់សរុប៣០២គ្រួសារ, ប៉ះពាល់ផ្ទះ ១៨៦ខ្នង,និងប៉ះពាល់ស្រូវ ៣៧៥ហិកតា (នៅពុំទាន់មានការខូចខាតនៅឡើយ)។
ជាមួយគ្នានេះថ្នាក់ដឹកនាំខេត្ត កម្លាំងគណៈបញ្ជាការឯកភាពខេត្ត និងលេខាធិការដ្ឋាន-ក្រុមប្រតិបត្តិទាំង៣ នៃគណៈកម្មាធិការគ្រប់គ្រងគ្រោះមហន្តរាយខេត្ត បានត្រៀមកម្លាំង មធ្យោបាយ និងធនធានអន្តរាគមន៍ចាំបាច់ ព្រមទាំងចាត់តាំងឱ្យមានការតាមដានស្ថានភាពកម្ពស់ទឹក និងផលប៉ះពាល់យ៉ាងយកចិត្តទុកដាក់ចំពោះស្ថានភាពគ្រោះអាសន្ននេះផងដែរ។
ដោយឡែកទឹកទន្លេមេគង្គខេត្តក្រចេះ (កំពស់ប្រកាសអាសន្ន២៣.០០ម៉ែត្រ ម្សិលមិញ កម្ពស់ ២១.៤០ម៉ែត្រ ព្រឹកនេះកម្ពស់ ២១.៦៤ម៉ែត្រ ឡើង០.២៤ម៉ែត្រ និងកម្ពស់ទឹក ប្រុងប្រយ័ត្ន២២.០០ម៉ែត្រ។
កម្ពស់ទឹកទន្លេមេគង្គឡើងដល់កម្រិតអតិបរមា ២១, ៦៤ម៉ែត្របណ្តាលឱ្យទឹកហូរចូលគ្រប់ព្រែក (២៨ ព្រែក) និងបានធ្វើឱ្យប៉ះពាល់ដល់ឃុំសង្កាត់ ចំនួន ៣៦ឃុំសង្កាត់ ស្មើនឹង ១៨៨ភូមិ ក្នុង ក្រុង ស្រុក ចំនួន ៦ រួមមាន ស្រុកឆ្លូង ស្រុកព្រែកប្រសព្វ ស្រុកចិត្របុរី ស្រុកសំបូរ ស្រុកអូរ
គ្រៀងសែនជ័យ និងក្រុងក្រចេះ)។
ទាក់ទងទៅនឹងស្ថានភាពកម្ពស់ទឹកខាងលើបានបង្កផលប៉ះពាល់ដល់ប្រជាពលរដ្ឋ សរុបចំនួន ១០.៥០៨ គ្រួសារ ស្មើនឹង ៤០.៨៨៨ នាក់ ស្រី ចំនួន ១៧.៨២៨ នាក់ បានជម្លៀសប្រជាពលរដ្ឋ ចំនួន ៩៦ គ្រួសារ ស្មើនឹង ៤២៨នាក់ ស្រី ២១៧នាក់។
ប៉ះពាល់ផ្ទះប្រជាពលរដ្ឋ ចំនួន ៣.០៥១ខ្នង សាលារៀន ចំនួន ៣២កន្លែងមណ្ឌលសុខភាពចំនួន២កន្លែង វត្តអារាម ចំនួន ១៥ កន្លែង អណ្តូងស្នប់ ១៩គ្រឿង បង្គន់អនាម័យ ១៧៦ និងអគារដ្ឋបាលឃុំ ចំនួន ៥កន្លែង។
ចំណែកស្រូវសន្ទូង ពគ្រោះប៉ះពាល់លិចលង់ សរុបចំនួន៧.៣៦៩ ហិកតា ប៉ះពាល់លិចដំណាំចម្ការ ដំណាំរួមផ្សំ (ដំឡូងមី ពោត ល្ង) សរុបចំនួន ៦៦៦ ហិកតា ព្រមទាំងបានជម្លៀសសត្វ គោ ក្របី សរុបចំនួន ២.៨១០ ក្បាល ទៅកាន់ទីទួលខ្ពស់ៗក្បែរភូមិដ្ឋានផងដែរ។
ចំពោះហេដ្ឋារចនាសម្ព័ន្ធរួមមានលិចផ្លូវលំ សរុបប្រវែង១៥៥.៣២៧ម៉ែត្រ ផ្លូវកៅស៊ូ ៤០០ម៉ែត្រ ផ្លូវបេតុង ៤៩៥ម៉ែត្រ ស្ពានឈើ ២១កន្លែង និងលូកាត់ផ្លូវ ៦៤កន្លែង។
បច្ចុប្បន្នគណៈកម្មាធិការគ្រប់គ្រងគ្រោះមហន្តរាយថ្នាក់ខេត្តបានយកចិត្តទុកដាក់ខ្ពស់បន្ថែមទៀតដើម្បីឆ្លើយតបឲ្យបានទាន់ពេលវេលាស្របពេលជំនន់ទឹកភ្លៀងបានកើនឡើងនិងបង្កឲ្យប៉ះពាល់ដល់លំនៅឋានប្រជាពលរដ្ឋនិងហេដ្ឋារចនាសម្ព័ន្ធផងដែរ៕
ចែករំលែកព័តមាននេះ