លោកព្រឹទ្ធាចារ្យ ស៊ិប សារិន ដែលគេស្គាល់ថា ជាអ្នកបញ្ចូលសម្លេង និងសូរស័ព្ទភាពយន្តជំនាន់ដំបូងនៃកម្ពុជា ត្រូវបានគេរកឃើញលោកកំពុងរស់រានមានជីវិតនៅឡើយទេ នាពេលបច្ចុប្បន្ន បន្ទាប់ពីលោកបានរស់នៅយ៉ាងស្ងៀមស្ងាត់ និងបោះបង់ចោលពីវិស័យភាពយន្តអស់ជាច្រើនឆ្នាំមកនេះ…
លោកព្រឹទ្ធាចារ្យ ស៊ិប សារិន ដែលគេស្គាល់ថា ជាអ្នកបញ្ចូលសម្លេង និងសូរស័ព្ទភាពយន្តជំនាន់ដំបូងនៃកម្ពុជា ត្រូវបានគេរកឃើញលោកកំពុងរស់រានមានជីវិតនៅឡើយទេ នាពេលបច្ចុប្បន្ន បន្ទាប់ពីលោកបានរស់នៅយ៉ាងស្ងៀមស្ងាត់ និងបោះបង់ចោលពីវិស័យភាពយន្តអស់ជាច្រើនឆ្នាំមកនេះ ។
យោងតាមការចុះផ្សាយពីក្រុមដំណើរខ្មែរបានអោយដឹងថា ក្នុងដំណើរស្រាវជ្រាវដ៏ស្វិតស្វាញរុករកមរតកសិល្បៈប្រវត្តិសាស្ត្រភាពយន្ត និងចម្រៀងខ្មែរមុនឆ្នាំ១៩៧៥ ក្រុមដំណើរខ្មែរមានភ័ព្វវាសនាបានរកសិល្បកររៀមច្បងផ្នែកបញ្ចូលសំឡេងភាពយន្តជំនាន់ដំបូងដែលមានជីវិតដល់សព្វថ្ងៃ ជាមរតកមនុស្សដ៏មានតម្លៃកាត់ថ្លៃពុំបាន ហើយក្រុមដំណើរខ្មែរបានគោរពអញ្ជើញលោកព្រឹទ្ធាចារ្យមកធ្វើកិច្ចសម្ភាសន៍ជាផ្លូវការរយៈពេលជាង២ម៉ោងនៅការិយាល័យក្រុមដំណើរខ្មែរ នៅរសៀលថ្ងៃទី២៣ ខែកញ្ញា ឆ្នាំ២០២៤។
លោកព្រឹទ្ធាចារ្យ ស៊ិប សារិន សព្វថ្ងៃមានជន្មាយុ៩១ឆ្នាំហើយ បានរស់នៅយ៉ាងស្ងប់ស្ងាត់ជាមួយកូនចៅលោកតានារាជធានីភ្នំពេញ ក្រោយពីសំរាកពីការងារផ្នែកភាពយន្តតាំងពីឆ្នាំ១៩៩១មក
ម្ល៉េះ។ លោកតាបានចូលបម្រើវិស័យសិល្បៈខ្មែរតាំងពីដើមទសវត្ស៥០ ដោយចាប់ផ្តើមពីតួនាទីជាអ្នកយាមពេលបញ្ចាំងភាពយន្តបន្តមកជាអ្នកលក់សំបុត្រកុនតមកក្លាយជាអ្នកបញ្ចាំងភាពយន្ត និងចុងក្រោយជាអ្នកបញ្ចូលសម្លេង និងបញ្ចូលសូរសព្ទភាពយន្ត ហើយលោកតាក៏មានជំនាញជាអ្នកនិពន្ធសេណារីយ៉ូភាពយន្ត និងជាអ្នកកាត់តភាពយន្តផងដែរ។
ហ្វីលភាពយន្តឯកសារប្រវត្តិសាស្ត្រមួយដែលលោកតាបានកាត់ត និងបញ្ចូលសូរសព្ទ ព្រមទាំងសំឡេងគឺ ព្រះរាជពិធីសោយព្រះបរមរាជសម្បត្តិនៃព្រះករុណាព្រះសុរាម្រិត និងសម្តេចព្រះមហាក្សត្រយានីឆ្នាំ១៩៥៦។
ខ្សែភាពយន្តខ្មែរដំបូងដែលលោកតាបានបញ្ចាំងមុនគេ គឺរឿងស៊ូបង់ជីវិត កុំអោយតែខូចជាតិ ស្នាដៃរបស់លោក រឿម សុផុន នារោងភាពយន្តស៊ីណេលុច្ស៍ រាជធានីភ្នំពេញ។ លោកតាបញ្ចូលសំឡេង និងបញ្ចូលសូរសព្ទជាដំបូងក្នុងខ្សែភាពយន្តបរទេសក្នុងឆ្នាំ១៩៥៦ ជំនាន់លោក ឳ ផូ ។
ចំណែកខ្សែភាពយន្តខ្មែរដំបូងដែលលោកតាបានបញ្ចូលគឺរឿង រសាត់តាមខ្យល់ របស់ផលិតកម្មពោធិព្រឹក្សភាពយន្ត ឆ្នាំ១៩៦៤ ជាស្នាដៃនិពន្ធនិងដឹកនាំរឿងរបស់លោកស្រី ណារី ហែម បវរកញ្ញាលេខ៥នៃកម្ពុជាជំនាន់ឆ្នាំ១៩៥៥។
ជំនាញផ្នែកបញ្ចូលសំឡេងរបស់លោកតា គឺលោកតា បញ្ចូលជាតួរង និងជាតួកំប្លែង។ ក្នុងមហោស្រពភាពយន្តជាតិលើកទី១ ឆ្នាំ១៩៦៩ លោកតាបានទទួលពានរង្វាន់ផ្នែកបញ្ចូលសូរសព្ទឆ្នើម តាមរយះខ្សែភាពយន្តរឿង អាប៊ុលកាសេម។ ត្បិតតែលោកតាមានជន្មាយុច្រើនក៏ពិតមែន តែលោកតានៅចងចាំយ៉ាងច្បាស់នូវរឿងរ៉ាវមួយចំនួន និងរឿងរ៉ាវក្នុងសង្គមសិល្បៈសម័យយុគមាសយ៉ាងល្អផងដែរ ៕
ចែករំលែកព័តមាននេះ