រាជធានីភ្នំពេញ ៖ មន្ទីរសាធារណការ និងដឹកជញ្ជូនរាជធានីភ្នំពេញ បានអោយដឹងនៅម៉ោង៤និង១៥នាទីរសៀលថ្ងៃទី២៣ ខែកញ្ញា ឆ្នាំ២០២៤នេះថា «ករណីបាក់ស្រុតផ្លូវអមសងខាងប្រឡាយស្ទឹងមានជ័យ ប្រវែង ១៤៦ម៉ែត្រ ទទឹង ៥ម៉ែត្រ បណ្តាលមកពីទឹកហូរច្រោះដី ខាងក្រោមតួផ្លូវ ធ្វើអោយដីទន់ជ្រាយ រអិលបាក់ជ្រាលតួផ្លូវ» ។
បច្ចុប្បន្ន កម្លាំងជំនាញសហការជាមួយអាជ្ញាធរ ធ្វើការដាក់បារាស ដំឡើងស្លាកចរចារបិទកំណាត់នេះ ដើម្បីគ្រឿងចក្រចុះជួសជុលបឋមជាបណ្តោះអាសន្ន។ សូមបងប្អូនមេត្តាពង្វាងចរាចរជាបណ្តោះអាសន្ន ដោយសេចក្តីអនុគ្រោះ ។
សូមជម្រាបថា «ភ្ញាក់ផ្អើល ! ផ្លូវបេតុងមាត់ប្រឡាយលូបានបាក់ស្រុត នៅសង្កាត់ស្ទឹងមានជ័យ»ផ្លូវបេតុងមាត់ប្រឡាយលូ ក្បែរគល់ស្ពានស្ទឹងមានជ័យ ត្រូវបានបាក់ស្រុតចុះទៅក្រោម ផ្អើលពលរដ្ឋក្បែរខាង។ ភ្លាមៗ ផ្លូវមួយខ្សែនេះត្រូវបានអាជ្ញាធរដាក់របាំងបិទផ្លូវផ្អាកការធ្វើចរាចរឆ្លងកាត់ជាបណ្ដោះអាសន្ន ផងដែរ ។
ហេតុការណ៍បាក់ស្រុតនេះ បង្កភ្ញាក់ផ្អើលឡើងកាលពីវេលាម៉ោង០២រសៀលថ្ងៃទី ២៣ ខែកញ្ញា ឆ្នាំ២០២៤ នៅត្រង់ចំណុចមាត់ប្រឡាយលូ ស្ទឹងមានជ័យ តាមបណ្តោយផ្លូវបេតុង ស្ថិតក្នុងសង្កាត់ស្ទឹងមានជ័យទី០២ ខណ្ឌមានជ័យ រាជធានីភ្នំពេញ ។
តាមប្រភពព័ត៍មានពីប្រជាពលរដ្ឋ បានប្រាប់អោយដឹងថា គិតចាប់ពីមានការស្តារប្រឡាយលូស្ទឹងមានជ័យ មានរយៈពេល១០ថ្ងៃជាងមកហើយ ដែលផ្លូវបេតុងមួយខ្សែនេះ ចាប់ផ្តើមស្រុតបន្តិចម្តងៗ ហើយក៏ធ្លាប់បានរាយការណ៍ជូនអាជ្ញាធររួចមកហើយ ប៉ុន្តែមិនមានចំណាត់ការអ្វីសោះ ។
ប្រភពដដែលបន្តទៀតថា លុះព្រឹកថ្ងៃទី២៣ ខែកញ្ញា ឆ្នាំ២០២៤នេះ គាត់បានឃើញផ្លូវបេតុងនេះ ចាប់ផ្តើមមានសភាព ឃ្លាតពីគ្នាជាង១តឹក កាន់តែខ្លាំងឡើងៗ រហូតមកដល់រសៀលម៉ោង០២ថ្ងៃចន្ទនេះ គាត់កំពុងសម្រាន្តនៅក្នុងផ្ទះ ក៏ស្រាប់តែឮសំឡេងលាន់ដូចបែក ខណៈនោះគាត់រត់មកមើល ក៏បានប្រទះឃើញផ្លូវបេតុងមួយខ្សែនៅខាងមុខផ្ទះរបស់គាត់ បាក់ស្រុតអស់បាត់ទៅហើយ។ តែក៏សំណាងល្អ មិនបង្កអោយនរណាម្នាក់ រងរបួសនោះឡើយ ។
លោក ទូច សំអុល ចៅសង្កាត់ស្ទឹងមានជ័យទី០២ បានអោយដឹងថា ចំណុចផ្លូវនេះ គឺធ្លាប់ស្រុតម្តងរួចមកហើយ កាលពី០៨ឆ្នាំមុន ហើយក៏ត្រូវបានជួសជុលឡើងវិញ មកចាក់បេតុងវិញម្តង។ លោកបន្តទៀតថា ចំពោះផ្លូវ ដែលរងការបាក់ស្រុតនេះដែរ គឺមានប្រវែង ១៤៦ម៉ែត្រ ។
បច្ចុប្បន្ន មន្ត្រីជំនាញផ្នែកជួសជុលផ្លូវ កំពុងធ្វើការត្រួតពិនិត្យ និងសិក្សាពីផ្លូវរងការខូចខាតនេះ ដើម្បីវាយតម្លៃក្នុងការជួសជុលឡើងវិញ ៕
ចែករំលែកព័តមាននេះ